ឯកឧត្ដម ស្វាយ សំអ៊ាង និងឯកឧត្ដម ឈាង ឡាក់ ញញ្ជើញសម្ពោធស្ពានឈើក្បាលបេតុង នៅសហគមន៍ភ្នំប្រាសាទក្នុងភូមិអន្លង់ស្វាយ ឃុំអូររៃ ស្រុកថាឡាបរិវ៉ាត់

ភ្នំពេញ៖ ឯកឧត្ដម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង និងឯកឧត្ដម ឈាង ឡាក់ ប្រធានក្រុមប្រឹក្សាខេត្តស្ទឹងត្រែង អមដំណើរដោយថ្នាក់ដឹកនាំ មន្ត្រីរាជការ កម្លាំងប្រដាប់អាវុធថ្នាក់ខេត្ត ក្រុង ស្រុក ឃុំ នាព្រឹកថ្ងៃសៅរ៍ ២រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២ ខែកញ្ញា ឆ្នាំ២០២៣ បានអញ្ជើញចុះជួបសំណេះសំណាលជាមួយប្រជាពលរដ្ឋ និងសម្ពោធដាក់ឲ្យប្រើប្រាស់ស្ពានឈើក្បាលបេតុង នៅសហគមន៍ភ្នំប្រាសាទក្នុងភូមិអន្លង់ស្វាយ ឃុំអូររៃ ស្រុកថាឡាបរិវ៉ាត់។

កម្មវិធីបន្ទាប់ឯកឧត្ដមអភិបាលខេត្ត និងឯកឧត្ដមប្រធានក្រុមប្រឹក្សាខេត្ត បានអញ្ជើញប្រគេនទានព្រះវស្សា គ្រឿងបរិក្ខា និងបច្ច័យកសាងសមិទ្ធផលក្នុងវត្តដល់ព្រះសង្ឃគង់ចាំព្រះវស្សានៅវត្តប្រាសាទតេជៈ។

ឯកឧត្ដមអភិបាលខេត្ត បានថ្លែងអំណរគុណចំពោះប្រជាពលរដ្ឋទាំងអស់ ដែលបានគាំទ្រដល់ការដឹកនាំរបស់រាជរដ្ឋាភិបាលកម្ពុជាក្នុងពេលកន្លងមកដែលមាន សម្ដេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ និងសម្រាប់រាជរដ្ឋាភិបាល នីតិកាលទី៧ នៃរដ្ឋសភា មានឯកឧត្ដមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រីនៃព្រះរាជាណាចក្រកម្ពុជា ដឹកនាំបន្តវេនចាប់ពីពេលនេះតទៅអនាគត។

ឯកឧត្ដមអភិបាលខេត្ត ក៏បានកោតសរសើរវាយតម្លៃខ្ពស់ចំពោះកម្លាំងសាមគ្គីរបស់ប្រជាពលរដ្ឋក្នុងមូលដ្ឋាន សប្បុរសជន មន្ត្រីរាជការដែលបានចូលរួមកៀរគរធនធានសម្ភារ ថវិកា កម្លាំងពលកម្មកសាងជួសជុលស្ពាននេះឡើងវិញ។

ទន្ទឹមនោះឯកឧត្ដមអភិបាលខេត្ត ក៏បានអំពាវនាវឲ្យប្រជាពលរដ្ឋចូលរួមអនុវត្តគោលនយោបាយភូមិ ឃុំ សង្កាត់មានសុវត្ថិភាពឲ្យបានព្រមៗគ្នា ដើម្បីធានាបានសន្តិសុខ សុវត្ថិភាព សណ្ដាប់ធ្នាប់ កែលម្អសោភ័ណភាព និងការផ្ដល់សេវាសាធារណៈ ព្រមទាំងឆ្លើយតបតម្រូវការរបស់ប្រជាពលរដ្ឋក្នុងមូលដ្ឋាន ៕