លោកជំទាវ ពេជ ចន្ទមុន្នី៖ ការប្រកួតកីឡារាំជាការបំផុសស្មារតីមហាជនឱ្យកាន់តែស្រឡាញ់ និងគាំទ្រវិស័យកីឡា

ភ្នំពេញ៖ លោកជំទាវបណ្ឌិត ពេជ ចន្ទមុន្នី អគ្គស្នងការសមាគមកាយឬទ្ធិនារីកម្ពុជា បានមានប្រសាសន៍ថា ការប្រកួតកីឡារាំក៏ជាការបំផុសស្មារតី មហាជនឱ្យកាន់តែ ស្រឡាញ់ និងគាំទ្រវិស័យកីឡា ហើយក៏ជាការលើកកម្ពស់កិត្តិសព្ទកីឡារបស់ប្រទេសកម្ពុជាឱ្យកាន់តែល្បីល្បាញនៅលើឆាកអន្តរជាតិកម្ពុជាទៅដល់ទីណាគឺមាន ទង់ជាតិកម្ពុជាបង្ហាញឱ្យអន្តរជាតិបានស្គាល់ នៅទីនោះផងដែរ។

លោកជំទាវបណ្ឌិតមានប្រសាសន៍បែបនេះក្នុងពិធីបិទការប្រកួតកីឡារាំជ្រើសរើសជើងឯកថ្នាក់ជាតិប្រចាំឆ្នាំ២០២៣ ក្រោមពាក្យស្លោក កីឡានាំមកនូវសន្តិភាពនិងការអភិវឌ្ឍ នារសៀលថ្ងៃទី១១ខែធ្នូឆ្នាំ២០២៣។

លោកជំទាវបណ្ឌិត បានគូសបញ្ជាក់ថា ការប្រកួតកីឡារាំជ្រើសរើសជើងឯកថ្នាក់ជាតិ គឺជាព្រឹត្តិការណ៍មួយ ដែលដើរតួនាទីយ៉ាងសំខាន់ក្នុងការអភិវឌ្ឍវិស័យកីឡា និងផ្តល់អត្ថប្រយោជន៍ជាច្រើនដល់សង្គមដូចជា សេដ្ឋកិច្ច វប្បធម៌ ការលើកកម្ពស់មុខមាត់ជាតិ ទីផ្សារពាណិជ្ជកម្ម និងសុខភាព ជាដើម។

សូមជម្រាបថា ការប្រកួតកីឡារាំជ្រើសរើសជើងឯកថ្នាក់ជាតិប្រចាំឆ្នាំ ២០២៣ លើ២៣ ប្រភេទវិញ្ញាសា រួមមាន វិញ្ញាសា រាំគូ Latin Dance និងវិញ្ញាសា Standard Dance ដែលមានប្រតិភូ គ្រូបង្វឹក កីឡាករ កីឡាការិនី ចំនួន៥០នាក់ មកពីក្លឹបចំនួន៦ក្លឹប ក្នុងនោះមានក្លឹបមហាផ្ទៃ ក្លឹបកងទ័ពជើងទឹក ក្លឹបខេត្តកណ្តាលក្លឹបខេត្តកំពង់ចាម និងក្លឹប Joy School ៕