សហជីព និងកម្មករ ថា របបសន្តិសុខសង្គមផ្នែកថែទាំសុខភាព សម្រាប់បុគ្គលស្វ័យនិយោជន៍ និង អ្នកក្នុងបន្ទុកសមាជិក ប.ស.ស ជួយសម្រាលបន្ទុកជីវភាពគ្រួសារ
ភ្នំពេញ៖ សហជីព និង កម្មករ សាទរចំពោះរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និង អ្នកក្នុងបន្ទុកសមាជិក ប.ស.ស. ព្រោះកម្មវិធីនេះជួយសម្រាលបន្ទុកជីវភាពគ្រួសារក្នុងការថែទាំសុខភាព ក្រោយពីរាជរដ្ឋាភិបាលប្រកាសដាក់ឲ្យអនុវត្តជាផ្លូវការកាលពីថ្ងៃទី ១៤ ខែ វិច្ឆិកា ឆ្នាំ២០២៣។
ការលើកឡើងរបស់សហជីព និង កម្មករ យ៉ាងដូច្នេះ បន្ទាប់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានគូសបញ្ជាក់កាលពីពេលថ្មីៗនេះថា តាមការសិក្សាកន្លងមក បងប្អូនកម្មករនិយោជិត ឬបងប្អូនប្រជាពលរដ្ឋម្នាក់ជាមធ្យម ត្រូវចំណាយ ២៥០ដុល្លារ ក្នុងមួយឆ្នាំ ឬចន្លោះពី ១៥ដុល្លារ ទៅ២០ដុល្លារ ក្នុងមួយខែ ក្នុងករណីដែលមិនមានរបបថែទាំសុខភាពនេះ ជាហេតុធ្វើឲ្យបងប្អូនកម្មករនិយោជិក ឬប្រជាពលរដ្ឋមួយចំនួនធំ មិនសូវហ៊ានទៅពិគ្រោះជាមួយគ្រូពេទ្យញឹកញាប់ រហូតជួនកាលបណ្ដាយឲ្យខ្លួនឈឺ ដល់ដំណាក់កាលធ្ងន់ធ្ងរពិបាកក្នុងការជួយឱ្យទាន់ពេលវេលា។
ជាមួយគ្នានេះ លោក គឹម ចាន់សំណាង ប្រធានសហភាពសិទិ្ធកម្មករកម្ពុជាបានលើកឡើងថាការអនុវត្តរបបសន្តិសុខសង្គមនេះគឺជាការបង្ហាញការយកចិត្តទុកដាក់ពីសំណាក់រាជរដ្ឋាភិបាលបន្ថែមទៀតចំពោះសុខុមាលភាពប្រជាពលរដ្ឋ ព្រមទាំង ជួយកាត់បន្ថយការចំណាយបន្ទុកក្នុងគ្រួសារ។
លោកបានលើកឡើងថា៖ « របបសន្តិសុខសង្គមនេះធ្វើឲ្យបុគ្គលស្វ័យនិយោជន៍ និង អ្នកក្នុងបន្ទុកសមាជិក
ប.ស.ស. គឺទទួលបានផលប្រយោជន៍ដូចៗគ្នា។ ដោយគ្រាន់ តែបង់ភាគទាន ១ ៥៦០០រៀល តែប៉ុណ្ណោះ ទទួលសេវាថែទាំព្យាបាលជំងឺដូចបងប្អូនកម្មករ-កម្មការិនីដែរ។
ចំណែកកម្មការិនីរោងចក្រម្នាក់ឈ្មោះ ហាន មុំ បានលើកឡើងថា លោកស្រីសប្បាយចិត្តនៅពេលមានរបបសន្តិសុខសង្គមផ្នែកថែទាំសុខភាពនេះ ព្រោះលោកស្រីមានគ្រួសារជាអ្នករត់ម៉ូតូឌុប ហើយលោកស្រីចង់ឲ្យគ្រួសារមានប័ណ្ណ ប.ស.ស. ដែរដើម្បីថែទាំសុខភាពដូចគ្នា។
កម្មការិនីរូបនេះនិយាយថា៖ « ខ្ញុំជាកម្មការិនីរោងចក្រ មានប័ណ្ណ ប.ស.ស. រួចហើយ តែគ្រួសារខ្ញុំជាអ្នករត់ម៉ូតូឌុប គាត់ចង់បានប័ណ្ណ ប.ស.ស. ដែរ ។ ខ្ញុំសប្បាយចិត្តពេលលឺមានកម្មវិធីនេះ ព្រោះប័ណ្ណ
ប.ស.ស. មានសារៈសំខាន់ណាស់ ដោយសារកន្លងមក ពេលឈឺល្មមៗអត់ហ៊ានទៅពេទ្យទេដោយជីវភាពខ្វះខាត»។
កម្មការិនីរូបនេះនិយាយបន្ថែមថា ការព្យាបាលនៅមន្ទីរពេទ្យម្តងៗ លោកស្រីត្រូវចំណាយអស់ប្រហែល ១០ ទៅ ២០ម៉ឺន តែនៅពេលមានប័ណ្ណ ប.ស.ស. គឺជួយសម្រាលចំណាយរបស់លោកស្រីច្រើនណាស់។
កម្មការិនីរូបនេះនិយាយថា៖ « ខ្ញុំចង់ឃើញ សមាជិកផ្ទះខ្ញុំមានប័ណ្ណប.ស.ស. ដូចៗគ្នា ព្រោះពេលមានប័ណ្ណ
ប.ស.ស. អត់សូវភ័យរឿងពេលឈឺ ដោយសារអត់មានថវិកាព្យាបាល ។ ខ្ញុំសូមអរគុណរាជរដ្ឋាភិបាលដែលបង្កើតឲ្យមានកម្មវិធីនេះជួយប្រជាពលរដ្ឋ»។
សូមជម្រាបថា កាលពីថ្ងៃទី ១៤ ខែ វិច្ឆិកា ឆ្នាំ ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃ កម្ពុជា បានប្រកាសដាក់ឲ្យអនុវត្តជាផ្លូវការ «របបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និង អ្នកក្នុងបន្ទុកសមាជិក ប.ស.ស.» និង « កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ»។
យោងតាមរបាយការណ៍របស់ក្រសួងការងារ និង បណ្តុះបណ្តាលវិជ្ជាជីវៈបានឲ្យដឹងថា តាមរយៈកម្មវិធីនេះ បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. រួមមានប្តី ឬ ប្រពន្ឋ និងកូនក្នុងបន្ទុកអាចទទួលបានរបបសន្តិសុខសង្គមផ្នែកថែទាំសុខភាព ដោយគ្រាន់តែបង់ភាគទានត្រឹមតែ ១៥ ៦០០ រៀលគឺបងប្អូនអាចទទួលបានសេវាព្យាបាលនិងថែទាំវេជ្ជសាស្រ្តនៅគ្រប់ពេទ្យដែលជាដៃគូរបស់ ប.ស.ស. បន្ថែមពីលើមន្ទីរពេទ្យរដ្ឋ។បន្ថែមពីនេះសម្រាប់បុគ្គលស្វ័យនិយោជន៍ជាស្រ្តីដែលបង់ភាគទានបាន ៩ខែ ក្នុង អំឡុង ១២ខែ នឹងទទួលបានប្រាក់បំណាច់លំហែមាតុភាពនៅពេលសម្រាលកូន , និងវិភាជន៍ប្រាក់បូជាសពនៅពេលទទួលមរណភាព។
របាយការណ៍របស់ក្រសួងការងារ និង បណ្តុះបណ្តាលវិជ្ជាជីវៈបានបញ្ជាក់ទៀតថា ការពង្រីកវិសាលភាពរបបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្តនេះនឹងគ្របដណ្តប់ដល់បុគ្គលស្វ័យនិយោជន៍ និងអ្នកក្នុងបន្ទុកសមាជិកប.ស.ស. ប្រមាណជាង ៣លាននាក់បន្ថែមដែលនឹងធ្វើឱ្យរបបសន្តិសុខសង្គមផ្នែកថែទាំសុខភាព នឹងគ្របដណ្តប់ប្រជាជនសរុបប្រមាណជាង៥លាននាក់ ៕
