សម្តេចធិបតី៖ នៅខេត្តព្រះសីហនុ និងគ្រប់កន្លែងទាំងអស់ ពិសេសគោលដៅជាតំបន់ទេសចរណ៍ និងតំបន់ឧស្សាហកម្ម គឺត្រូវធានាបាននូវសន្តិសុខសណ្ដាប់ធ្នាប់

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ការពង្រឹងការងារសន្តិសុខសណ្តាប់ធ្នាប់ សំខាន់ណាស់នៅខេត្តព្រះសីហនុ និងគ្រប់កន្លែងទាំងអស់ ជាពិសេសគោលដៅដែលជាតំបន់ទេសចរណ៍ និងតំបន់ឧស្សាហកម្ម គឺត្រូវធានាបាននូវសន្តិសុខ។

ក្នុងឱកាសអញ្ជើញជួបសំណេះសំណាល ជាមួយកម្មករជាង ១ម៉ឺន ៥ពាន់នាក់ នៅខេត្តព្រះសីហនុ នាថ្ងៃទី៧ ខែវិច្ឆិកា សម្តេចធិបតីបញ្ជាក់ថា «ការពង្រឹងការងារសន្តិសុខសណ្តាប់ធ្នាប់ សំខាន់ណាស់នៅខេត្តព្រះសីហនុ និងគ្រប់កន្លែងទាំងអស់ ជាពិសេសគោលដៅដែលជាតំបន់ទេសចរណ៍ និងតំបន់ឧស្សាហកម្ម គឺត្រូវធានាបាននូវសន្តិសុខ។ អត់មានអ្នកណាចង់មកលេងសមុទ្រទេ បើមកគេប្រាប់ឱ្យប្រយ័ត្នគេបាញ់គ្នា ឱ្យប្រយ័ត្នចោលឆក់ ចោលប្លន់ ។ សន្តិសុខត្រូវធានាជូនប្រជាពលរដ្ឋ មិនថាបរទេស ទេសចរក្នុងស្រុក រឿងកិច្ចការសន្តិសុខនេះត្រូវពង្រឹង អាជ្ញាធរគ្រប់ជាន់ថ្នាក់ កម្លាំងសមត្ថកិច្ច ស្នងការ មេបញ្ជាការកងរាជអាវុធហត្ថខេត្ត រួមជាមួយសមត្ថកិច្ចកងកម្លាំងប្រដាប់អាវុធគ្រប់ប្រភេទ បំពេញភារកិច្ចរក្សាសន្តិសុខ ស្ថេរភាពបម្រើប្រជាពលរដ្ឋ»។

សម្តេចបន្ថែមថា ការបង្កើតការហោះហើរត្រង់មកកាន់ខេត្តព្រះសីហនុ ក៏សំខាន់ដែរ ធ្វើយ៉ាងម៉េចបើកមុខព្រួញហោះហើរឱ្យបានច្រើន យើងភ្ជាន់ខេត្តព្រះសីហនុ ជាមួយទិសដៅទេសចរណ៍ឱ្យបានច្រើន ដើម្បីទាញទេសចរណ៍មកកាន់ទីនេះ ។

សម្តេចធិបតី ហ៊ុន ម៉ាណែត បានថ្លែងទៀតថា ភូមិសាស្ត្រក្នុងខេត្តព្រះសីហនុ ពិតជាមានសក្តានុពលខ្លាំងណាស់ សម្រាប់ជំរុញកំណើនសេដ្ឋកិច្ច ប្រៀបដូចជាគ្រាប់ពេជ្រ តែត្រូវមានការកែច្នៃ ដើម្បីទទួលបានជាប្រយោជន៍ ហើយដើម្បីមានឱកាសកែច្នៃគ្រាប់ពេជ្រ ឱ្យបានជាប្រយោជន៍ ត្រូវទាមទារចាំបាច់ នូវសុខសន្តិភាព សម្តេចថា នៅខេត្តព្រះសីហនុ រាជរដ្ឋាភិបាលមិនមែនជំរុញឱ្យមានតែការផលិតផលិតវាយភណ្ឌ កាត់ដេរនោះទេ គឺដាក់ទិសដៅជំរុញឧស្សាហកម្មកម្រិតខ្ពស់ ដូចជាឧស្សាហកម្មយានយន្ត និងអេឡិចត្រូនិចផងដែរ៕