ភ្នំពេញ៖ អនុប្រធានមន្ទីរទេសចរណ៍ខេត្តបាត់ដំបង លោក ហម អរុណ បានថ្លែងឱ្យដឹងថា ក្នុងពិធីបុណ្យអុំទូក និងបណ្ដែតប្រទីបដែលធ្វើឡើងនៅតាមបណ្ដោយដងស្ទឹងសង្កែក្នុងក្រុងបាត់ដំបងរយៈពេល២ថ្ងៃចាប់ពីថ្ងៃទី២៨-២៩ ខែតុលា ឆ្នាំ២០២៣បានបញ្ចប់ទៅដោយជោគជ័យ និងទាក់ទាញអ្នកចូលរួមបានយ៉ាងច្រើនកុះកររហូតដល់ជាង១លាននាក់។
លោក ហម អរុណ បញ្ជាក់ថា កំណើនភ្ញៀវទេសចរដ៏ច្រើនសន្ធឹកសន្ធាប់មកចូលរួមទស្សនាកម្សាន្តសប្បាយក្នុងព្រឹត្តិការណ៍ពិធីបុណ្យអុំទូកឆ្នាំនេះដោយសារការរៀបចំបានយ៉ាងល្អរបស់រដ្ឋបាលខេត្តដោយផ្ដោតការយកចិត្តទុកដាក់ខ្ពស់លើកត្តាសន្តិសុខសណ្ដាប់ធ្នាប់ អនាម័យបរិស្ថាន ជាពិសេសសមិទ្ធផលបង្កើតឡើងថ្មីៗនៅកណ្ដាលក្រុងបាត់ដំបងមានដូចជាសំណង់វិមានឯករាជ្យ សួនច្បារប្រណីតៗមានទម្រង់ជា Smart Gardenនៅមាត់ស្ទឹងសង្កែដ៏ទាក់ទាញមិនធ្លាប់មាន។
ជាមួយគ្នានោះ ប្រជាពលរដ្ឋ បានបង្ហាញការកត់សម្គាល់ថា ពិធីបុណ្យអុំទូកឆ្នាំនេះរៀបចំបានយ៉ាងល្អមានភាពទាក់ទាញខ្លាំងមែនទែនដែលអន្ទងចិត្តមនុស្សម្នាមកពីគ្រប់ទិសទីឱ្យមកទស្សនាកម្សាន្ត។ប្រជាពលរដ្ឋសំណូមពរដល់រដ្ឋបាលខេត្តបាត់ដំបងរៀបចំពិធីបុណ្យអុំទូកឱ្យបានរៀងៗរាល់ឆ្នាំ៕
