ទីក្រុង Harbin នៃប្រទេសចិនបានជ្រើសរើសធ្វើជាម្ចាស់ផ្ទះកីឡា Asian Winter Games ឆ្នាំ២០២៥

បាងកក៖ ទីភ្នាក់ងារព័ត៌មាន    បានចុះផ្សាយនៅថ្ងៃទី៨ ខែកក្កដាថា ទីក្រុង Harbin នៃខេត្ត Heilongjiang ភាគឦសាននៃប្រទេសចិន ត្រូវបានក្រុមប្រឹក្សាអូឡាំពិកអាស៊ី (OCA) ជ្រើសរើសធ្វើជាម្ចាស់ផ្ទះកីឡា Asian Winter Games ២០២៥ កាលពីថ្ងៃសៅរ៍។

OCA បានធ្វើការសម្រេចចិត្តនៅក្នុងសមាជលើកទី៤២ របស់ខ្លួនដែលធ្វើឡើងនៅទីក្រុងបាងកក ប្រទេសថៃ។

ទីក្រុង Harbin គឺជាទីក្រុងបេក្ខភាពតែមួយគត់សម្រាប់ Asian Winter Games ឆ្នាំ២០២៥ ហើយការដេញថ្លៃរបស់វាត្រូវបានអនុម័តដោយ OCA ជាមួយនឹងការអបអរសាទរពីសភា។

ក្នុងអំឡុងពេលធ្វើបទបង្ហាញដោយគណៈកម្មាធិការដេញថ្លៃរបស់ទីក្រុង Harbin ទៅកាន់ OCA លោក Yu Zaiqing អនុប្រធានគណៈកម្មាធិការអូឡាំពិកចិន និងជាសមាជិកគណៈកម្មាធិការអូឡាំពិកអន្តរជាតិ (IOC) បានឲ្យដឹងថា ទីក្រុង Harbin មានកំណើនសេដ្ឋកិច្ចស្ថិរភាព ប្រពៃណីកីឡារដូវរងាដ៏រឹងមាំ និងកន្លែងកីឡារដូវរងាដ៏ល្អឥតខ្ចោះ។

លោក Yu Zaiqing បានបញ្ជាក់ថា យើងមានជំនឿយ៉ាងមុតមាំថា ទីក្រុង Harbin មានសមត្ថភាពផ្តល់នូវការប្រកួតកីឡារដូវរងាអាស៊ីដ៏ឆ្នើម និងជោគជ័យ ដើម្បីរួមចំណែកដល់ការអភិវឌ្ឍន៍កីឡារដូវរងា និងចលនាអូឡាំពិកនៅក្នុងប្រទេសចិន និងអាស៊ីទាំងមូល និងលើកកម្ពស់សាមគ្គីភាព មិត្តភាព និងសន្តិភាព។

វានឹងក្លាយជាលើកទី២ ដែលទីក្រុង Harbin ធ្វើជាម្ចាស់ផ្ទះ Asian Winter Games ដែលលើកទីមួយគឺនៅឆ្នាំ១៩៩៦ ហើយលើកទី៣ ការប្រកួតក្នុងតំបន់នឹងធ្វើឡើងនៅទីក្រុងមួយរបស់ប្រទេសចិន ហើយមួយទៀតគឺនៅទីក្រុង Changchun ខេត្ត Jilin ភាគឦសានប្រទេសចិនក្នុងឆ្នាំ២០០៧។

ការដេញថ្លៃជោគជ័យរបស់ទីក្រុង Harbin ក៏បានកើតឡើងបន្ទាប់ពីទីក្រុងប៉េកាំងទទួលធ្វើជាម្ចាស់ផ្ទះកីឡាអូឡាំពិករដូវរងាដោយជោគជ័យក្នុងឆ្នាំ២០២២។

ប្រភព៖ Xinhua

ប្រែសម្រួលដោយ៖ {ឡាយ លីហួ}