ភ្នំពេញ៖ អ្នកឧកញ៉ា គិត ម៉េង ប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប និងជាប្រធានសភាពាណិជ្ជកម្មកម្ពុជា តាមរយៈបណ្ដាញសង្គមហ្វេសប៊ុក បានមានប្រសាសន៍ថា នៅក្នុងប្រទេសកម្ពុជា ព្រះរាជពិធីបុណ្យអុំទូកគួបផ្សំទំនៀមទម្លាប់ប្រពៃណីដ៏ល្អផូរផង់របស់ជាតិដែលមានអាយុកាលរាប់សតវត្ស ជាមួយនឹងទស្សនីយភាពសម័យទំនើប។
អ្នកឧកញ៉ាបន្តថា ព្រះរាជពិធីបុណ្យអុំទូកត្រូវបានប្រារព្ធឡើងដើម្បីសម្តែងមនោសញ្ចេតនាដឹងគុណចំពោះទន្លេមេគង្គ ដែលជានិមិត្តរូបនៃការបញ្ចប់វដ្តជីវិត។ ពិធីប្រណាំងទូកតាមបែបប្រពៃណីជាតិនាំមកនូវការជួបជុំគ្នាក្នុងសហគមន៍ បង្ហាញពីការធ្វើការងារជាក្រុម និងជំនាញដ៏អស្ចារ្យរបស់ប្រជាជនយើង អស់ជាច្រើនជំនាន់មកហើយ។
អ្នកឧកញ៉ា គិត ម៉េង បន្ថែមថា ទិដ្ឋភាពវប្បធម៌ដ៏មានអត្ថន័យមួយទៀតរបស់បុណ្យអុំទូក គឺពិធី «សំពះព្រះខែ»។ នេះជា ពិធីគោរពបូជាយ៉ាងជ្រាលជ្រៅរបស់ប្រជាជនកម្ពុជាចំពោះព្រះចន្ទ។ ពិធីជានិមិត្តរូបនេះមិនត្រឹមតែពង្រឹងស្មារតីថែរក្សាមរតករបស់យើងប៉ុណ្ណោះទេ ប៉ុន្តែ ថែមទាំងបង្ហាញក្តីសង្ឃឹមរបស់យើងចំពោះភោគផលដំណាំ និងការរួបរួមគ្នាផងដែរ។
អ្នកឧកញ៉ា បានឲ្យដឹងទៀតថា ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក រួមមានក្បួនដង្ហែយ៉ាងរស់រវើក ការប្រគំតន្ត្រី និងការបាញ់កាំជ្រួចដ៏ស្រស់ស្អាត និងទាក់ទាញ។ ប្រជាជនកម្ពុជាមកជួបជុំគ្នា ដើម្បីអបអរសាទរមរតករបស់ខ្លួន ដោយមានភាពរំភើបរីករាយនៅក្នុងសតវត្សទី២១។
ទន្ទឹមជាមួយគ្នានោះ អ្នកឧកញ៉ា គិត ម៉េង ក៏បានជូនពរឲ្យការធ្វើដំណើររបស់បងប្អូន មិត្តភក្តិទាំងអស់ទៅទីណាក៏ដោយ ប្រកបដោយសុវត្ថិភាព និងពោរពេញដោយភាពរីករាយក្នុងថ្ងៃឈប់សម្រាប់ក្នុងឱកាសព្រះរាជពិធីបុណ្យអុំទូកឆ្នាំនេះ៕
