ឯកឧត្តម អ៊ុន ចាន់ដា អញ្ជើញប្រគល់ផ្ទះមនុស្សធម៌ទី១៤ ជូនពលរដ្ឋទ័លលំបាក ១គ្រួសាររស់នៅឃុំត្រប់ ស្រុកបាធាយ
ភ្នំពេញ៖ ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត រួមនិងព្រះវត្តមាន ព្រះចរិយាឧត្តម ស៊ាង លាង ព្រះនាគសត្ថាបាឡាត់គណខេត្តកំពង់ចាម ឯកឧត្តម អនុប្រធាន លោកជំទាវ លោក លោកស្រី សមាជិក សមាជិកាគណៈកម្មាធិការសាខា រួមនឹងព្រះមន្ត្រីសង្ឃនៃសាលាគណខេត្ត សាលាអនុគណស្រុក និងអនុសាខាស្រុក នាព្រឹកថ្ងៃពុធ ទី៧ ខែមិថុនា ឆ្នាំ២០២៣នេះ បាននិមន្ត និងអញ្ជើញចុះប្រគល់ផ្ទះបន្ទាប់ទី១៤ ជាកម្មវិធីផ្ទះមនុស្សធម៌ខេត្ត ក្រោមកិច្ចសហការរវាងសាខាកាកបាទក្រហមកម្ពុជាខេត្តនិង សាលាគណខេត្ត ជូនពលរដ្ឋទ័លលំបាក ១គ្រួសារ ឈ្មោះ យ៉េង តាន់ អាយុ ៤៨ឆ្នាំ រស់នៅភូមិថ្មកែវ ឃុំត្រប់ ស្រុកបាធាយ។
គួររំលឹកថា ប្អូន យ៉េង យាន់ ជាបុរសពោះម៉ាយ មានកូនស្រីប្រុស ក្នុងបន្ទុក ២នាក់។ កូនស្រីច្បង កំពុងរៀនថ្នាក់ទី៦ ហើយកូនប្រុសទី២ នៅក្នុងបន្ទុក។ យ៉េន យាន់ ពុំមានទ្រព្យសម្បត្តិអ្វីជាដុំកំភួនទេ ហើយមានជម្ងឺកៀបសរសៃថែមទៀត ត្រូវបង្ខំចិត្តដើរធ្វើសំណង់ផង និង ស៊ីឈ្នួលតាមរដូវកាលផង គ្រាន់បានកម្រៃចិញ្ចឹមកូន។ សព្វថ្ងៃរស់នៅពឹងអាស្រ័យតែលើការជួយរបស់រាជរដ្ឋាភិបាលកម្ពុជា តាមរយៈ ប័ណ្ណសមធម៌ ក្រ១។ ឪពុកកូនទាំង ៣នាក់នេះ ពុំមានផ្ទះផ្ទាល់ខ្លួនទេ តែបានបងប្អូន អ្នកជិតខាង ឲ្យស្នាក់សំចតក្រោមផ្ទះ ជាទីជម្រក ។ ទោះជាយ៉ាងណាក្តី សាមីខ្លួន មានដីមរតក (ពីមុនជាថ្នាលសំណាប) ជាកម្មសិទ្ធិ មួយកន្លែង ទំហំ ៦ម៉ែត្រ × ៨ម៉ែត្រ ប៉ុន្តែដោយសារជីវភាពក្រខ្សត់ពេក ទើបពុំមានលទ្ធភាព សង់ផ្ទះស្នាក់នៅបាន។
មើលឃើញពីស្ថានភាពលំបាកនេះ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានសម្រេចផ្តល់ជូនផ្ទះឈើខ្ពស់ផុតពីដី ប្រក់ស័ង្កសីភ្លីធំ (ទំហំ៤ម៉ែត្រ × ៦ម៉ែត្រ) ១ខ្នង តម្លៃប្រមាណ ១០,០០០,០០០ រៀល ជាថវិកាបដិភាគ របស់សាខា សាលាគណ អនុសាខាស្រុកសាលាអនុគណ ចៅអធិការវត្តទូទាំងស្រុកបាធាយ និងសប្បុរសជន ជូនលោក និងក្រុមគ្រួសារ សម្រាប់ស្នាក់នៅជាកម្មសិទ្ធិតទៅ។
ដើម្បីជួយសម្រាលជីវភាពរស់នៅ សាខា បានផ្តល់សម្ភារគ្រឿង ឧបភោគ បរិភោគ ជូនគ្រួសារលោក សម្រាប់សង្កត់ផ្ទះថ្មីនេះរួមមាន៖ អង្ករ ៥០គីឡូក្រាម, ត្រីខ ២០កំប៉ុង, ទឹកត្រី ១២ដប ទឹកស៊ីអ៊ីវ ១២ដប, មី ២កេស, ឃីត ២សម្រាប់, អាវយឺត ១២, សម្ភារផ្ទះបាយមួយចំនួន និងថវិកា ២០០,០០០រៀល។
ដោយឡែក លោកតា លោកយាយ ដែលចូលរួមជាសាក្សី ក្នុងពិធីប្រគល់-ទទួលផ្ទះថ្មីនេះ ចំនួន ២១នាក់ ក្នុងម្នាក់ៗទទួលបាន អង្ករ ត្រីខ ឃីត មី ទឹកត្រី ទឹកស៊ីអ៊ីវ និងអាវយឺត ព្រមទាំង ថវិកាចំនួន ២០,០០០ រៀលផងដែរ ៕
