នាយិកាសាល ពហុសិក្សា សម្តេច ហ៊ុន សែន នៅទីក្រុងប្រទេសម៉ាលី អញ្ជើញចូលជួបសម្តែងការគួរសម និងសួរសុខទុក្ខ អគ្គនាយកមជ្ឈមណ្ឌលជាតិរក្សាសន្តិភាព

ភ្នំពេញ៖ លោកស្រី Eva MYSLWIEC នាយិកាសាល ពហុសិក្សា សម្តេច ហ៊ុន សែន នៅទីក្រុង Bamako ប្រទេសម៉ាលី និងលោក Mohamed DIARRA នាយករងទទួលបន្ទុក ផ្នែកសម្របសម្រួលការសិក្សា នាព្រឹកថ្ងទី៥ ខែកញ្ញា ឆ្នាំ២០២៣ បានអញ្ជើញចូលជួបសម្តែងការគួរសម និងសួរសុខទុក្ខ ឯកឧត្តម នាយឧត្តមសេនីយ៍ សែម សុវណ្ណនី អនុប្រធានទី១ គណៈកម្មាធិការជាតិ និងជាអគ្គនាយកមជ្ឈមណ្ឌលជាតិរក្សាសន្តិភាព។

ឯកឧត្តម នាយឧត្តមសេនីយ៍ សែម សុវណ្ណនី បានស្វាគមន៍យ៉ាងកក់ក្តៅ និងរីករាយក្រៃលែង ក្នុងការជួបសំណេះសំណាលជាមួយ លោកស្រី Eva MYSLWIEC។ ក្នុងជំនួបនេះផងដែរ ឯកឧត្តម ក៏បានថ្លែងអំណរគុណដល់លោកស្រីនាយិកាសាលា ដែលដឹកនាំសាលាបានយ៉ាងល្អ រួមទាំងបានជូនពរលោកស្រីទទួលបានជោគជ័យបន្តទៅមុខទៀត។

លោកស្រី Eva MYSLWIEC បានកោតសរសើរយ៉ាងខ្លាំងចំពោះរាជរដ្ឋាភិបាល និងប្រជាជនកម្ពុជា ដែលមានផ្នត់គំនិតរួម ស្រលាញ់សន្តិភាព និងចង់ឱ្យប្រទេសផ្សេងៗមានសុខសន្តិភាពដែរ។ លោកស្រីមើលឃើញថា ការនាំមកនៃសន្តិភាពពេញលេញកម្ពុជា មានការអភិវឌ្ឈជឿនលឿនលើគ្រប់វិស័យ។

ជាមួយគ្នានោះ លោក Mohamed DIARRA បានលើកឡើងថា សន្តិភាព មិនមែនកើតមានមកដោយងាយៗឡើយ ដ្បិតវាកើតចេញពីការគិត ការអនុវត្ត និងបណ្តុះគំនិតតាំងពីក្មេង។ លោកក៏បានថ្លែងអំណរគុណ ដល់កម្ពុជា ក្នុងការបញ្ជូនកងកម្លាំងមួកខៀវ ចូលរួមបេសកកម្មរក្សាសន្តិភាពនៅប្រទេសម៉ាលី និងបានបំពេញកាតព្វកិច្ចយ៉ាងល្អ ៕