ឃាត់ខ្លួនជនសង្ស័យ៤៩នាក់ មាន៣សញ្ជាតិ ក្នុងអាគារផ្ទះសំណាក់ខារ៉ាអូខេណានយ៉ាង៨៩ ករណីជួញដូរ រក្សាទុក ចាត់ចែងសម្រួលអោយប្រើប្រាស់ដោយខុសច្បាប់នូវសារធាតុញៀន និងកាន់កាប់រក្សាទុកអាវុធ គ្រាប់រំសេវដោយគ្មានការអនុញ្ញាត
ភ្នំពេញ៖ កម្លាំងជំនាញការិយាល័យប្រឆាំងគ្រឿងញៀនខេត្តស្វាយរៀង កាលពីថ្ងៃទី០៥ ខែធ្នូ ឆ្នាំ២០២៣ វេលាម៉ោង៣និង៣០នាទីទៀបភ្លឺ បានឃាត់ខ្លួនជនសង្ស័យ៤៩នាក់ ក្នុងអាគារផ្ទះសំណាក់ខារ៉ាអូខេណានយ៉ាង៨៩ ស្ថិតក្នុងបុរីសមសួន ភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង ករណីជួញដូរ រក្សាទុក ចាត់ចែងសម្រួលអោយប្រើប្រាស់ដោយខុសច្បាប់នូវសារធាតុញៀន និងកាន់កាប់រក្សាទុកអាវុធ គ្រាប់រំសេវដោយគ្មានការអនុញ្ញាត។
ការឃាត់ខ្លួនជនសង្ស័យខាងលើនេះ ដោយអនុវត្តតាមបទបញ្ជាដ៏ម៉ឺងម៉ាត់ពីលោកឧត្តមសេនីយ៍ទោ ពេជ្រ វីរ: ស្នងការនគរបាលខេត្តស្វាយរៀង និងដឹកនាំបញ្ជាផ្ទាល់ពីលោកឧត្តមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន និងដោយមានការសម្របសម្រួលផ្ទាល់ពី ឯកឧត្តម ខាំ សុផារី ព្រះរាជអាជ្ញា លោក ហួត វិចិត្រ និងលោក ដូរ៉ា អង្គប្រទាន ព្រះរាជអាជ្ញារង អមសាលាដំបូងខេត្តស្វាយរៀង កម្លាំងជំនាញការិយាល័យប្រឆាំងគ្រឿងញៀនខេត្ត ដឹកនាំដោយលោកវរសេនីយ៍ឯក កាន កេន នាយការិយាល័យ សហការជាមួយកម្លាំងអធិការដ្ឋាននគរបាលក្រុងបាវិតដឹកនាំដោយលោក អែម សុវណ្ណារិទ្ធិ អធិការនគរបាលក្រុង កម្លាំងវរ:សេនាតូចនគរបាលការពារព្រំដែនគោកលេខ៦០៩ បានបើកប្រតិបត្តិការឆ្មក់ចូលបង្ក្រាបទីតាំងកែឆ្នៃ ផលិត ជួញដូរ រក្សាទុក ចាត់ចែងសម្រួលអោយប្រើប្រាស់ ដោយខុសច្បាប់នូវសារធាតុញៀន និងកាន់កាប់រក្សាទុកអាវុធ គ្រាប់រំសេវដោយគ្មានការអនុញ្ញាតនៅចំណុចអាគារផ្ទះសំណាក់ ខារ៉ាអូខេណានយ៉ាង៨៩ ស្ថិតក្នុងបុរីសមសួន ភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
ជនសង្ស័យទាំង៤៩នាក់មានស្រី១២នាក់ និងមាន០៣សញ្ជាតិ (ជនជាតិវៀតណាម ៤៣នាក់ (ស្រី ១១នាក់) ជនជាតិចិនតៃវ៉ាន់ ៥នាក់ ជនជាតិខ្មែ រ០២នាក់ (ស្រី ០១នាក់)។
ចាប់យកវត្ថុតាងរួមមាន ៖
១/សារធាតុញៀនសរុបទម្ងន់ ១៥.៣០៨,៧៤ក្រាម (១៥គីឡូ ៣០៨,៧៤ ក្រាម)ក្នុងនោះមាន៖
-ថ្នាំញៀនប្រភេទ កេតាមីនទម្ងន់ ៥៦៨៨,១៩ក្រាម (៥គីឡូ ៦៨៨,១៩ក្រាម)
-ថ្នាំញៀនប្រភេទ អិចស្តាស៊ីទម្ងន់ ៧១៤៩,៣៤មក្រាម (៧គីឡូ១៤៩,៣៤ក្រាម)
-ថ្នាំញៀនប្រភេទ មេតំហ្វេតាមីនទម្ងន់ ៤៩២,០៨ក្រាម
-នីមេតាហ្សេប៉ាមទម្ងន់ ១.៩៥១,៥២ក្រាម
-មេតំហ្វេតាមីន(WY)ទម្ងន់ ១៦,៣១ក្រាម
-ម្សៅចំរុះពណ៌(MDMA)ទម្ងន់ ១១,៣១ក្រាម
២/រុក្ខជាតិក្រៀមទម្ងន់ ៣៥០,៨១មក្រាម
៣/សារធាតុមិនច្បាស់លាស់ទម្ងន់ ៤២.១៤៣,១១ក្រាម
៤/សារធាតុគីមីទម្ងន់ ១០៣២ក្រាម
៥/សារធាតុគីមីផ្សំទម្ងន់ ៥៥០០ក្រាម
៦/ជញ្ជីងថ្លឹងថ្នាំញៀនចំនួន ១៤គ្រឿង
៧/ម៉ាសុីនកែឆ្នៃផលិត និងម៉ាសុីនវេចខ្ចប់ រួមជាមួយឧបករណ៍សម្ភារ:មួយចំនួន
៨/អាវុធខ្លីចំនួន ០៣ដើម គ្រាប់ចំនួន ១៥០គ្រាប់
៩/លិខិតឆ្លងដែន ១៩ក្បាល។
ដកហួតទ្រព្យសម្បត្តិរួមមាន៖
-រថយន្ត ០៥គ្រឿង
-ទូរសព្ទ័ដៃ ៤៥គ្រឿង។
បច្ចុប្បន្នជនសង្ស័យរួមជាមួយវត្ថុតាង ត្រូវបានបញ្ជូនទៅកាន់សាលាដំបូងខេត្តដើម្បីចាត់ការបន្តតាមច្បាប់ ៕
