សាខាកាកបាទក្រហមកម្ពុជា ខេត្តកំពង់ចាម ប្រគល់ផ្ទះមនុស្សធម៌ទី១៨ ជូនជនមានពិការភាពទ័លលំបាក ១គ្រួសារ នៅស្រុកស្ទឹងត្រង់
ភ្នំពេញ៖ ឯកឧត្តម ស្រី សុភ័ក្រ លេខាធិការសាខា តំណាងដ៏ខ្ពង់ខ្ពស់ ឯកឧត្តម អ៊ុន ចាន់ដា ប្រធានគណៈកម្មាធិការសាខា រួមនិង ព្រះវត្តមានព្រះសីលសំវរ ព្រះនាគមុនី ប៊ត តាំងឆេង ព្រះមេគណខេត្ត ឯកឧត្តម លោក លោកស្រី សមាជិក សមាជិកាគណៈកម្មាធិការសាខា រួមជាមួយ ព្រះមន្ត្រីសង្ឃនៃសាលាគណខេត្ត សាលាអនុគណស្រុក និង អនុសាខាស្រុក នាថ្ងៃពុធ ទី៦ ខែធ្នូ ឆ្នាំ២០២៣ បាននិមន្ត និងអញ្ជើញចុះប្រគល់ផ្ទះបន្ទាប់ទី១៨ ជាកម្មវិធីផ្ទះមនុស្សធម៌ខេត្ត ក្រោមកិច្ច សហការ រវាងសាខាកាកបាទក្រហមកម្ពុជា ខេត្ត និង សាលាគណខេត្ត ជូន ពលរដ្ឋជាជនមានពិការភាពទ័លលំបាក ១គ្រួសារ ឈ្មោះ ស៊ាង ស៊ីថា អាយុ២៨ ឆ្នាំ រស់នៅភូមិព្រែកទក់ ឃុំខ្ពបតាងួន ស្រុកស្ទឹងត្រង់ ។
គួររំលឹកថា គ្រួសារអភ័ព្វនេះ ទាំងប្តី ទាំងប្រពន្ធ សុទ្ធតែជាជនមានពិការភាព ស្វិតជើងពីកំណើតដូចគ្នា មានកូនស្រី ២នាក់ក្នុងបន្ទុក ( អាយុ ១៨ និង ៦ឆ្នាំ) ។ ស៊ាង ស៊ីថា ជាប្តី ពិការស្វិតជើងឆ្វេង ហើយគមខ្នង ប្រកបរបររុញរ៉ឺម៉ក រើសអេតចាយ ជាមួយកូនស្រីទី ២ ដែលឆ្លៀតទំនេរពីការសិក្សា មកជួយការងារ ឪពុក គ្រាន់បានកម្រៃ ចិញ្ចឹមជីវិត។ ស្ត្រីជាប្រពន្ធ ឈ្មោះ ស៊ឹង អូន នៅចាំផ្ទះ ដោយសារ តែពិការស្វិតជើងទាំង ២ អង្គុយតែលើរទេះរុញ ហើយ មានជម្ងឺប្រចាំកាយថែមទៀត ។ កូនស្រីច្បង បង្ខំចិត្តឈប់រៀន ចេញទៅស៊ីឈ្នួលធ្វើការតាមផ្ទះ រកប្រាក់ចិញ្ចឹមឪពុកម្តាយ ។ សព្វថ្ងៃ រស់នៅពឹងអាស្រ័យ តែលើការជួយរបស់រាជរដ្ឋាភិបាលកម្ពុជា តាមរយៈ ប័ណ្ណសមធម៌ ក្រ ១ និងការជួយឧបត្ថម្ភពីអ្នកជិតខាង ប៉ុណ្ណោះ ។ ប្តី ប្រពន្ធ ជនមានពិការភាព រូបនេះ រស់នៅលើដីកេរ្តិ៍ ទំហំ ១០ម × ១៥ ម ក្នុងផ្ទះចាស់ទ្រុឌទ្រោម ដែលដំបូលនិងជញ្ជាំង បិទបាំងដោយសង្កសី ចាស់ៗ និង របាំងប្រដើសឬស្សី ដែលកន្លែងខ្លះធ្លុះធ្លាយ ពិបាកជ្រកពេលភ្លៀងខ្លាំងម្តងៗ ។ ទោះជាយ៉ាងណាក្តី ដោយសារជីវភាពក្រខ្សត់ពេក គ្រួសារនេះ ពុំមានលទ្ធភាព សង់ផ្ទះស្នាក់នៅ អោយសមរម្យ បានឡើយ ។
មើលឃើញពីស្ថានភាពលំបាកនេះ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានសម្រេចផ្តល់ជូនផ្ទះឈើខ្ពស់ផុតពីដី ប្រក់ស័ង្កសីភ្លីធំ (ទំហំ៤ម × ៦ម) ១ខ្នង តម្លៃប្រមាណ ១០,០០០,០០០ រៀល ជាថវិកាបដិភាគ របស់សាខា សាលាគណ អនុសាខាស្រុកសាលាអនុគណ ចៅអធិការវត្តទូទាំងស្រុកស្ទឹងត្រង់ និងសប្បុរសជន ជូនលោក ស៊ាង ស៊ីថា និង ក្រុមគ្រួសារ សម្រាប់ស្នាក់នៅ ជាកម្មសិទ្ធិ តទៅ។
ដើម្បីជួយសម្រាលជីវភាពរស់នៅ , សាខា បានផ្តល់សម្ភារ គ្រឿង ឧបភោគ បរិភោគ ជូនគ្រួសារ លោក ស៊ាង ស៊ីថា សម្រាប់សង្កត់ផ្ទះថ្មីនេះ រួមមាន អង្ករ ៥០គក្រ, ត្រីខ ២០កំប៉ុង, ទឹកត្រី ១២ដប ទឹកស៊ីអ៊ីវ ១២ដប, មី ២កេស, ឃីត ២សម្រាប់, អាវយឺត ១២ , សាប៊ូ ១៦ដុំ , សម្ភារផ្ទះបាយមួយចំនួន និង ថវិកា ២០០,០០០រៀល ។
ដោយឡែក លោកតា លោកយាយ ដែលចូលរួមជាសាក្សី ក្នុងពិធីប្រគល់-ទទួលផ្ទះថ្មីនេះ ចំនួន ១០នាក់ ក្នុងម្នាក់ៗ ទទួលបាន អង្ករ ត្រីខ ឃីត មី ទឹកត្រី ទឹកស៊ីអ៊ីវ និង អាវយឺត ព្រមទាំង ថវិកាចំនួន ២០,០០០ រៀល ផងដែរ ។
