មន្ត្រីជាន់ខ្ពស់ក្រសួងធនធានទឹក ជួបពិភាក្សាការងារជាមួយតំណាងជាន់ខ្ពស់ធនាគារវិនិយោគអឺរ៉ុប
ភ្នំពេញ៖ កាលពីថ្ងៃទី១៨ ខែវិច្ឆិកា ឆ្នាំ២០២៣ នៅសាលប្រជុំរំដួល នាទីស្តីការក្រសួង ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម អមដោយសហការីជាតិ និងអន្តរជាតិបានជួបពិភាក្សាការងារជាមួយឯកឧត្តម Francesco Consiglio តំណាងជាន់ខ្ពស់ធនាគារវិនិយោគអឺរ៉ុប(EIB) ដែលមានទីស្នាក់ការកណ្តាលនៅទីក្រុងព្រុចស៊ែល ប្រទេសប៊ែលហ្សិក។
ឯកឧត្តមរដ្ឋលេខាធិការបានឱ្យដឹងថា ជំនួបពិភាក្សានាពេលនេះផ្តោតលើការជំរុញកិច្ចសហប្រតិបត្តិការនានារវាងក្រសួងធនធានទឹក និងឧតុនិយម និងធនាគារវិនិយោគអឺរ៉ុប (EIB) ឱ្យបានកាន់តែខ្លាំងទ្វេឡើង៖
១) ជំរុញការបំពាក់ប្រព័ន្ធ Doppler Rada ឱ្យបានកាន់តែឆាប់បំផុតនៅក្នុងមន្ទីរធនធានទឹក និងឧតុនិយមខេត្តកំពង់ធំ ក្នុងភូមិសាស្រ្តក្រុងស្ទឹងសែនដែលជាកន្លែងល្អនិងមានសុវត្ថិភាពខ្ពស់បំផុតក្នុងការរក្សា និងផ្តល់ព័ត៌មាន។
២) ជំរុញការបំពាក់ឧបករណ៍បច្ចេកវិទ្យាទំនើបគ្រប់បែបយ៉ាងជាមួយនឹង Digital និង Remote Sensing រួមជាមួយការបង្កើតឡើងនូវប្រព័ន្ធរក្សាទុកគ្រប់ប្រភេទទិន្នន័យដែលផ្តល់ឱ្យដោយផ្កាយរណប និងការប្រមូលដោយឧបករណ៍ពីអាងទន្លេចំនួន ៥តំបន់ធំៗ ពីតំបន់អាងទន្លេរងចំនួន ៣៩កន្លែង និងពីអនុអាងទន្លេរងចំនួន ១៤២កន្លែង
៣) ជំរុញការផ្តល់ឱ្យបានច្រើនជាអតិបរមានូវជំនួយឥតសំណងពីសហគមន៍អឺរ៉ុបតាមរយៈ EIB ទៅតាមគោលនយោបាយយុទ្ធសាស្រ្តបំណុលរបស់ក្រសួងសេដ្ឋកិច្ច និងហិរញ្ញវត្ថុ
៤) ជំរុញកិច្ចខំប្រឹងប្រែងត្រីគុណភាពជាសហហិរញ្ញប្បទានរបស់ EIB ជាមួយធនាគារអភិវឌ្ឍន៍អាស៊ី (ADB) និងធនាគារវិនិយោគហេដ្ឋារចនាសម្ព័ន្ធអាស៊ី(AIIB) ធ្វើទំនើបកម្មលើក្រុមអាងទន្លេទីII ក្នុងតំបន់ប៉ូលសេដ្ឋកិច្ចទី៤ ក្នុងភូមិសាស្រ្តភាគពាយព្យនៃប្រទេសកម្ពុជាលើគម្រោងគ្រប់គ្រងធនធានទឹកចម្រុះ (IWRM)៕
