ប្រតិភូកងទ័ពកម្ពុជា-វៀតណាម ពិភាក្សាពីការបន្ត រុករកជីកគាស់អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ពលីជីវិតនាសម័យសង្គ្រាម ក្នុងភូមិសាស្ត្រខេត្តបាត់ដំបង
ភ្នំពេញ៖ ឯកឧត្តម ធូ ភា អភិបាលរងខេត្តបាត់ដំបង និងឧត្តមសេនីយ៍ត្រី ហួម ខ្វែក មេបញ្ជាការ តំបន់ប្រតិបត្តិការសឹករង បាត់ដំបង នៅព្រឹកថ្ងៃទី២ ខែធ្នូ ឆ្នាំ២០២៣ បានជួបពិភាក្សាការងារជាមួយប្រតិភូបញ្ជាការដ្ឋានយោធភូមិភាគទី៧ នៃកងទ័ពប្រជាជនវៀតណាម ដឹកនាំដោយវរសេនីយ៍ឯក ថៃ ថាញ់ឌឹក អនុប្រធានស្នងការនយោបាយ យោធភូមិភាគទី៧ នៃកងទ័ពប្រជាជនវៀតណាម ដើម្បីប្រជុំពិភាក្សាការងារស្ដីពីការបន្តរុករកជីកគាស់អដ្ឋិធាតុកងទ័ពស្ម័គ្រចិត្ត និងជំនាញការវៀតណាម ដែលបានពលីជីវិតក្នុងសម័យសង្គ្រាមនៅប្រទេសកម្ពុជា ក្នុងភូមិសាស្ត្រខេត្តបាត់ដំបង ដើម្បីធ្វើមាតុភូមិនិវត្តន៍វិលត្រឡប់ទៅកាន់ប្រទេសវៀតណាមវិញ។
ឧត្តមសេនីយ៍ត្រី ហួម ខ្វែក បានធ្វើរបាយការណ៍ស្វាគមន៍ចំពោះវរសេនីយ៍ឯក ថៃ ថាញ់ឌឹក អនុប្រធានស្នងការនយោបាយ យោធភូមិភាគទី៧ នៃកងទ័ពប្រជាជនវៀតណាម និងប្រតិភូ អំពីលទ្ធផលនៃកិច្ចសហប្រតិបត្តិការជាមួយក្រុមបច្ចេកទេសជំនាញរុករកជីកគាស់អដ្ឋិធាតុកងទ័ពស្ម័គ្រចិត្ត និងជំនាញការវៀតណាម K៧៣ ដែលបានសហការធ្វើសកម្មភាព រុករកជីកគាស់ក្នុងរយៈពេលជាង២០ឆ្នាំកន្លងមកនេះ គិតពីឆ្នាំ២០០៣ រហូតដល់ឆ្នាំ២០២៣ នៅក្នុងភូមិសាស្ត្រខេត្តបាត់ដំបង ដោយជីកយកបាននិងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តវៀតណាមចំនួន ៤៤៣អដ្ឋិធាតុរួចមកហើយ។
លោកឧត្តមសេនីយ៍ត្រី មេបញ្ជាការ ក៏បានគូសបញ្ជាក់អំពីការលំបាក និងការងាយស្រួលក្នុងការស្រាវជ្រាវ និង រុករកជីកគាស់អដ្ឋិធាតុកងទ័ពស្ម័គ្រចិត្តវៀតណាម ក្នុងរយៈពេលកន្លងមកដោយភូមិសាស្ត្រមានការប្រែប្រួល សាក្សីដែលធ្លាប់ដឹងពីកន្លែងកប់សាកសពកងទ័ពស្ម័គ្រចិត្តវៀតណាម មានវ័យចាស់ និងបានទទួលមរណភាពជាបន្តបន្ទាប់ ហើយមួយចំនួនទៀតបានផ្លាស់ប្ដូរទីលំនៅ។
វរសេនីយ៍ឯក ថៃ ថាញ់ឌឹក អនុប្រធានស្នងការនយោបាយ យោធភូមិភាគទី៧ បានថ្លែងអំណរគុណដ៏ជ្រាលជ្រៅជាទីបំផុតចំពោះរាជរដ្ឋាភិបាលកម្ពុជា អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋកម្ពុជា ដែលបានសហការបង្កលក្ខណៈងាយស្រួលក្នុងសកម្មភាពមនុស្សធម៌ ដើម្បីក្រុមបច្ចេកទេសជំនាញK៧៣ រុករក ជីកគាស់ និងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តវៀតណាម ទៅកាន់ប្រទេសវៀតណាមវិញទទួលបានលទ្ធផលល្អប្រសើរ៕
