នាយករដ្ឋមន្ត្រី ហ៊ុន ម៉ាណែត៖ រាជរដ្ឋាភិបាល បានប្ដេជ្ញាចិត្ត ក្នុងការគិតគូរដល់កូនចៅជំនាន់ក្រោយឱ្យមានទាំងសុខភាព ចំណេះដឹង និងជំនាញ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា រាជរដ្ឋាភិបាល បានប្ដេជ្ញាចិត្ត ក្នុងការគិតគូរដល់កូនចៅជំនាន់ក្រោយឱ្យមានទាំងសុខភាព ចំណេះដឹង និងជំនាញ តាមរយៈការដាក់ឱ្យអនុវត្ដន៍កម្មវិធីនយោបាយចំនួន ២ ក្នុងវិស័យការងារ ដើម្បីជួយប្រជាពលរដ្ឋចំនួន ៩លាននាក់ ឱ្យទទួលបានអត្ថប្រយោជន៍។

សម្តេចធិបតី ហ៊ុន ម៉ាណែត បានថ្លែងបែបនេះក្នុងឱកាសដែលសម្តេច បានអញ្ជើញប្រកាសឱ្យអនុវត្តជាផ្លូវការ “កម្មវិធីរបបសន្តិសុខសង្គម ផ្នែកថែទាំសុខភាពតាមរបបភាគទាន ដោយស្ម័គ្រចិត្ត”​ និង “កម្មវិធីបណ្តុះបណ្តាល ជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងងាយរងហានិភ័យ” នាព្រឹកថ្ងៃទី១៤ ខែវិច្ឆិកា ឆ្នាំ២០២៣ នៅសណ្ឋាគារសុខា រាជធានីភ្នំពេញ។

សម្តេចធិបតី ហ៊ុន ម៉ាណែត មានប្រសាសន៍បន្តថា របបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និងអ្នកនៅក្នុងបន្ទុកសមាជិក បេឡាជាតិរបបសន្តិសុខសង្គម បានទៅពង្រីកប្រព័ន្ធធានារ៉ាប់រងសុខភាពឱ្យកាន់តែទូលំទូលាយ ដើម្បីឈានទៅសម្រេចបាននូវការគ្របដណ្ដប់ការថែទាំសុខភាពជាសកល ពោលគឺគ្មានពលរដ្ឋណាម្នាក់ពុំទទួលបានការថែទាំសុខភាពនោះទេ។ ដោយឡែក បន្ថែមពីលើការថែទាំសុខភាព កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ គឺជាកាផ្ដល់ទាំងចំណេះដឹង និងជំនាញដល់យុវជនជាង១លាន៥សែននាក់។

ទន្ទឹមនឹងនេះ សម្តេចធិបតី បានបញ្ជាក់ថា ការដាក់ចេញ និងអនុវត្ដន៍ជំនាញបច្ចេកទេស ដល់ប្រជាពលរដ្ឋក្រីក្រ និងរងហានិភ័យ គឺជាយុទ្ធសាស្រ្ដរបស់រាជរដ្ឋាភិបាល ដើម្បីធានាឱ្យយុវជនអាចមានការងារធ្វើ និងក្លាយជាចលករចូលរួមអភិវឌ្ឍន៍ប្រទេសជាតិ ៕