រដ្ឋមន្ត្រីការបរទេសអ៊ីរ៉ង់ ធ្វើដំណើរទស្សនកិច្ចនៅជប៉ុនជាលើកដំបូងចាប់តាំងពីឆ្នាំ២០១៩
តូក្យូ៖ រដ្ឋមន្ត្រីការបរទេសអ៊ីរ៉ង់បានធ្វើដំណើរទស្សនកិច្ចនៅប្រទេសជប៉ុនកាលពីថ្ងៃចន្ទជាលើកដំបូងចាប់តាំងពីឆ្នាំ២០១៩ ក្នុងដំណើរទស្សនកិច្ចដ៏កម្រមួយទៅកាន់ប្រទេសសមាជិក G៧ របស់អ្នកការទូតកំពូលរបស់សាធារណរដ្ឋអ៊ីស្លាម។
គោលបំណងនៃដំណើរទស្សនកិច្ចរបស់រដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian ទៅកាន់ប្រធាន G៧ បច្ចុប្បន្នមិនត្រូវបានប្រកាសនោះទេ ប៉ុន្តែរបាយការណ៍នានាបានឲ្យដឹងថា ប្រទេសជប៉ុននឹងជំរុញឱ្យអ៊ីរ៉ង់បញ្ឈប់ការផ្គត់ផ្គង់អាវុធដល់ប្រទេសរុស្ស៊ី។
យោធារបស់ទីក្រុង Kyiv បានឲ្យដឹងកាលពីខែមុនថា ខ្លួនបានបំផ្លាញយន្តហោះគ្មានមនុស្សបើកវាយប្រហារដែលផលិតដោយអ៊ីរ៉ង់រាប់សិបគ្រឿង ដែលតម្រង់ទៅតំបន់ Odesa របស់អ៊ុយក្រែន។
លោក Hossein Amir-Abdollahian បានជួបជាមួយរដ្ឋមន្ត្រីការបរទេសជប៉ុន លោក Yoshimasa Hayashi ដោយអ្នកទាំងពីរបានសាទរចំពោះឱកាសក្នុងការជួបពិភាក្សាទល់មុខគ្នានៅទីក្រុងតូក្យូ។
អ្នកការទូតអ៊ីរ៉ង់បានបញ្ជាក់ថា ខ្ញុំដឹងគុណចំពោះការមានឱកាសផ្លាស់ប្តូរយោបល់ លើបញ្ហាទ្វេភាគី តំបន់ និងអន្តរជាតិ។
សារព័ត៌មាន Jiji Press បានរាយការណ៍ថា មុនពេលកិច្ចប្រជុំ លោក Hossein Amir-Abdollahian បានប្រាប់អ្នកយកព័ត៌មាននៅទីក្រុងតូក្យូថា យើងមិនរើសផ្នែកណាមួយនៅក្នុងសង្គ្រាមទេ ដោយបដិសេធថា អ៊ីរ៉ង់មិនបានផ្តល់អាវុធដល់រុស្ស៊ី។
លោកបានបន្ថែមថា អ៊ីរ៉ង់មិនដែលផ្តល់យន្តហោះគ្មានមនុស្សបើកដល់ប្រទេសណាមួយសម្រាប់ប្រើប្រាស់ក្នុងប្រទេសអ៊ុយក្រែនទេ នេះបើយោងតាមរបាយការណ៍។
ទូរទស្សន៍ឯកជន TBS បានរាយការណ៍ថា លោក Hossein Amir-Abdollahian ក៏នឹងធ្វើទស្សនកិច្ចសម្តែងការគួរសមជាមួយនាយករដ្ឋមន្ត្រីជប៉ុន លោក Fumio Kishida។
ទូរទស្សន៍ TBS ដោយដកស្រង់ប្រភពរដ្ឋាភិបាលមិនបញ្ចេញឈ្មោះបាននិយាយថា ជប៉ុននឹងលើកឡើងពីបញ្ហានាំចេញអាវុធទៅរុស្ស៊ី។
ក្រសួងការបរទេសជប៉ុនបានឲ្យដឹងនៅក្នុងសេចក្តីថ្លែងការណ៍មួយថា លោក Yoshimasa Hayashi បានស្នើសុំឱ្យអ៊ីរ៉ង់ចាត់វិធានការស្ថាបនា ដោយបង្ហាញជំហររបស់ជប៉ុនឡើងវិញលើការឈ្លានពានរបស់រុស្ស៊ីចូលទៅក្នុងអ៊ុយក្រែន។
ជប៉ុននិងអ៊ីរ៉ង់បានរក្សាទំនាក់ទំនងមិត្តភាពជាប្រពៃណី ទោះបីជាសម្ព័ន្ធមិត្តសំខាន់របស់ក្រុងតូក្យូមានទំនាក់ទំនងតានតឹងជាមួយក្រុងតេអេរ៉ង់ក៏ដោយ។
អ៊ីរ៉ង់ធ្លាប់ជាអ្នកនាំចេញប្រេងដ៏សំខាន់ទៅកាន់ប្រទេសជប៉ុនដែលមានធនធាន ប៉ុន្តែបរិមាណបានធ្លាក់ចុះយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ ដោយសារតែទណ្ឌកម្មសេដ្ឋកិច្ចរបស់សហរដ្ឋអាមេរិកលើប្រទេសមជ្ឈិមបូព៌ា។
ដំណើរទស្សនកិច្ចរបស់រដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian ទៅកាន់ប្រទេសជប៉ុន គឺជាលើកទីមួយរបស់អ្នកការទូតកំពូលអ៊ីរ៉ង់ ចាប់តាំងពីខែធ្នូ ឆ្នាំ២០១៩ និងជាលើកដំបូងក្រោមការដឹកនាំរបស់ប្រធានាធិបតី Ebrahim Raisi។
ទោះជាយ៉ាងណាក៏ដោយលោក Yoshimasa Hayashi និងលោក Hossein Amir-Abdollahian បានជួបពិភាក្សាគ្នាតាមទូរស័ព្ទនាពេលកន្លងមក ដែលភាគច្រើនបំផុតនៅក្នុងខែមេសាឆ្នាំនេះ។
ក្នុងអំឡុងកិច្ចពិភាក្សាខែមេសា លោក Yoshimasa Hayashi បានសម្តែងការគាំទ្ររបស់ជប៉ុនចំពោះកិច្ចព្រមព្រៀងនុយក្លេអ៊ែរឆ្នាំ២០១៥ រវាងអ៊ីរ៉ង់ និងមហាអំណាចចំនួនប្រាំមួយ ហើយបានជំរុញឱ្យទីក្រុងតេអេរ៉ង់ សហការជាមួយទីភ្នាក់ងារថាមពលបរមាណូអន្តរជាតិ (IAEA) ដែលជាអ្នកឃ្លាំមើលនុយក្លេអ៊ែររបស់អង្គការសហប្រជាជាតិ។
កិច្ចព្រមព្រៀងឆ្នាំ២០១៥ ដែលរុស្ស៊ី និងចិនជាភាគីផងដែរ គឺសំដៅកាត់បន្ថយសកម្មភាពនុយក្លេអ៊ែររបស់អ៊ីរ៉ង់ ដើម្បីកាត់បន្ថយការភ័យខ្លាចថាខ្លួនកំពុងអភិវឌ្ឍអាវុធបរមាណូ។
ប៉ុន្តែសហរដ្ឋអាមេរិកបានដកខ្លួនចេញពីកិច្ចព្រមព្រៀងក្រោមការដឹកនាំរបស់អតីតប្រធានាធិបតីសហរដ្ឋអាមេរិក លោក Donald Trump ហើយកិច្ចខិតខំប្រឹងប្រែងដើម្បីរស់ឡើងវិញក្រោមការដឹកនាំរបស់ប្រធានាធិបតីសហរដ្ឋអាមេរិក លោក Joe Biden បានធ្លាក់ចុះ ខណៈដែលទីក្រុង Tehran បានពង្រីកការងារនុយក្លេអ៊ែររបស់ខ្លួន។
ក្រសួងការបរទេសជប៉ុនបានឲ្យដឹងនៅក្នុងសេចក្តីថ្លែងការណ៍របស់ខ្លួនថាទីក្រុងតូក្យូមានការព្រួយបារម្ភយ៉ាងខ្លាំងអំពីសកម្មភាពទាក់ទងនឹងនុយក្លេអ៊ែររបស់អ៊ីរ៉ង់ ហើយបានអំពាវនាវឱ្យអ៊ីរ៉ង់ចាត់វិធានការស្ថាបនារួមទាំងកិច្ចសហប្រតិបត្តិការពេញលេញនិងដោយគ្មានលក្ខខណ្ឌជាមួយ IAEA។
ប្រភព៖ France 24
ប្រែសម្រួលដោយ៖ {ឡាយ លីហួ}
