សម្តេចតេជោ ហ៊ុន សែន អំពាវនាវឲ្យអ្នកលេងបណ្តាញសង្គម កុំបន្តជជែកលើបទចម្រៀង «មរណភាពព្រះស្វាមី ជ័យវរ្ម័នទី៧»
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវឲ្យអ្នកលេងបណ្តាញសង្គម បញ្ឈប់បន្តជជែកលើបទចម្រៀង «មរណភាពព្រះស្វាមី ជ័យវរ្ម័នទី៧» របស់តារាចម្រៀង មាស សុខសោភា ។
ក្នុងឱកាសអញ្ជើញប្រគល់សញ្ញាបត្រជូននិស្សិត សាកលវិទ្យាល័យភូមិន្ទនីតិសាស្រ្ត និងវិទ្យាសាស្ត្រសេដ្ឋកិច្ច នាព្រឹកថ្ងៃទី៥ ខែមិថុនា ឆ្នាំ២០២៣ សម្តេចតេជោ ហ៊ុន សែន បានថ្លែងថា «ខ្ញុំអំពាវនាវសុំឱ្យអ្នកលេងបណ្តាញសង្គម សុំបញ្ឈប់ភ្លាម កុំបន្តជជែកលើបទចម្រៀង “មរណភាពព្រះស្វាមី ជ័យវរ្ម័នទី៧” ព្រោះបើមិនដូច្នេះនៅជារឿងរុញឱ្យខ្លោច រោលឱ្យឆៅ។ ខ្ញុំចូលទៅមើលក្នុង Facebook មួយ គឺរបស់អ្នកនាង មាស សុខសោភា ដែលគាត់ភ្ជាប់នូវការបង្ហោះរបស់ក្រសួងវប្បធម៌ និងវិចិត្រសិល្បៈ ដែលមានការផ្តល់មតិ (Comments) ថាគួរតែចាត់ការលើផ្លូវច្បាប់។ ខ្ញុំសុំអង្វរក គ្នាបានជាជ្រុលជ្រួសទៅហើយ ហើយគ្នាក៏បានសុំទោស គ្នាក៏បានដកចេញ ឥឡូវតើត្រូវចាំបាច់ត្រូវធ្វើរឿងនេះ ឲ្យបន្ថែមលើរឿងទេ កុំរុញឱ្យខ្លោច កុំរោលឱ្យឆៅ ស្ងប់ស្ងៀមទៅ»។
សូមជម្រាបថា នៅថ្ងៃទី៤ ខែមិថុនា ឆ្នាំ២០២៣ តារាចម្រៀង មាស សុខសោភា បានបង្ហោះវីដេអូចម្រៀងថ្មីរបស់នាង មានចំណងជើងថា «មរណភាព ព្រះស្វាមី ជ័យវរ្ម័ន៧» តាម Facebook និង Youtube នាំឱ្យមានប្រតិកម្មពីសម្តេចតេជោ ហ៊ុន សែន ក្រសួងវប្បធម៌ និងមហាជនជាច្រើន។ បន្ទាប់ពីមានប្រតិកម្មខ្លាំង តារាចម្រៀងរូបនេះ ក៏បានធ្វើការសុំទោសជាសាធារណៈ និងលុបចោលទាំងអស់ នូវបទចម្រៀងនេះផងដែរ ៕
