ព្រឹត្តិការណ៍ «ជិះកង់កម្សាន្តលក្ខណៈមហាជន» តាមបណ្តោយមាត់សមុទ្រ ឆ្នេរស្រី-ស ចម្ងាយ ៤,៥គីឡូម៉ែត្រ នឹងរៀបចំនៅខេត្តកែប ក្នុងពិធីបុណ្យសមុទ្រ ថ្ងៃទី

ភ្នំពេញ៖ ដើម្បីអបអរសាទរពិធីបុណ្យសមុទ្រលើកទី១០ ជុំទី៣ ឆ្នាំ២០២៣ ដែលប្រព្រឹត្តទៅក្នុងខេត្តកែប ក្រោមប្រធានបទ«ទាំងអស់គ្នាដើម្បីទេសចរណ៍» នៅថ្ងៃទី២ធ្នូ គណៈកម្មការអន្តរក្រសួង ដើម្បីរៀបចំពិធីបុណ្យសមុទ្រ នឹងរៀបចំព្រឹត្តិការណ៍ «ជិះកង់កម្សាន្តលក្ខណៈមហាជន» តាមបណ្តោយមាត់សមុទ្រ ឆ្នេរស្រី-ស សាលាខេត្តកែប ក្នុងរយៈចម្ងាយ៤,៥គីឡូម៉ែត្រ។

គណៈកម្មការអន្តរក្រសួង ដើម្បីរៀបចំពិធីបុណ្យសមុទ្រ បញ្ជាក់ថា «ព្រឹត្តិការណ៍ជិះកង់កម្សាន្តលក្ខណៈមហាជនរៀបចំឡើង វេលាម៉ោង៧:០០នាទីព្រឹក ដោយមានការចូលរួមពីមន្ត្រីរាជការ សិស្សានុសិស្ស ប្រជាពលរដ្ឋ ប្រមាណជាង២០០នាក់ ជួបជុំចេញដំណើរពីចំណុចខ្លោងទ្វារអបអរសាទរពិធីបុណ្យសមុទ្រនៅតំបន់ A (ផ្សារក្តាម) តាមបណ្តោយមាត់សមុទ្រឆ្នេរស្រី-ស សាលាខេត្តកែប ឆ្ពោះទៅបញ្ចប់នៅផែទេសចរណ៍កោះទន្សាយ ដែលមានរយៈចម្ងាយ៤,៥គីឡូម៉ែត្រ»។ ដូច្នេះសូមសាធារណជនដែលមានបំណងចង់ចូលរួមព្រឹត្តិការណ៍ជិះកង់កម្សាន្តលក្ខណៈមហាជននេះ ត្រូវត្រៀមកង់ផ្ទាល់ខ្លួនមកជួបជុំគ្នានៅកន្លែងចេញដំណើរដែលបានកំណត់នៅវេលាម៉ោង៦:៣០នាទីព្រឹកស្អែក។

ពិធីបុណ្យសមុទ្រលើកទី១០ ជុំទី៣នេះ នឹងរៀបចំឡើងចាប់ពីថ្ងៃទី១ ដល់ថ្ងៃទី៣ ខែធ្នូ ដើម្បីផ្សព្វផ្សាយសក្តានុពលទេសចរណ៍ខេត្តកែប ជំរុញកំណើនភ្ញៀវទេសចរ និងទាក់ទាញចំណាប់អារម្មណ៍អ្នកស្នេហាវិស័យកីឡា ទេសចរជាតិ និងអន្តរជាតិ ឱ្យមកទស្សនាខេត្តកែបកាន់តែច្រើនឡើង។ ពិធីនេះនឹងមានការអញ្ជើញចូលរួមប្រកាសបើកជាផ្លូវការដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នាថ្ងៃទី២។ ជាការកត់សម្គាល់ពិធីបុណ្យសមុទ្រឆ្នាំនេះ នឹងប្រព្រឹត្តទៅដោយមានកម្មវិធីជាច្រើនរួមមាន៖ ការសម្ដែងសិល្បៈ ការប្រគំតន្ត្រី ការប្រកួតប្រដាល់គុនខ្មែរ ការបាញ់កាំជ្រួចអបអរសាទរ មហោស្រពម្ហូបអាហារ និងភេសជ្ជៈ សួនបង្ហោះខ្លែង ទីតាំងបង្ហោះគោម កន្លែងតាំងផលិតផលទេសចរណ៍ និងគម្រោងអភិវឌ្ឍន៍ទេសចរណ៍តំបន់ឆ្នេរ ផលិតផលទូទៅ ព្រមទាំងសកម្មភាពកីឡានានាផងដែរ។

សូមរំលឹកថា ពិធីបុណ្យសមុទ្រប្រចាំឆ្នាំនៅកម្ពុជា ចាប់ផ្តើមធ្វើឡើងតាំងពីតំបន់ឆ្នេរសមុទ្រដ៏ស្រស់ស្អាតរបស់ព្រះរាជាណាចក្រកម្ពុជា ត្រូវបានបញ្ចូលជាសមាជិកពេញសិទ្ធិនៃក្លឹបឆ្នេរសមុទ្រស្រស់ស្អាតបំផុតលើសកលលោក ក្នុងអង្គមហាសន្និបាតលើកទី៧ កាលពីថ្ងៃទី២៦ ខែឧសភា ឆ្នាំ២០១១ នៅទីក្រុងតូបាកូតា នៃប្រទេសសេណេហ្គាល់។ ចាប់តាំងពីពេលនោះមក កម្ពុជាបានរៀបចំព្រឹត្តិការណ៍បុណ្យសមុទ្រជារៀងរាល់ឆ្នាំ ដែលធ្វើឡើងវិលជុំនៅតាមខេត្តបណ្តោយឆ្នេរសមុទ្រទាំង៤របស់ខ្លួន។ ដូច្នេះ បងប្អូនសាធារណជនរួមទាំងភ្ញៀវជាតិ និងភ្ញៀវអន្តរជាតិ អាចអញ្ជើញទៅចូលរួមទស្សនាដោយសេរី និងថែរក្សាបរិស្ថានទាំងអស់គ្នា៕