អភិបាលខេត្តព្រះសីហនុ៖ ខេត្តមានសក្តានុពលបែបធម្មជាតិ ហើយក្រុងការអភិវឌ្ឍលឿន ទន្ទឹមនោះវាក៏មានបញ្ហាប្រឈមជាច្រើន ទាមទារឱ្យយើងមានការដោះស្រាយកាន់តែច្រើន

ភ្នំពេញ៖ ឯកឧត្តម គួច ចំរើន អភិបាលខេត្តព្រះសីហនុ បានមានប្រសាសន៍ថា ខេត្តព្រះសីហនុ មានសក្តានុពលបែបធម្មជាតិ ហើយក្រុងព្រះសីហនុការអភិវឌ្ឍលឿន ទន្ទឹមនោះវា ក៏មានបញ្ហាប្រឈមជាច្រើន ទាមទារឱ្យយើងមានការដោះស្រាយកាន់តែច្រើនផងដែរ ព្រោះការអភិវឌ្ឍតិច បញ្ហាប្រឈមតិច ការអភិវឌ្ឍច្រើនបញ្ហាប្រឈមកាន់តែច្រើន និងសូមជូនពរដំណើរទស្សនកិច្ចរបស់ឯកឧត្តមនៅខេត្តព្រះសីហនុទទួលបានលទ្ធផលជាផ្លែផ្កា។

ឯកឧត្តម គួច ចំរើន មានប្រសាសន៍បែបនេះក្នុងឱកាសទទួលជួបសម្តែងការគួរសម និងពិភាក្សាការងារជាមួយឯកអគ្គរដ្ឋទូតទីម័រឡេស្ត នាព្រឹកថ្ងៃទី០៨ ខែមិថុនា ឆ្នាំ២០២៣។

ឯកឧត្តម គួច ចំរើន អភិបាលខេត្ត បានទទួលស្វាគមន៍ឯកអគ្គរដ្ឋទូតទីម័រឡេស្ត ដែលបានមកបំពេញបសកកម្មនៅខេត្តព្រះសីហនុ ហើយឯកឧត្តមក៏មានការរំភើប ស្តីពីការចាប់អារម្មណ៍ និងការគាំទ្រសម្តេចតេជោនាយករដ្ឋមន្ត្រី នៃព្រះរាជាណាចក្រកម្ពុជា ជាវីរបុរសបានបញ្ចប់សង្គ្រាមនៅកម្ពុជា មកដល់បច្ចុប្បន្នធ្វើឱ្យកម្ពុជាមានការអភិវឌ្ឍរីកចម្រើន ជាវីរបុរសមានភាពក្លាហាន តស៊ូលះបង់ ការឈរនៅជាមួយប្រជាពលរដ្ឋ ការអភិវឌ្ឍប្រទេសជាតិ ជម្រុញកំណើនសេដ្ឋកិច្ចប្រទេសកម្ពុជា។ កម្ពុជា និងប្រទេសទីម័រ មានអតីតកាលស្ថិតនៅក្រោមអនានិគមនិយមដូចគ្នា។

ឯកឧត្តមអភិបាលខេត្ត សូមអរគុណរដ្ឋាភិបាលទីម័រឡេស្ត ដែលបានមកចូលរួមព្រឹត្តិការណ៍កីឡាស៊ីហ្គេមលើកទី៣២នៅកម្ពុជា បង្ហាញពីមិត្តភាព កិច្ចសហប្រតិបត្តិការនៅក្នុងអាស៊ាន ផ្តើមចេញពីព្រឹត្តិការណ៍ស៊ីហ្គេមធ្វើឱ្យប្រទេសទាំងពីរមានទំនាក់ទំនងល្អបន្ថែមទៀត សម្តេចតេជោ បានប្រកាសក្នុងព្រឹត្តិការណ៍កីឡាស៊ីហ្គេមលើកទី៣២ គាំទ្រប្រទេសទីម័រក្លាយជាសមាជិកអាស៊ានទី១១ សង្ឃឹមថា ប្រទេសទីម័រ និងក្លាយជាសមាជិកអាស៊ានពេញលេញនៅពេលខាងមុខ ទាក់ទងការហោះហើរត្រង់មកកាន់ខេត្តព្រះសីហនុ យើងអាចរកក្រុមហ៊ុនអាកាសចរណាមួយធ្វើអាជីវកម្ម ផ្តល់ឱកាសឱ្យប្រទេសទាំងពីរមានភាពងាយស្រួលទាក់ទងគ្នារវាង ក្រុងរបស់យើងទាំងពីរកាន់តែជិតគ្នា ៕