រដ្ឋលេខាធិការក្រសួងមហាផ្ទៃ ដឹកនាំកិច្ចប្រជុំពិគ្រោះយោបល់ លើកម្រងសេវារដ្ឋបាលក្នុងវិស័យបរិស្ថាន

ភ្នំពេញ៖ ក្រសួងមហាផ្ទៃ នាថ្ងៃទី២២ ខែឧសភា ឆ្នាំ២០២៣ បានដឹកនាំកិច្ចប្រជុំពិគ្រោះយោបល់លើកម្រងសេវារដ្ឋបាលក្នុងវិស័យបរិស្ថាន ក្រោមអធិបតីភាព ឯកឧត្តម លេង វី រដ្ឋលេខាធិការ ក្រសួងមហាផ្ទៃ ដោយមានការអញ្ជើញចូលរួមពី រដ្ឋលេខាធិការ អនុរដ្ឋលេខាធិការ ក្រសួងមហាផ្ទៃ និងតំណាងក្រសួង ស្ថាប័នពាក់ព័ន្ធ ប្រធាននាយកដ្ឋានចំណុះក្រសួងមហាផ្ទៃ ព្រមទាំងមន្ត្រីពាក់ព័ន្ធជាច្រើនរូបទៀតផងដែរ។

ជាកិច្ចចាប់ផ្តើម ឯកឧត្តម លេង វី រដ្ឋលេខាធិការ ក្រសួងមហាផ្ទៃ បានថ្លែងអំណរគុណចំពោះតំណាងក្រសួង ស្ថាប័នពាក់ព័ន្ធចំពោះកិច្ចសហការ និងការគាំទ្រក្នុងការអនុវត្តកំណែទម្រង់វិមជ្ឍការ និងវិសហមជ្ឍការដែលបានធ្វើឱ្យកំណែទម្រង់នេះ កាន់តែល្អប្រសើរជាបន្តបន្ទាប់មកដល់ពេលនេះ។ ឯកឧត្តម បន្តថា ការជួបពិភាក្សា ពិគ្រោះយោបល់ជាមួយតំណាងក្រសួងពាក់ព័ន្ធ ដើម្បីរៀបចំ នីតិវិធីនៃការប្រើប្រាស់ប្រព័ន្ធកម្រៃសេវារដ្ឋបាលក្នុងវិស័យបរិស្ថាន នៅថ្នាក់ក្រោមជាតិដែលមានការគ្រប់គ្រងប្រព័ន្ធលូ ប្រព័ន្ធប្រព្រឹត្តកម្មទឹកកខ្វក់ ជាដើម។

ឯកឧត្តម រដ្ឋលេខាធិការ មានប្រសាសន៍បន្ថែមថា ជាក់ស្តែងក្រសួងមហាផ្ទៃ បានពិនិត្យទៅលើប្រកាសរួម និងប្រកាសអន្តក្រសួង ដើម្បីពិនិត្យ និងចងក្រងទៅលើប្រភេទសេវាដែលស្ថិតនៅក្នុងសមត្ថកិច្ចរបស់ រដ្ឋបាលក្រុង ស្រុក ឱ្យស្ថិតនៅក្នុងសេចក្តីព្រាងប្រកាសអន្តរក្រសួងថ្មីមួយដាច់ដោយឡែក ពីរដ្ឋបាលរាជធានី និងរដ្ឋបាលឃុំ សង្កាត់ ហើយការងារនេះពិតជាត្រូវការពិភាក្សា និងការផ្តល់ធាតុចូលលម្អិតព្រោះសុទ្ធសឹងតែជាការងារដែលមានលក្ខណៈបទដ្ឋាន និងបច្ចេកទេសទៅលើការគ្រប់គ្រងប្រព័ន្ធលូ ប្រព័ន្ធប្រព្រឹត្តកម្មទឹកកខ្វក់។

ក្នុងឱកាសនោះផងដែរ ឯកឧត្តម បួន ហេង ប្រធាននាយកដ្ឋានមុខងារ និងធនធាន នៃអគ្គនាយកដ្ឋានរដ្ឋបាល ក្រសួងមហាផ្ទៃ បានធ្វើបទបង្ហាញអំពីមូលដ្ឋានគតិយុត្ត សាវតានៃការរៀបចំការប្រកាសអន្តរក្រសួង និងកម្រងសេវារដ្ឋបាលក្នុងវិស័យបរិស្ថានជូនអង្គប្រជុំទាំងមូលជ្រាប។

ឯកឧត្តម បានបញ្ជាក់ឱ្យដឹងថា ក្រសួងមហាផ្ទៃបានចងក្រង និងប្រមូលផ្តុំប្រភេទសេវាស្ថិតក្នុងសមត្ថកិច្ច ដើម្បីពិនិត្យសម្រេចរបស់រដ្ឋបាលក្រុង ស្រុក ខណ្ឌ ដាច់ដោយឡែក ពីប្រភេទសេវារដ្ឋបាលរស់រដ្ឋបាលរាជធានី ខេត្ត និងរដ្ឋបាលឃុំ សង្កាត់។ ជាមួយគ្នានោះ អង្គប្រជុំបានពិភាក្សាស្នើសុំបង្កើត ក្រុមការងារបច្ចេកទេសអន្តរក្រសួងដែលមានការចូលរួមពីមន្ត្រីបច្ចេកទេសរបស់ក្រសួងមហាផ្ទៃ និងក្រសួងបរិស្ថាន ព្រមទាំងក្រសួងពាក់ព័ន្ធ ដើម្បីធ្វើការសិក្សារៀបចំរចនាសម្ព័ន្ធ ខ្នាត បទដ្ឋាន ការគ្រប់គ្រងប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់ទើបអាចមានមូលដ្ឋានក្នុងការចងក្រងសេវារដ្ឋបាលបាន។

យោងតាមការពិភាក្សាខាងលើ ឯកឧត្តម លេង វី រដ្ឋលេខាធិការក្រសួងមហាផ្ទៃ បានឯកភាពចំពោះការបង្កើតក្រុមការងារបច្ចេកទេសនេះឡើង ព្រមទាំងណែនាំឱ្យក្រុមការងារខិតខំបំពេញតួនាទីភារកិច្ច ដើម្បីបង្កើនភាពងាយស្រួល និងការអនុវត្តការរៀបចំសេវារដ្ឋបាល នេះកាន់តែមានប្រសិទ្ធភាព៕