ឧត្តមសេនីយ៍ឯក ងួន ស្រេង អញ្ជើញជាអធិបតីក្នុងកិច្ចប្រជុំឆ្លងរបាយការណ៍ និងបិទកិច្ចសវនកម្មផ្ទៃក្នុងនៅស្នងការដ្ឋាននគរបាលខេត្តកំពង់ឆ្នាំង

ភ្នំពេញ៖ ឯកឧត្ដម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ នាព្រឹកថ្ងៃចន្ទ ទី០៩ ខែតុលា ឆ្នាំ២០២៣ បានអញ្ជើញជាអធិបតីក្នុងកិច្ចប្រជុំឆ្លងរបាយការណ៍ និងបិទកិច្ចសវនកម្មផ្ទៃក្នុងនៅស្នងការដ្ឋាននគរបាលខេត្តកំពង់ឆ្នាំង សម្រាប់ការិយបរិច្ឆេទ២០២២ និងបណ្តាឆ្នាំពាក់ព័ន្ធ ដោយមានការអញ្ជើញចូលរួមពីឯកឧត្ដម អគ្គនាយករង និងគណៈប្រតិភូសវនកម្មផ្ទៃក្នុង ព្រមទាំងលោកឧត្តមសេនីយ៍ទោ ស្នងការ ស្នងការរង នាយការិយាល័យ អធិការ នៃអធិការដ្ឋាននគរបាលក្រុង ស្រុក និងមន្ត្រីពាក់ព័ន្ធជាច្រើនរូបទៀត។

ឆ្លៀតក្នុងឱកាសនោះ ឯកឧត្តម ឧត្តមសេនីយ៍ឯក អគ្គនាយក បានមានប្រសាសន៍កោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់លោក លោកស្រី ថ្នាក់ដឹកនាំ និងមន្រ្តីពាក់ព័ន្ធក្រោមចំណុះស្នងការដ្ឋានខេត្ត។ ឯកឧត្តម បានបន្តទៀតថា បច្ចុប្បន្នក្រោមការដឹកនាំដ៏ខ្ពង់ខ្ពស់ និងប្រកបដោយគតិបណ្ឌិតរបស់ ឯកឧត្តមអភិសន្តិបណ្ឌិត ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បាននិងកំពុងកែទម្រង់លើការងារគ្រប់វិស័យទាំងអស់ ដែលស្ថិតនៅក្រោមដែនសមត្ថកិច្ចរបស់ក្រសួងមហាផ្ទៃ ដោយផ្តោតសំខាន់លើការគ្រប់គ្រងមន្រ្តីរាជការស៊ីវិល មន្រ្តីនគរបាលជាតិ និងមន្រ្តីពន្ធនាគារ។

ទន្ទឹមនឹងនោះ ឯកឧត្តម ឧត្តមសេនីយ៍ឯក អគ្គនាយក បានបូកសរុបការងារសវនកម្មនៅស្នងការដ្ឋាននគរបាលខេត្តកំពង់ឆ្នាំង និងផ្តល់អនុសាសន៍ដឹកនាំមួយចំនួន ដូចខាងក្រោម៖
-ត្រូវមានសាមគ្គីភាពផ្ទៃក្នុង ដើម្បីឈានសម្រេចបាននូវគោលដៅរបស់ស្នងការដ្ឋានប្រកបដោយប្រសិទ្ធភាព
-ត្រូវខិតខំអនុវត្តតាមអនុសាសន៍របស់គណៈប្រតិភូ ដើម្បីកែតម្រូវរាល់បញ្ហាប្រឈម និងហានិភ័យរបស់អង្គភាព នាការិយបរិច្ឆេទលើកក្រោយ
-រាល់ការអនុវត្តចំណូល ចំណាយថវិការដ្ឋ គឺត្រូវមានលិខិតស្នាម សក្ខីបត្រ និងឯកសារគាំទ្រផ្សេងៗ ដើម្បីជាកម្មវត្ថុនៃការត្រួតពិនិត្យរបស់អង្គភាពមានសមត្ថកិច្ច
-ថ្នាក់ដឹកនាំ និងមន្រ្តីក្រោមចំណុះ ត្រូវមានតម្លាភាព និងគណនេយ្យភាពចំពោះថ្នាក់លើ និងថ្នាក់ក្រោម ព្រមទាំងចូលរួមអនុវត្តច្បាប់ និងលិខិតបទដ្ឋានពាក់ព័ន្ធឲ្យមានប្រសិទ្ធភាព ៕