សម្តេចធិបតី ហ៊ុន ម៉ាណែត៖ ជាង ២ខែមកនេះ រាជរដ្ឋាភិបាលនីតិកាលទី៧ សម្រេចបាន វឌ្ឍនភាពយ៉ាងល្អប្រសើរ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា រយៈពេលជាង ២ខែកន្លងមកនេះ រាជរដ្ឋាភិបាល នីតិកាលទី៧ នៃរដ្ឋសភា បានសម្រេចវឌ្ឍនភាពយ៉ាងល្អប្រសើរ ជាពិសេស តាមរយៈការអនុវត្តយុទ្ធសាស្រ្តបញ្ចកោណដំណាក់កាលទី១ និងវិធានការគន្លឹះទាំង៥ដែល កំពុងទទួលបានការសាទរពីគ្រប់មជ្ឈដ្ឋានទាំងអស់។
ក្នុងឱកាសបើកកិច្ចប្រជុំពេញអង្គ គណៈរដ្ឋមន្ត្រី ដើម្បីពិភាក្សាឆ្លងរបៀបវារៈចំនួន៤ នាថ្ងៃទី២៧ តុលា សម្ដេចធិបតី ហ៊ុន ម៉ាណែត បានមានប្រសាសន៍ថា រាជរដ្ឋាភិបាលក៏កំពុងអនុវត្តការកែទម្រង់សំខាន់ៗជាច្រើនដែលជាការឆ្លើយតបទៅនឹងសេចក្ដីទុកចិត្តរបស់ប្រជាពលរដ្ឋចំពោះ រាជរដ្ឋាភិបាលក៏ដូចជាការត្រៀមខ្លួនទប់ទល់នឹងការវិវត្តថ្មីៗនៃនិន្នាការក្នុងតំបន់និងសកលដែលកាន់តែតានតឹងនិងពិបាកប៉ាន់ស្មាន។
សម្ដេចបន្ថែមថា ផ្អែកតាមស្មារតីនេះកិច្ចប្រជុំពេញអង្គគណៈរដ្ឋមន្ត្រីនៅថ្ងៃនេះនឹងពិភាក្សាទៅលើរបៀបវារៈសំខាន់ៗដែលឆ្លុះបញ្ចាំងអំពីវឌ្ឍនភាពការងារដែលសម្រេចបាននិងទិសដៅការងារបន្ត ក៏ដូចជាកិច្ចការចាំបាច់ដែលរាជរដ្ឋាភិបាលត្រូវធ្វើដើម្បីអភិវឌ្ឍរបៀបវារៈគោលនយោបាយអភិវឌ្ឍន៍សង្គម-សេដ្ឋកិច្ចកម្ពុជាឱ្យទទួលបានជោគជ័យនិងមានប្រសិទ្ធភាពខ្ពស់៕
