ភ្នំពេញ៖ បុរសម្នាក់បានរងរបួសធ្ងន់បន្ទាប់ពីរករឿងវាយប្រពន្ធ តែត្រូវប្រពន្ធយកកាំបិតកាប់វិញ ។ ហេតុការណ៍នេះ បានកើតឡើង នៅភូមិតាំងរបង ឃុំហោងសំណំ ស្រុកឱរ៉ាល់ ខេត្តកំពង់ស្ពឺ កាលពីវេលាម៉ោង ៨ យប់ ថ្ងៃទី ១៨ ខែវិច្ឆិកា ឆ្នាំ២០២៣ ។
ប្រភពពីសមត្ថកិច្ចមូលដ្ឋាន បានឲ្យដឹងថា ករណីអំពើហិង្សាក្នុងគ្រួសារមួយ បានកើតឡើង ដែលបង្ករដោយឈ្មោះ អ៊ី សុភ័ណ្ឌ ហៅ កំប៉្រុក ភេទស្រី អាយុ ៣៩ ឆ្នាំ រស់នៅភូមិ ឃុំ កើតហេតុ ត្រូវជាប្រពន្ធ បានធ្វើសកម្មភាព យកកាំបិតផ្គាក់ កាប់ទៅលើប្ដីរបស់ខ្លួនឈ្មោះ អោម ឈួន ភេទប្រុស អាយុ ៤៤ ឆ្នាំ បណ្ដាលឲ្យរងរបួស (ត្រូវមួយកាំបិត ចំស្មា ខាងឆ្វេង) ហើយត្រូវបានបញ្ជូន ទៅព្យាបាលនៅមន្ទីរពេទ្យបង្អែក ខេត្តកំពង់ស្ពឺ មូលហេតុ បណ្ដាលមកពីរឿងភ្លើងប្រច័ណ្ឌ ។
សមត្ថកិច្ចមូលដ្ឋាន បានបញ្ជាក់ឲ្យដឹងថា មុនពេលកើតហេតុ ប្រពន្ធ ឃើញប្ដី ថតរូប ជាមួយស្រីនី ដែលត្រូវជាក្មួយស្រី ជាទួតមួយរបស់ខ្លួន ស្របពេលនោះ ប្ដីបានមកឱប លួងលោមប្រពន្ធ (ជនសង្ស័យ) តែប្រពន្ធ មិនឲ្យឱប ក៏កើតចិត្តខឹង ហើយកើតមានអំពើ ហិង្សា។ ប្ដី (ជនរងគ្រោះ) វាយទៅលើប្រពន្ធ ។ ប្រពន្ធ ឃើញកាំបិត ផ្គាក់នៅក្បែរ ក៏រត់ទៅយកកាំបិត កាប់ទៅលើប្ដី ត្រូវមួយកាំបិត បណ្ដាលឲ្យរងរបួស តែម្ដង។
បច្ចុប្បន្ន សមត្ថកិច្ចបានឃាត់ខ្លួនជនសង្ស័យជាប្រពន្ធ និងដកហូតវត្ថុតាងខាងលើ យកមកអធិការដ្ឋាននគរបាលស្រុកឱរ៉ាល់ដើម្បីចាត់ការបន្តតាមនីតិវិធី៕
