លោកជំទាវ ឌុច ដាណា អញ្ជើញដឹកនាំកិច្ចប្រជុំបើកកិច្ចសវនកម្មផ្ទៃក្នុង ការិយបរិច្ឆេទ២០២២ និងបណ្តាឆ្នាំពាក់ព័ន្ធ សម្រាប់ភូមិភាគ៥

ភ្នំពេញ៖ លោកជំទាវ ឌុច ដាណា អនុរដ្ឋលេខាធិការ ក្រសួងមហាផ្ទៃ នាថ្ងៃព្រហស្បតិ៍ ទី១៥ ខែមិថុនា ឆ្នាំ២០២៣ បានអញ្ជើញជាអធិបតីក្នុងកិច្ចប្រជុំបើកកិច្ចសវនកម្មផ្ទៃក្នុង ការិយបរិច្ឆេទ២០២២ និងបណ្តាឆ្នាំពាក់ព័ន្ធ សម្រាប់ភូមិភាគ៥ (ខេត្តស្ទឹងត្រែង ខេត្តក្រចេះ ខេត្តរតនគិរី និងខេត្តមណ្ឌលគិរី) ដោយមានការអញ្ជើញចូលរួមពី លោក ថោង ស្រាន់ អភិបាលរងខេត្តស្ទឹងត្រែង ឯកឧត្តម ទុយ ប៊ុនសេរីរ័ត្នមុនី អភិបាលរងខេត្តក្រចេះ ឯកឧត្តម វ៉ាន់ សោភា អភិបាលរងខេត្តរតនគិរី និងឯកឧត្តម សាយ ម៉េងគីម អភិបាលរងខេត្តមណ្ឌលគិរី ព្រមទាំងវត្តមាន ឯកឧត្តម លោក លោកស្រី គណៈប្រតិភូ នៃអគ្គនាយកដ្ឋានសវនកម្មផ្ទៃក្នុង និងលោក លោកស្រី ប្រធានអង្គភាពពាក់ព័ន្ធក្រោមចំណុះខេត្តទាំង៤ ផងដែរ។

ជាកិច្ចចាប់ផ្តើម លោកជំទាវ អនុរដ្ឋលេខាធិការ បានមានប្រសាសន៍ថា អគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ បានជួយតម្រង់ទិសនូវចំនុចខ្វះខាតក្នុងការអនុវត្តរបស់សវនដ្ឋានកន្លងមក ដូចនេះអគ្គនាយកដ្ឋាន ត្រូវផ្តល់ជាអនុសាសន៍រាល់ការពាក់ព័ន្ធទៅនឹងសវនដ្ឋាន ដើម្បីធ្វើការកែលម្អ។ លោកជំទាវ អនុរដ្ឋលេខាធិការ បានលើកឡើងបន្ថែមទៀតថា សម្រាប់កម្មវិធីបើកសវនកម្មផ្ទៃក្នុង គឺផ្តោតលើការគ្រប់គ្រងហិរញ្ញវត្ថុសាធារណៈ ការគ្រប់គ្រងទ្រព្យសម្បត្តិរដ្ឋ ការគ្រប់គ្រងបុគ្គលិក និងការគ្រប់គ្រងជនជាប់ឃុំ។

ឆ្លៀតក្នុងឱកាសនោះ លោកជំទាវ អនុរដ្ឋលេខាធិការ ក៏បានលើកឡើងអំពីតួនាទីភារកិច្ចរបស់សវនកម្មផ្ទៃក្នុង មានគោលបំណងដើម្បីធ្វើឱ្យប្រតិបត្តិការប្រព័ន្ធគ្រប់គ្រងផ្ទៃក្នុង របស់អង្គភាពនីមួយៗ ដំណើរការដោយមានប្រសិទ្ធភាព គណនេយ្យភាព និងភាពសន្សំសំចៃ ព្រមទាំងការចូលរួមទប់ស្កាត់ការខ្ជះខ្ជាយក្នុងការប្រើប្រាស់ធនធានរបស់រដ្ឋ។
លោកជំទាវ អនុរដ្ឋលេខាធិការ បានបន្តទៀតថា កិច្ចសវនកម្មផ្ទៃក្នុង ត្រូវផ្តោតលើការពិនិត្យនូវហានិភ័យ ដែលអាចនឹងកើតមានក្នុងកិច្ចប្រតិបត្តិការរបស់សវនដ្ឋាននីមួយៗ និងដើម្បីចុះធ្វើសវនកម្មតាមផែនការប្រចាំឆ្នាំ និងពិនិត្យឡើងវិញនូវការតាមដានការអនុវត្តអនុសាសន៍សម្រាប់កែលម្អរាល់រយៈពេល ០៦ខែម្តង ឬយ៉ាងយូរក្នុង ០១ឆ្នាំម្តង ស្របទៅផែនការសកម្មភាពរបស់អគ្គនាយកដ្ឋានសវនកម្មផ្ទៃក្នុង។

បន្ថែមពីនេះ លោកជំទាវ អនុរដ្ឋលេខាធិការ បានផ្តល់នូវអនុសាសន៍ណែនាំដល់បណ្តាគ្រប់អង្គភាពទាំងបីផ្នែក គឺរដ្ឋបាលស៊ីវិល សន្តិសុខសាធារណៈ និងពន្ធនាគារ ត្រូវខិតខំយកចិត្តទុកដាក់ក្នុងការបំពេញភារកិច្ចរបស់ខ្លួន ដូចជាការផ្តល់សេវាសាធារណៈ សន្តិសុខ សុវត្ថិភាពជូនប្រជាពលរដ្ឋ ដែលថ្នាក់ដឹកនាំប្រគល់ជូន។
ជាកិច្ចបញ្ចប់ លោកជំទាវ អនុរដ្ឋលេខាធិការ ក្រសួងមហាផ្ទៃ បានថ្លែងអំណរគុណយ៉ាងជ្រាលជ្រៅចំពោះរដ្ឋបាលខេត្តស្ទឹងត្រែង ដែលបានចូលរួមសហការ និងជួយសម្របសម្រួលជាមួយអគ្គនាយកដ្ឋានសវនកម្មផ្ទៃក្នុង ដើម្បីរៀបចំកិច្ចប្រជុំនាឱកាសនេះប្រកបដោយភាពរលូន និងទទួលបានលទ្ធផលជាផ្លែផ្កា និងសូមគោរពថ្លែងអំណរគុណចំពោះវត្តមាន របស់ឯកឧត្តម លោកជំទាវ លោក លោកស្រី ដែលបានអញ្ជើញចូលរួមក្នុងកិច្ចប្រជុំនាពេលនេះ ហេីយក៏សូមជូនពរនូវពុទ្ធពរទាំង ៤ ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕