នគរបាលខណ្ឌឫស្សីកែវ ឃាត់ខ្លួនជនសង្ស័យ ២នាក់ ក្នុងចំណោមបក្ខពួក ៤នាក់ ពាក់ព័ន្ធករណីប្លន់យកទ្រព្យសម្បត្តិ
ភ្នំពេញ៖ នៅថ្ងៃទី២ ខែមករា ឆ្នាំ២០២៤ បន្ទាប់ពីទទួលបានពាក្យបណ្តឹងពីជនរងគ្រោះ កម្លាំងអធិការដ្ឋាននគរបាលខណ្ឌឫស្សីកែវ សហការជាមួយកម្លាំងការិយាល័យនគរបាលព្រហ្មទណ្ឌកំរិតធ្ងន់ រាជធានីភ្នំពេញ បានធ្វើការស្រាវជ្រាវឃាត់ខ្លួនជនសង្ស័យចំនួន២នាក់ ក្នុងចំណោមបក្ខពួកចំនួន៤នាក់ ពាក់ព័ន្ធករណីប្លន់យកទ្រព្យសម្បត្តិ (ប្រើកាំបិតផ្ជង់យកកាបូប បណ្តាលឱ្យរបួស) នៅចំណុចតារាងបាល់ផ្លូវបេតុង ភូមិស្វាយប៉ាក ក្រុម៨ សង្កាត់ស្វាយប៉ាក ខណ្ឌឫស្សីកែវ ប្រព្រឹត្តល្មើសនៅសួនច្បារកាំកូរស៊ីធី សង្កាត់ទួលសង្កែទី២ ខណ្ឌឫស្សីកែវ។
ឃាត់ខ្លួនជនសង្ស័យចំនួន២នាក់រូមមាន៖
១. ឈ្មោះ ឡុង ឡេងទ្រី ភេទប្រុស ស្នាក់នៅផ្ទះជួលគ្មានលេខ ផ្លូវបេតុង ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ មុខរបរមិនពិតប្រាកដ។
២. ឈ្មោះ វី ខេវិន ភេទប្រុស ស្នាក់នៅផ្ទះជួលគ្មានលេខ ផ្លូវបេតុង ភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ មុខរបរមិនពិតប្រាកដ។
សម្ភារៈបាត់បង់រួមមាន៖ កាបូបស្តាយ ចំនួន០១, ចិញ្ចៀនមាសទំងន់៥ជី ចំនួន០១, ប្រាក់ដុល្លារ ចំនួន៧ដុល្លារ, ប្រាក់រៀល ចំនួន៧ម៉ឺនរៀល។ វត្ថុតាងបន្សល់ទុកនៅកន្លែងកើតហេតុ៖ អាវយឺតដៃខ្លី ពណ៌ទឹកប៉ិច, ទ្រនាប់ជើងផ្ទាត់មួយចំហៀងរបស់ជនសង្ស័យ។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្តោះអាសន្ន ដើម្បីចាត់ការតាមនីតិវិធី៕
