ឯកឧត្តម មាស គឹមហេង ទទួលជួបសម្តែងការគួរសម និងពិភាក្សាការងារជាមួយអគ្គទីប្រឹក្សាស្ថានទូតចិន ប្រចាំកម្ពុជា
ភ្នំពេញ៖ នៅថ្ងៃទី១១ ខែតុលា ឆ្នាំ២០២៣ ឯកឧត្តម មាស គឹមហេង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានទទួលជួបសម្តែងការគួរសម និងពិភាក្សាការងារជាមួយ លោក CHANG Jian អនុប្រធានបេសកកម្ម និង ជាអគ្គទីប្រឹក្សាស្ថានទូតចិន ប្រចាំកម្ពុជា នៅទីស្តីការក្រសួង។
លោកអគ្គទីប្រឹក្សាបានចូលរួមអបអរក្នុងឱកាសដែលឯកឧត្តមត្រូវបានតែងតាំងជាឧត្តមមន្ត្រីកម្ពុជាថ្មីសម្រាប់កិច្ចសហប្រតិបត្តិការមេគង្គ និងបានបញ្ជាក់ថា ភាគីចិននឹងត្រៀមលក្ខណៈជួយគាំទ្រលើគម្រោងនានារបស់កម្ពុជា ក្នុងក្របខណ្ឌមូលនិធិពិសេសមេគង្គ-ឡានឆាងសម្រាប់ឆ្នាំ២០២៤បន្តទៅទៀត។
ជាការឆ្លើយតប ឯកឧត្តមរដ្ឋលេខាធិការ បានកោតសរសើរចំពោះវឌ្ឍនភាពនៃកិច្ចសហប្រតិបត្តិការមេគង្គ-ឡានឆាងដែលមានដំណើរការល្អប្រសើរ ព្រមទាំងគូសបញ្ជាក់ពីជំហរគាំទ្ររបស់កម្ពុជាឡើងវិញចំពោះកិច្ចសហប្រតិបត្តិការនេះ។
ឯកឧត្តមរដ្ឋលេខាធិការ ក៏បានថ្លែងអំណរគុណយ៉ាងជ្រាលជ្រៅចំពោះភាគីចិន ដែលតែងតែផ្តល់ការគាំទ្រដល់គម្រោងរបស់កម្ពុជា ជាបន្តបន្ទាប់ ដែលគិតមកដល់បច្ចុប្បន្ន មានរហូតដល់ ៨៩ គម្រោងតាមវិស័យអាទិភាពនានារបស់កម្ពុជា ៕
