មន្រ្តីជាន់ខ្ពស់ក្រសួងការបរទេសកម្ពុជា៖ ឧត្តមមន្រ្តីអាស៊ានចាប់ផ្តើមកិច្ចប្រជុំរបស់ខ្លួន ដើម្បីសម្រេចនូវឯកសារសមិទ្ធផលសំខាន់ៗសម្រាប់អនុម័ត និងកត់សម្គាល់

ភ្នំពេញ៖ ឯកឧត្តម គង់ ភោគ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានបញ្ជាក់នៅលើបណ្តាញហ្វេសប៊ុករបស់ឯកឧត្តម នាល្ងាចថ្ងៃទី០៣ ខែកញ្ញា ឆ្នាំ២០២៣នេះថា ឧត្តមមន្រ្តីអាស៊ានចាប់ផ្តើមកិច្ចប្រជុំរបស់ខ្លួន ដើម្បីសម្រេចនូវឯកសារសមិទ្ធផលសំខាន់ៗសម្រាប់អនុម័ត និងកត់សម្គាល់ ដោយថ្នាក់ដឹកនាំអាស៊ាន និងពិភាក្សាលម្អិតអំពីការរៀបចំ សម្រាប់កិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ ដែលនឹងប្រព្រឹត្តទៅចាប់ពីថ្ងៃទី០៥ ដល់ថ្ងៃទី០៧ ខែកញ្ញា ឆ្នាំ២០២៣នេះ។

ឯកឧត្តមបានបន្ថែនថា យើងក៏បានធ្វើបច្ចុប្បន្នភាពនៃទំនាក់ទំនងរវាងអាស៊ាន និងដៃគូ ជាពិសេសព្រឹត្តិការណ៍សំខាន់ៗដែលគ្រោងនឹងរៀបចំនៅក្នុងឆ្នាំ២០២៣ និងឆ្នាំក្រោយ។

នៅក្នុងកិច្ចប្រជុំកំពូលលើកទី៤៣ និងកិច្ចប្រជុំកំពូលពាក់ព័ន្ធ ដ៏មានសារៈសំខាន់នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជណាចក្រកម្ពុជា នឹងចែករំលែកនូវចក្ខុវិស័យ ក៏ដូចជាអនុសាសន៍សំខាន់ៗ ក្នុងការជំរុញការកសាងសហគមន៍អាស៊ាន និងការកំណត់ទិសដៅទៅអនាគត ដើម្បីធានាថាអាស៊ាននៅតែមានសារៈសំខាន់ និងបន្តជាមជ្ឈមណ្ឌលកំណើនសម្រាប់តំបន់ និងសាកលលោក។

ជាមួយគ្នានេះ សម្តេចធិបតីនាយករដ្ឋមន្រ្តី ក៏មានកិច្ចប្រជុំទ្វេរភាគីជាមួយថ្នាក់ដឹកនាំកំពូលមកពីសមាជិកអាស៊ាន និងដៃគូ មកទល់ពេលនេះសរុបចំនួន ១៣ ផងដែរ។ ដៃគូទាំងអស់ក៏បានសម្តែងនូវការជឿជាក់ និងការប្តេជ្ញាចិត្តខ្ពស់ ចំពោះការពង្រឹងទំនាក់ទំនងជាមួយកម្ពុជាឱ្យរឹតតែរឹងមាំ ស៊ីជម្រៅ និងគ្រប់ជ្រុងជ្រោយ នៅក្រោមការដឹកនាំរបស់សម្តេចធិបតីនាយករដ្ឋមន្រ្តី ដើម្បីជាប្រយោជន៍សម្រាប់គ្នាទៅវិញទៅមក។

គួរបញ្ជាក់ផងដែរ នៅក្នុងរយៈពេល ៥ ថ្ងៃនេះ អាស៊ាននឹងមានកិច្ចប្រជុំដូចខាងក្រោម៖
១.កិច្ចប្រជុំឧត្តមមន្ត្រីអាស៊ាន។
២.កិច្ចប្រជុំរដ្ឋមន្រ្តីការបរទេស កិច្ចប្រជុំក្រុមប្រឹក្សាសហគមន៍នយោបាយ និងសន្តិសុខ និងកិច្ចប្រជុំក្រុមប្រឹក្សាសម្របសម្រួលអាស៊ាន។
៣.កិច្ចប្រជុំកំពូលអាស៊ានលើទី៤៣ ទាំងចង្អៀត និងពេញអង្គ កិច្ចប្រជុំកំពូលបូកមួយជាមួយដៃគូ កិច្ចប្រជុំកំពូលបូកបី កិច្ចប្រជុំកំពូលអាស៊ីបូព៌ា និងកិច្ចប្រជុំពាក់ព័ន្ធដទៃទៀត ៕