ករណីគ្រោះថ្នាក់ចរាចរណ៍រវាងរថយន្តដឹកប្រេង និងរថយន្តដឹកកម្មករ លេីកំណាត់ផ្លូវជាតិលេខ៤១ ក្នុងស្រុកគងពិសី បណ្ដាលឱ្យរងរបួសកម្មករ កម្មការិនី ជាច្រើននាក់

ភ្នំពេញ៖ នៅរសៀលថ្ងៃទី១២ ខែធ្នូ ឆ្នាំ២០២៣ ឯកឧត្តម វ៉ី សំណាង ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ស្ពឺ និងសហការី បានអញ្ជើញចុះសួរសុខទុក្ខកម្មករ កម្មការនី ដែលជួបគ្រោះថ្នាក់ចរាចរណ៌ស្ថិតនៅត្រង់ចំណុចភូមិម្កាក់ ឃុំស្នំក្រពើ ស្រុកគងពិសី ខេត្តកំពង់ស្ពឺ។

ហេតុការណ៍នេះបង្កឡើងរវាងរថយន្តដឹកប្រេងប៉ះជាមួយម៉ូតូ ០១គ្រឿង ហើយរេចង្កូតទៅបុករថយន្តដឹកកម្មករចំនួន ៤៥នាក់ ក្រោយកើតហេតុអ្នកបើកបររថយន្តដឹកប្រេងចុះរត់គេចខ្លួនបាត់ស្រមោល និងបណ្តាលអោយអ្នកជិះម៉ូតូស្លាប់នៅនិងកន្លែងកើតហេតុ កាលពីថ្ងៃទី១២ ខែធ្នូ ឆ្នាំ២០២៣ វេលាម៉ោងប្រមាណ ៥ៈ២៥នាទីព្រឹក។

បច្ចុប្បន្នកម្មករទាំងនេះកំពុងសម្រាកព្យាបាលនៅមន្ទីពេទ្យប្រតិបត្តិស្រុកគងពិសី ក្នុងស្រុកគងពិសី ខេត្តកំពង់ស្ពឺ។ ខណៈនោះប្រជាពលរដ្ឋដែលបានមកសម្រាកព្យាបាលជំងឺនៅក្នុងមន្ទីពេទ្យចំនួន ៦នាក់ក៏បានទទួលការឧបត្ថម្ភពីសាខាផងដែរ។

ឆ្លៀតក្នុងឱកាសនោះដែរ ឯកឧត្តមប្រធានគណៈកម្មាធិការសាខា ក៏បានផ្តាំផ្ញើសូមបងប្អូនទាំងអស់មេត្តាខិតខំថែរក្សាសុខភាពឲ្យបានល្អលេបថ្នាំឲ្យបានទៀងទាត់ ស្ដាប់តាមការណែនាំរបស់គ្រូពេទ្យ និងបានផ្តល់ជូនក្នុងម្នាក់ៗទទួលបានថវិកា ៥០,០០០រៀល និងអ្នកជំងឺទូទៅ ចំនួន ៦នាក់ ក្នុងម្នាក់ៗ ៥០,០០០រៀលផងដែរ ៕