សម្តេចធិបតី៖ យន្តការដោះស្រាយវិវាទក្រៅប្រព័ន្ធតុលាការ មានអនុភាពអនុវត្ត ដូចសាលក្រមស្ថាពររបស់តុលាការ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា យន្តការដោះស្រាយវិវាទក្រៅប្រព័ន្ធតុលាការ នឹងចូលរួមជួយកាត់បន្ថយ ការកកស្ទះសំណុំរឿង នៅតុលាការ ដោយកំណត់ហេតុព្រមព្រៀងបញ្ចប់វិវាទ របស់អាជ្ញាធរនេះ មានអនុភាពអនុវត្តដូចសាលក្រមស្ថាពររបស់តុលាការដែរ ។
ក្នុងឱកាសអញ្ជើញជាអធិបតីភាព សម្ពោធអគាររដ្ឋបាលថ្មី និងសមិទ្ធផលនៅខេត្តកំពង់ស្ពឺ និងប្រកាសជាខេត្តអស់មីន នាថ្ងៃទី៣០ ខែតុលា សម្តេចធិបតី ហ៊ុន ម៉ាណែត បានមានប្រសាសន៍ថា ផលប្រយោជន៍នៃការបង្កើតអាជ្ញាធរដោះស្រាយវិវាទក្រៅប្រព័ន្ធតុលាការនេះ គឺដោះស្រាយវិវាទរដ្ឋប្បវេណី វិវាទពាណិជ្ជកម្ម និងវិវាទដទៃទៀត តាមរយៈការសម្របសម្រួល ផ្សះផ្សា ដោយផ្អែកទៅលើកិច្ចព្រមព្រៀងរវាងភាគីពាក់ព័ន្ធ និងតាមការស្នើសុំរបស់ភាគីវិវាទ ដែលភាគីវិវាទយល់ព្រមទទួលយកយន្តការសម្របសម្រួល ផ្សះផ្សា។ សម្ដេចថា ការបង្កើតយន្តការនេះ មិនមែនយន្តការបង្ខំបងប្អូនប្រជាពលរដ្ឋឱ្យទៅទទួលសេវាទេ គឺអាចមានជម្រើសដែលមានស្រាប់ ទៅតុលាការ រកចាស់ទុំ ឬនរណាឱ្យជួយដោះស្រាយ ឬមួយពឹងផ្អែកទៅលើអាជ្ញាធរថ្មីនេះ ។
សម្តេចធិបតីបញ្ជាក់ថា «អ្វីដែលលក្ខណៈពិសេសយន្តការដោះស្រាយវិវាទក្រៅប្រព័ន្ធតុលាការនេះ គឺជួយរួមចំណែកកាត់បន្ថយការកកស្ទះសំណុំរឿង នៅតាមតុលាការ ព្រោះទំនាស់ដែលដោះស្រាយរួចហើយ ក្នុងក្របខណ្ឌអាជ្ញាធរថ្មីនេះ ត្រូវចាត់ទុកថាដោះស្រាយរួចរាល់ជាស្ថាពរ ដោយមិនបាច់ប្តឹងទៅតុលាការ ដោយកំណត់ហេតុព្រមព្រៀងបញ្ចប់វិវាទ របស់អាជ្ញាធរនេះ មានអនុភាព អនុវត្តដូចសាលក្រមស្ថាពររបស់តុលាការដែរ»។
សម្តេច ក៏បានណែនាំឱ្យអាជ្ញាធរពាក់ព័ន្ធ ផ្សព្វផ្សាយដល់ប្រជាពលរដ្ឋ ឱ្យបានយល់ច្បាស់ ពីយន្តការដោះស្រាយវិវាទក្រៅប្រព័ន្ធតុលាការនេះ ដើម្បីឱ្យពួកគាត់ទទួលបានប្រយោជន៍ ៕
