តៃប៉ិ៖ ក្រសួងការពារជាតិតៃវ៉ាន់បានឲ្យដឹងកាលពីថ្ងៃអាទិត្យថា ក្នុងរយៈពេល ២៤ ម៉ោងមុន ខ្លួនបានរកឃើញយន្តហោះចម្បាំងរបស់ចិនចំនួន ០៨គ្រឿងកំពុងឆ្លងកាត់ខ្សែបន្ទាត់មធ្យមនៃច្រកសមុទ្រតៃវ៉ាន់។
តៃវ៉ាន់ដែលចិនអះអាងថាជាទឹកដីរបស់ខ្លួនបានត្អូញត្អែរម្តងហើយម្តងទៀតអំពីសកម្មភាពយោធារបស់ចិនជុំវិញកោះនេះក្នុងរយៈពេលបួនឆ្នាំចុងក្រោយនេះ។
ប្រទេសចិនបាននឹងកំពុងបង្កើនបេសកកម្មរបស់ខ្លួននៅជិតកោះតៃវ៉ាន់ នៅពេលដែលការបោះឆ្នោតប្រធានាធិបតី និងសភានៅថ្ងៃទី១៣ ខែមករា នៅលើកោះនេះខិតជិតមកដល់។
ក្រសួងការពារជាតិតៃវ៉ាន់បានបន្តថា យន្តហោះចម្បាំងរបស់ចិន J-១០, J-១១ និង J-១៦ បានឆ្លងកាត់ខ្សែបន្ទាត់មធ្យមនៅចំនុចខាងជើង និងកណ្តាលនៃច្រកសមុទ្រ។
ខ្សែបន្ទាត់មធ្យមធ្លាប់ធ្វើជារបាំងមិនផ្លូវការរវាងភាគីទាំងពីរ ប៉ុន្តែឥឡូវនេះយន្តហោះចិនតែងតែហោះហើរពីលើវា។
ក្រសួងបានបន្ថែមថា តៃវ៉ាន់បានបញ្ជូនកងកម្លាំងរបស់ខ្លួនទៅត្រួតពិនិត្យ។
ក្រសួងបានបញ្ជាក់ថា ប៉េងប៉ោងរបស់ប្រទេសចិនត្រូវបានគេប្រទះឃើញបន្ទាប់ពីឆ្លងកាត់ខ្សែបន្ទាត់មធ្យមកាលពីល្ងាចថ្ងៃសៅរ៍ ៩៧ ម៉ាយក្នុងសមុទ្រ (១៨០ គីឡូម៉ែត្រ) ភាគពាយព្យនៃទីក្រុងកំពង់ផែ Keelung ភាគខាងជើងនៃកោះតៃវ៉ាន់ក្នុងរយៈកំពស់ប្រហែល ២០,០០០ហ្វីត (៦,១០០ ម៉ែត្រ)។
ក្រសួងបានបន្ថែមថា ប៉េងប៉ោងបានធ្វើដំណើរទៅទិសខាងកើត ហើយបានបាត់ទៅវិញប្រហែលមួយម៉ោងក្រោយមក។
សក្តានុពលសម្រាប់ប្រទេសចិនក្នុងការប្រើប្រាស់ប៉េងប៉ោងសម្រាប់ចារកម្មបានក្លាយជាបញ្ហាសកលកាលពីខែកុម្ភៈ នៅពេលដែលសហរដ្ឋអាមេរិកបានបាញ់ទម្លាក់នូវអ្វីដែលខ្លួនបាននិយាយថាជាប៉េងប៉ោងឃ្លាំមើលរបស់ចិន។ ប្រទេសចិនបានបញ្ជាក់ថា ប៉េងប៉ោងនោះជាយានស៊ីវិលដែលបានរសាត់ដោយចៃដន្យ។
ប្រភព៖ Reuters
ប្រែសម្រួលដោយ៖ ឡាយ លីហួ
