អារ៉ាប៊ីសាអូឌីតបានអោយដឹងថានឹងបើកស្ថានទូតក្នុងប្រទេសអ៊ីរ៉ង់ឡើងវិញក្នុងពេលឆាប់ៗនេះ
តេហេរ៉ង់៖ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី១៧ ខែមិថុនា ថា រដ្ឋមន្ត្រីការបរទេសអារ៉ាប៊ីសាអូឌីតដែលកំពុងបំពេញទស្សនកិច្ចបាននិយាយកាលពីថ្ងៃសៅរ៍ថា ស្ថានទូតអារ៉ាប៊ីសាអូឌីតនឹងបើកឡើងវិញក្នុងពេលឆាប់ៗនេះក្នុងរដ្ឋធានីតេហេរ៉ង់របស់អ៊ីរ៉ង់។
Faisal bin Farhan Al Saud បានធ្វើការកត់សម្គាល់នៅក្នុងសន្និសីទសារព័ត៌មានរួមគ្នាជាមួយសមភាគីអ៊ីរ៉ង់លោក Hossein Amir-Abdollahian បន្ទាប់ពីកិច្ចប្រជុំរបស់ពួកគេនៅទីក្រុង Tehran កាលពីព្រឹកមិញ។
លោកបានថ្លែងថា អារ៉ាប៊ីសាអូឌីត និងអ៊ីរ៉ង់បច្ចុប្បន្នកំពុងខិតខំប្រឹងប្រែងដើម្បីបន្តវិធានការការទូតនៅក្នុងប្រទេសទាំងពីរ។មុននេះ អ៊ីរ៉ង់បានបើកស្ថានទូតរបស់ខ្លួនឡើងវិញនៅទីក្រុងរីយ៉ាដ ក៏ដូចជាអគ្គកុងស៊ុល និងការិយាល័យតំណាងរបស់អង្គការសហប្រតិបត្តិការឥស្លាមនៅទីក្រុង Jeddah ។អ្នកការទូតកំពូលអារ៉ាប៊ីសាអូឌីតបានកត់សម្គាល់ថា ការធ្វើឱ្យប្រក្រតីភាពនៃទំនាក់ទំនងទ្វេភាគីមានសារៈសំខាន់ ដោយសារប្រទេសទាំងពីរគឺជាតួអង្គសំខាន់នៅក្នុងតំបន់ ហើយទំនាក់ទំនងបែបនេះគឺផ្អែកលើគោលការណ៍នៃការគោរពគ្នាទៅវិញទៅមក ការមិនជ្រៀតជ្រែកក្នុងកិច្ចការផ្ទៃក្នុងរបស់គ្នាទៅវិញទៅមក និងការប្តេជ្ញាចិត្តចំពោះអង្គការសហប្រជាជាតិ។ចំណែករដ្ឋមន្ត្រីការបរទេសអ៊ីរ៉ង់វិញ បានអោយដឹងថា ប្រទេសរបស់លោកបានផ្តល់សម្ភារៈចាំបាច់សម្រាប់ប្រតិបត្តិការការទូតរបស់អារ៉ាប៊ីសាអូឌីតនៅទីក្រុងតេហេរ៉ង់ និងទីក្រុង Mashhad ភាគឦសាន។
រដ្ឋមន្ត្រីការបរទេសអារ៉ាប៊ីសាអូឌីតបានមកដល់ទីក្រុងតេអេរ៉ង់កាលពីរសៀលថ្ងៃសៅរ៍ដោយចាប់ផ្តើមដំណើរទស្សនកិច្ចលើកដំបូងទៅកាន់រដ្ឋធានីអ៊ីរ៉ង់បន្ទាប់ពីទំនាក់ទំនងទ្វេភាគីដែលបែកបាក់របស់ប្រទេសទាំងពីរត្រូវបានបន្តឡើងវិញនៅក្នុងខែមេសា។អារ៉ាប៊ីសាអូឌីតបានកាត់ផ្តាច់ទំនាក់ទំនងការទូតជាមួយអ៊ីរ៉ង់ក្នុងឆ្នាំ ២០១៦ ជាការឆ្លើយតបទៅនឹងការវាយប្រហារទៅលើបេសកកម្មការទូតរបស់អារ៉ាប៊ីសាអូឌីតក្នុងប្រទេសអ៊ីរ៉ង់ បន្ទាប់ពីព្រះរាជាណាចក្រនេះបានប្រហារជីវិតបព្វជិតនិកាយស៊ីអ៊ីតម្នាក់។
ប្រភពព័ត៌មានៈXinhua
ប្រែសំរួលដោយៈយ៉េន សុវណ្ណារ៉ា
