នាយករដ្ឋមន្ត្រី ហ៊ុន ម៉ាណែត៖ សន្តិសុខ និងឯករាជ្យនៃថាមពលអគ្គិសនី គឺជាទិសដៅរបស់រាជរដ្ឋាភិបាល ត្រូវតែពង្រឹង និងពង្រីក
ភ្នំពេញ៖ ក្នុងពិធី “បិទស្ទឹង បើកការដ្ឋានសាងសង់ទំនប់វារីអគ្គិសនី តាតៃលើ” ស្ថិតនៅក្នុងស្រុកថ្មបាំង ខេត្តកោះកុង នាថ្ងៃទី៣០ ខែវិច្ឆិកា ឆ្នាំ២០២៣ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា «សន្តិសុខថាមពលអគ្គិសនី ពិតជាសំខាន់ណាស់សម្រាប់ការអភិវឌ្ឍ និងប្រជាជន សន្តិសុខ និងឯករាជ្យនៃថាមពលអគ្គិសនី គឺជាទិសដៅរបស់រាជរដ្ឋាភិបាលត្រូវតែពង្រឹង និងពង្រីក»។
សម្ដេចធិបតី មានប្រសាសន៍ថា វិស័យអគ្គិសនី គឺជាវិស័យអាទិភាពមួយ ក្នុងចំណោមវិស័យអាទិភាព មានសន្តិភាព ទើបមានសមិទ្ធផលកើតឡើង បើគ្មានសុខសន្តិភាព ក៏គ្មានការអភិវឌ្ឍផ្នែកថាមពលអគ្គិសនីនោះដែរ។
សម្ដេចធិបតី គូសបញ្ជាក់ថា ការអភិវឌ្ឍថាមពលអគ្គិសនី និងការតបណ្តាញអគ្គិសនីជូនពលរដ្ឋនាពេលបច្ចុប្បន្ន គឺជាសមិទ្ធផលជាក់ស្តែង ហើយរាជរដ្ឋាភិបាលអភិវឌ្ឍន៍ ដោយការទទួលខុសត្រូវ គិតគូរពីផលប៉ះពាល់លើបរិស្ថាន។
គួរឲ្យដឹងផងដែរថា បច្ចុប្បន្នកម្ពុជាមានលទ្ធភាពផលិតថាមពលនៅក្នុងស្រុកបាន ៣,៤៦៤មេហ្កាវ៉ាត់ ដែលផលិតចេញពីថាមពលពន្លឺព្រះអាទិត្យ វារីអគ្គិសនី ជីវម៉ាស ធ្យូងថ្ម និងប្រេង ក្នុងនោះអគ្គិសនីបានពីថាមពលស្អាតមានប្រមាណ ៦០ភាគរយ៕
