មន្ត្រីជាន់ខ្ពស់ក្រសួងធនធានទឹក៖ គម្រោងកែលម្អសន្តិសុខទឹកកម្ពុជានឹងចូលរួមចំណែក ក្នុងការធានាបាននូវធនធានទឹកគ្រប់គ្រាន់សម្រាប់ការប្រើប្រាស់អន្តរវិស័យ
ភ្នំពេញ៖ នាព្រឹកថ្ងៃព្រហស្បតិ៍ ៤កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី១៦ ខែវិច្ឆិកា ឆ្នាំ២០២៣ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ ក្រសួងធនធានទឹក និងឧតុនិយម និងជានាយកអង្គភាពគ្រប់គ្រងគម្រោងកែលម្អសន្តិសុខទឹកកម្ពុជា ដែលទទួលហិរញ្ញប្បទានពីធនាគារពិភពលោក តំណាងដ៏ខ្ពង់ខ្ពស់ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញជាអធិបតីក្នុងពិធីបើកសិក្ខាសាលាពិគ្រោះយោបល់លើរបាយការណ៍ការការពារបរិស្ថាន និងសង្គមនៃគម្រោងកែលម្អសន្តិសុខទឹកកម្ពុជា(CaWSIP) ក្រោមហិរញ្ញប្បទានពីធនាគារពិភពលោក នៅសណ្ឋាគារបៃតង រាជធានីភ្នំពេញ។
សូមជម្រាបថា សិក្ខាសាលាពិគ្រោះយោបល់នេះ មានការចូលរួមពីឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងក្រសួង ស្ថាប័នពាក់ព័ន្ធនានារបស់រាជរដ្ឋាភិបាល ធនាគារពិភពលោក អង្គការមិនមែនរដ្ឋាភិបាល ក្រុមហ៊ុនទីប្រឹក្សា Mekong Water Solution (MWS) មន្ទីរធនធានទឹក និងឧតុនិយមខេត្តក្រចេះ និងមណ្ឌលគិរី និងមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ និងមណ្ឌលគិរី សរុបប្រមាណ ៦៤នាក់។
ថ្លែងក្នុងឱកាសបើកសិក្ខាសាលា ឯកឧត្តមរដ្ឋលេខាធិការប្រចាំការ បានសម្តែងនូវការស្វាគមន៍ចំពោះវត្តមានឯកឧត្តម លោកជំទាវ លោក លោកស្រី តំណាងក្រសួង-ស្ថាប័នពាក់ព័ន្ធ និងក្រុមហ៊ុនទីប្រឹក្សា MWS ដែលបានចូលរួមសម្របសម្រួល និងធ្វើជាវាគ្មិនចែករំលែកនូវបទពិសោធន៍ដល់អង្គសិក្ខាសាលាដ៏មានសារសំខាន់នេះ។
ឯកឧត្តមរដ្ឋលេខាធិការប្រចាំការ បានជម្រាបជូនអង្គពិធីពីគោលនយោបាយរបស់រាជរដ្ឋាភិបាលនីតិកាលទី៧ នៃរដ្ឋសភា ដែលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ព្រមទាំងបានកំណត់យកអាទិភាពគន្លឹះចំនួន៥គឺ មនុស្យ ផ្លូវ ទឹក ភ្លើង និងបច្ចេកវិទ្យា។
ឯកឧត្តមរដ្ឋលេខាធិការប្រចាំការបញ្ជាក់ថា គម្រោងកែលម្អសន្តិសុខទឹកកម្ពុជានឹងចូលរួមចំណែកយ៉ាងសំខាន់ ក្នុងការធានាបាននូវធនធានទឹកគ្រប់គ្រាន់សម្រាប់ការប្រើប្រាស់អន្តរវិស័យ រួមមាន វិស័យកសិកម្ម ឧស្សាហកម្ម តម្រូវការបរិស្ថាន និងការប្រើប្រាស់ប្រចាំថ្ងៃរបស់បងប្អូនប្រជាពលរដ្ឋ ដែលជាមូលដ្ឋានគ្រឹះសម្រាប់ចូលរួមចំណែកអភិវឌ្ឍប្រទេសកម្ពុជានៅក្នុងពេលបច្ចុប្បន្ន និងទៅអនាគត។
ឆ្លៀតក្នុងឱកាសនេះដែរ ឯកឧត្តមរដ្ឋលេខាធិការប្រចាំការបានស្នើដល់អង្គសិក្ខាសាលាឱ្យយកចិត្តទុកដាក់ស្តាប់នូវបទបង្ហាញ ការចែករំលែកបទពិសោធន៍ ការចូលរួមផ្លាស់ប្តូរមតិយោបល់ រួមចំណែកជួយលើកកម្ពស់ការការពារបរិស្ថាន និងសង្គម ដើម្បីអាចបញ្ចៀស ឬកាត់បន្ថយហានិភ័យបរិស្ថាន និងសង្គម ដែលអាចកើតមានឡើងជាយថាហេតុមកត្រឹមកម្រិតអប្បបរមា ព្រមទាំងផ្តល់នូវធាតុចូលបន្ថែមធ្វើឱ្យឯកសារចុងក្រោយសម្រេចបានជោគជ័យ គ្រប់ជ្រុងជ្រោយ និងមានប្រសិទ្ធភាពក្នុងការអនុវត្តគម្រោងកែលម្អសន្តិសុខទឹកនៅកម្ពុជា ដើម្បីអាចរួមចំណែកបន្ថែមដល់ការជំរុញកំណើននៃការអភិវឌ្ឍសេដ្ឋកិច្ចកម្ពុជាឱ្យមានសន្ទុះឈានឡើងប្រកបដោយចីរភាព។
ជាចុងក្រោយ ឯកឧត្តមរដ្ឋលេខាធិការប្រចាំការ បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារគ្រប់គ្រង និងអនុវត្តគម្រោងកែលម្អសន្តិសុខទឹកនៅកម្ពុជា ដែលបានសហការជាមួយក្រុមហ៊ុនទីប្រឹក្សា MWS និងអ្នកពាក់ព័ន្ធទាំងអស់ ចូលរួមនិងរៀបចំឱ្យមានសិក្ខាសាលាពិគ្រោះយោបល់នេះឡើង ព្រមទាំងសម្រេចបាននូវផ្លែផ្កាគួរជាទីមោទន:ផងដែរ។
សូមបញ្ជាក់ថា សិក្ខាសាលានេះមានគោលបំណងពិគ្រោះយោបល់ ពិភាក្សា និងប្រមូលនូវធាតុចូលបន្ថែមលើរបាយការណ៍ការការពារបរិស្ថាន និងសង្គម ដែលបានអនុវត្តជំហានដំបូងលើអនុគម្រោងចំនួន៣គឺ អនុគម្រោងស្វាយជ្រុំ និងអនុគម្រោងកន្ទួត ស្ថិតក្នុងខេត្តក្រចេះ និងអនុគម្រោងស្រែហ៊ុយ ស្ថិតក្នុងខេត្តមណ្ឌលគិរី ៕
