ឯកឧត្តមរដ្ឋមន្រ្តី ហែម វណ្ណឌី ចុះពិនិត្យវឌ្ឍនភាពនៃគម្រោងសាងសង់រោងចក្រផលិតទឹកស្អាតបាក់ខែងជំហានទី១ និងជំហានទី២
ភ្នំពេញ៖ ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានចុះពិនិត្យវឌ្ឍនភាពនៃគម្រោងសាងសង់រោងចក្រផលិតទឹកស្អាតបាក់ខែងជំហានទី១ និងជំហានទី២ ខណៈជំហានទី៣ ស្ថិតក្នុងដំណាក់កាលនៃការសិក្សាសមិទ្ធិលទ្ធភាព។
គម្រោងសាងសង់រោងចក្រផលិតទឹកស្អាតបាក់ខែងជំហានទី១ ដែលមានសមត្ថភាពផលិតទឹកស្អាត ១៩៥,០០០ម៉ែត្រគូបក្នុងមួយថ្ងៃ ត្រូវបានសម្ភោធដាក់ឱ្យដំណេីរការកាលពីថ្ងៃទី១៩ ខែមិថុនា ឆ្នាំ២០២៣។ គម្រោងជំហានទី២ ក៏មានសមត្ថភាពផលិតទឹកស្អាត ១៩៥,០០០ម៉ែត្រគូបក្នុងមួយថ្ងៃដូចគ្នា និងគ្រោងសាងសង់បញ្ចប់ និងដាក់ដំណើរការក្នុងត្រីមាសទី១ ឆ្នាំ២០២៤។
បច្ចុប្បន្ន រដ្ឋាករទឹកស្វយ័តក្រុងភ្នំពេញមានសមត្ថភាពផលិតទឹកស្អាតប្រមាណ ៨៥០,០០០ម៉ែត្រគូបក្នុងមួយថ្ងៃ ដេីម្បីផ្គត់ផ្គង់ដល់ប្រជាពលរដ្ឋនៅក្នុងទីក្រុង។ នៅពេលរោងចក្រផលិតទឹកស្អាតបាក់ខែងជំហានទី២ ដាក់ឱ្យដំណើរការ សមត្ថភាពផលិតទឹកស្អាតនឹងកើនឡើងដល់ជាង១លានម៉ែត្រគូបក្នុងមួយថ្ងៃ។
ឯកឧត្តមរដ្ឋមន្រ្តីបានណែនាំរដ្ឋាករទឹកស្វយ័តក្រុងភ្នំពេញឱ្យខិតខំបន្ថែមទៀតក្នុងការផ្តល់សេវាដល់អតិថិជន និងបន្តអភិវឌ្ឍហេថារចនាសម្ព័ន្ធទឹកស្អាត ដើម្បីបំពេញសេចក្តីត្រូវការទឹកស្អាតដែលកើនឡើងជាលំដាប់នៅក្នុងទីក្រុង ៕
