ឆមាសទី២ ឆ្នាំនេះ គណៈកម្មការគ្រប់គ្រងគម្រោង ហូកា នៃក្រសួងទេសចរណ៍បានបណ្តុះបណ្តាលពង្រឹងសមត្ថភាពអ្នកជំនាញទេសចរណ៍សរុបចំនួន ជាង១ពាន់រូប
ភ្នំពេញ៖ កាលពីថ្ងៃទី០៨ ខែសីហា ឆ្នាំ២០២៣ ឯកឧត្តម ប៉ាក់ សុខុម រដ្ឋលេខាធិកាក្រសួងទេសចរណ៍និងជាប្រធានគណៈកម្មការគ្រប់គ្រងគម្រោង ហូកា (គ.គ.ហ.) តំណាងរបស់ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ រួមជាមួយលោក Christian Volker Ide ប្រធានកម្មវិធីអភិវឌ្ឍន៍ជំនាញ (SDP) បានអញ្ជើញជាធិបតីក្នុងកិច្ចប្រជុំប្រចាំត្រីមាសទី២ ឆ្នាំ២០២៣ របស់គណៈកម្មការគ្រប់គ្រងគម្រោង ហូកា ដោយផ្ទាល់ និងតាមប្រព័ន្ធវីដេអូ ដោយមានសមាសភាពចូលជាអនុប្រធាននិងសមាជិក គ.គ.ហ. តំណាងសមាគមឧស្សាហកម្មទេសចរណ៍ សាលាបណ្តុះបណ្តាលវិជ្ជាជីវៈទេសចរណ៍ ក្លឹបទេសចរណ៍ខេត្តសៀមរាប លោក/លោកស្រីប្រធានមន្ទីរ និងមន្ត្រីបច្ចេកទេសមន្ទីរទេសចរណ៍ខេត្តគោលដៅគម្រោង ហូកា សរុបចំនួន ៧០រូប។
ឯកឧត្តមរដ្ឋលេខាធិការ និងជាប្រធាន គ.គ.ហ. បានលើកឡើងថាកិច្ចប្រជុំបូកសរុបលទ្ធផលការងារប្រចាំត្រីមាសទី២ និងទិសដៅអនុវត្តបន្តត្រីមាសទី៣ ឆ្នាំ២០២៣ របស់គណៈកម្មការគ្រប់គ្រងគម្រោង ហូកា នឹងបង្ហាញពីកិច្ចខិតខំប្រឹងប្រែង និងសមិទ្ធិផលការងារសំខាន់ៗរបស់លេខាធិការដ្ឋាន និងមន្ទីរទេសចរណ៍ខេត្តគោលដៅគម្រោងទាំង ១០ ដែលបានអនុវត្តកន្លងមក ព្រមទាំងរួមគ្នាដោះស្រាយនូវបញ្ហាប្រឈមនានាក្នុងការបណ្តុះបណ្តាល ហូកា ក៏ដូចជាការដាក់ទិសដៅការងារបន្តសម្រាប់អនុវត្តការងារនៅត្រីមាសទី ៣ឆ្នាំ២០២៣ ខាងមុខ។
ឯកឧត្តមបានគូសបញ្ជាក់ថា ទាក់ទងនឹងការអភិវឌ្ឍធនធានមនុស្ស ក្រសួងទេសចរណ៍បានដាក់ចុះនូវយុទ្ធនាការ “បុគ្គលិកម្នាក់ ជំនាញមួយ (One Employee, One Skill)” ដែលមានបញ្ជូលក្នុងសេចក្តីព្រាងផែនការយុទ្ធសាស្ត្រជាតិអភិវឌ្ឍន៍ទេសចរណ៍ ជាពិសេសអភិវឌ្ឍន៍ធនធានមនុស្សក្នុងវិស័យទេសចរណ៍ដោយផ្តោតលើទាំងបរិមាណ និងគុណភាព ដើម្បីឆ្លើយតបទៅនឹងតម្រូវការនៃការអភិវឌ្ឍន៍វិស័យទេសចរណ៍ ដែលមានតម្រូវការអ្នកជំនាញក្នុងឆ្នាំ២០២៥ ប្រមាណ ១លាននាក់ ឆ្នាំ២០៣០ ប្រមាណ ១,៥លាននាក់ និងឆ្នាំ២០៣៥ ប្រមាណ ១,៩លាននាក់ និងឆ្ពោះទៅសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ SDG 4 និង SDG 8។
លោក Christian Volker Ide ប្រធានកម្មវិធីអភិវឌ្ឍន៍ជំនាញ (SDP) បានវាយតម្លៃខ្ពស់ចំពោះក្រសួងទេសចរណ៍ និងមន្ទីរទេសចរណ៍ខេត្តគោលដៅគម្រោង ដែលបានសហការគ្នាយ៉ាងល្អប្រសើរជាមួយក្រុមការងាររបស់អង្គការស្វីសខន់ថាក់ និងភាគីពាក់ព័ន្ធ ដើម្បីផ្តល់ការបណ្តុះបណ្តាល និងពង្រឹងសមត្ថភាពយុវជនតាមខេត្តគោលដៅប្រកបដោយភាពឆ្នៃប្រឌិត គុណភាព តម្លាភាព និងទទួលបានការកោតសរសើរពីវិស័យឯកជនចំពោះប្រសិទ្ធភាពនៃការបណ្តុះបណ្តាល និងមានធនធានគ្រូបច្ចេកទេសល្អៗ។
លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍ និងជាប្រធានលេខាធិការដ្ឋាន គ.គ.ហ. បានលើកឡើងថា យន្តការរបស់គណៈកម្មការគ្រប់គ្រងគម្រោង ហូកា គឺបានផ្តល់នូវភាពអង់អាច (Empower) និងភាពជាម្ចាស់លើកការបណ្តុះបណ្តាល ដល់មន្ទីរទេសចរណ៍ខេត្តគោលដៅ ដើម្បីសិក្សាពីតម្រូវការបណ្តុះបណ្តាលដល់មូលដ្ឋានអាជីវកម្មរបស់ខ្លួនផ្តល់ការបណ្តុះបណ្តាលជំនាញជាក់លាក់ ពង្រឹងទំនាក់ទំនងជាមួយប្រតិបត្តិករទេសចរណ៍ និងពង្រឹងគុណភាពគ្រូបណ្តុះបណ្តាលរបស់ខ្លួនបានយ៉ាងល្អប្រសើរ ដែលជាលទ្ធផលក្នុងឆមាសទី១ ឆ្នាំ២០២៣ គណៈកម្មការគ្រប់គ្រងគម្រោង ហូកា និងមន្ទីរទេសចរណ៍ខេត្តគោលដៅទាំង១០ បានធ្វើការបណ្តុះបណ្តាលបដិសណ្ឋារកិច្ចដល់ម្ចាស់អាជីវកម្ម បុគ្គលិកដែលកំពង់បំរើការនៅសរុបចំនួន ១,២២៤រូប (ស្ត្រី ៧៥០ រូប) លើជំនាញការិយាល័យជួរមុខ គេហកិច្ច សេវាកម្មម្ហូបអាហារនិងភេសជ្ជៈ គ្រូបង្គោលនិងអ្នកវាយតម្លៃបង្គោល ហូកា និងមគ្គុទ្ទេសក៍ទេសចរណ៍សហគមន៍។
នាឱកាសកិច្ចប្រជុំខាងលើក៏មានវេទិកាចែករំលែកបទពិសោធន៍ពីអ្នកជំនាញដែលបានចូលរួមអនុវត្តកម្មវិធីបណ្តុះបណ្តាល ហូកា លើប្រធានបទរួមមាន៖ (១) យន្តការ និងដំណើរការកសាងគុណវុឌ្ឍិជាតិវិជ្ជាជីវៈ និងបច្ចេកទេស ដោយលោក ខៃ សុជាតិ ប្រធានការិយាល័យស្តង់ដា និងកម្មវិធីសិក្សាផ្អែកលើសមត្ថភាព នៃក្រសួងការងារនិងបណ្តុះបណ្តាលវិជ្ជាជិវៈ (២) ការគាំទ្ររបស់កម្មវិធីអភិវឌ្ឍន៍ជំនាញសម្រាប់ការបណ្តុះបណ្តាលបដិសណ្ឋារកិច្ចកម្ពុជា (HoKa) និងបញ្ហាប្រឈមនានា ដោយ លោក គង់ ដារ៉ា ប្រធានសមាសភាពបណ្តុះបណ្តាលបដិសណ្ឋារកិច្ច នៃអង្គការស្វីសខន់ថាក់ (៣) ការធ្វើតេស្តក្រោយការបណ្តុះបណ្តាល ដោយ លោក ស្រូ រិទ្ធី គ្រូបង្គោលអាស៊ាន (៤) ការរៀបចំវគ្គបណ្តុះបណ្តាលជំនាញចុងភៅ (Cooking Skill) ដោយ លោក សំ សុភ័ណ្ឌ គ្រូបង្គោលជាតិជំនាញចុងភៅ និង(៥) បទពិសោធន៍គ្រូបង្គោល ហូកា លោក ម៉ៃ មេត្តា អនុប្រធានការិយាល័យអប់រំបណ្តុះបណ្តាល និងជាគ្រូបង្គោលរបស់មន្ទីរទេសចរណ៍ខេត្តស្ទឹងត្រែង៕
