ប្រមុខរាជរដ្ឋាភិបាល៖ ប្រាក់ឈ្នួលសម្រាប់កម្មករ កម្មការិនី នៅក្នុងប្រទេសកម្ពុជា មានអត្រាខ្ពស់ជាងបណ្ដាប្រទេសមួយចំនួន ក្នុងតំបន់
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងថា ប្រាក់ឈ្នូលសម្រាប់កម្មករ កម្មការិនី នៅក្នុងប្រទេសកម្ពុជា មានអត្រាខ្ពស់ជាងបណ្ដាប្រទេសមួយចំនួន នៅក្នុងតំបន់ ស្របពេលឆ្នាំ២០២៤ខាងមុខ កម្ពុជាដំឡើងប្រាក់ឈ្នួលជូនកម្មករ ខណៈប្រទេសមួយចំនួននោះ មិនដំឡើងប្រាក់ឈ្នូលជូនកម្មករនោះទេ។
ពីលើវេទិកាក្នុងជំនួបជាមួយកម្មករ កម្មការិនីជាង២ម៉ឺននាក់ នាថ្ងៃទី៣ ខែតុលានេះ សម្ដេចធិបតី ហ៊ុន ម៉ាណែត បានបញ្ជាក់ថា «យើងនិយាយអំពីបៀរវត្សមូលដ្ឋាន ឆ្នាំ២០២៣ យើងមិនទាន់ដំឡើង២០០ដុល្លារ ខ្ពស់ជាងប្រទេសភាគច្រើនទាំងអស់នេះ ឡាវ ៩០ដុល្លារ ឆ្នាំក្រោយអត់ដំឡើង វៀតណាម ១៥៤ដុល្លារ ទៅ១៩៨ដុល្លារ មិនទាន់ចរចារដំឡើង ឥណ្ឌូនេស៊ី ១៣០ដុល្លារ ទៅ៣០០ដុល្លារ ឆ្នាំនេះអត់ចរចារដំឡើង បង់ក្លាដេស ៧៤ដុល្លារ ភូមា ៦៩ដុល្លារ ឥណ្ឌា ១៣៤ដុល្លារ ទៅ១៩៥ដុល្លារ ស្រីលង្កា ៤០ដុល្លារ»។
សម្ដេចធិបតីអះអាងថា រាជរដ្ឋាភិបាលកម្ពុជា នៅតែប្រកាន់ជំហរក្នុងការដំឡើងប្រាក់ឈ្នូលជូនកម្មរ កម្មការិនី រៀងរាល់ឆ្នាំទោះតិចក្ដីច្រើនក្ដី ក៏ត្រូវតែអនុវត្ត។ ជាក់ស្ដែង ក្នុងដំណាក់កាលកម្ពុជា កំពុងជួបប្រទះជាមួយជំងឺកូវីដ១៩ ក៏រាជរដ្ឋាភិបាលកម្ពុជា នៅតែចរចារដើម្បីដំឡើងប្រាក់ឈ្នួលជូនកម្មករនិយោជិតដែរ។
សម្ដេចធិបតីប្រមុខនៃរាជរដ្ឋាភិបាលកម្ពុជា បានអះអាងថា តួលេខដំឡើង៤ដុល្លារបន្ថែម នៅឆ្នាំ២០២៤លើចំនួនដែលកំពុងអនុវត្តនេះសម្រាប់កម្មករ កម្មការិនី អាចមើលទៅតិច ប៉ុន្ដែសម្រាប់និយោជកអាចមានចំនួនច្រើន។សម្ដេចថា កម្មករ កម្មការិនីរបស់កម្ពុជា ពិតជាមានសំណាងណាស់ដែលមានប្រាក់ឈ្នួលខ្ពស់ជាងបណ្ដាប្រទេសមួយចំនួនក្នុងតំបន់ ៕
