ស្នងការរងខេត្តបន្ទាយមានជ័យ បិទវគ្គបំប៉នគ្រូបង្គោល ដើម្បីពង្រឹងសមត្ថភាពការងារដឹកនាំប៉ុស្តិ៍នគរបាលរដ្ឋបាលនិងភ្នាក់ងារសន្តិសុខបោះឆ្នោត

បន្ទាយមានជ័យ៖ បន្ទាប់ពីដំណើរការសិក្សាអស់រយៈពេល០២ថ្ងៃ នៃវគ្គបំប៉នគ្រូបង្គោល ដើម្បីពង្រឹងសមត្ថភាពការងារដឹកនាំប៉ុស្តិ៍នគរបាលរដ្ឋបាលនិងភ្នាក់ងារសន្តិបោះឆ្នោត នៅស្នងការដ្ឋាននគរបាលខេត្តបន្ទាយមានជ័យនេះមក នៅល្ងាចថ្ងៃទី២០ ខែឧសភា ឆ្នាំ ២០២៣ វគ្គនេះត្រូវបានរៀបចំពិធីបិទ ក្រោមអធិបតីភាព លោកឧត្តមសេនីយ៍ត្រី រ៉ែម វីរៈ ស្នងការរង ទទួលផែនការងារសេនាធិការ តំណាងលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការចូលរួមពី លោកឧត្តមសេនីយ៍ត្រី ផាត ផល្លី លោកឧត្តមសេនីយ៍ត្រី យ៉ត សុផល ស្នងការរង នាយ នាយរងការិយាល័យ លោកអធិការ លោកអធិការរង ក្រុង ស្រុក ទាំង៩ និង សិក្ខាកាមជាង១៣០ផងដែរ។

លោកវរសេនីយ៍ឯក ឈឿង សម្បត្តិ នាយការិយាល័យ កិច្ចការប៉ុស្តិ៍នគរបាលរដ្ឋបាល បានធ្វើសេចក្តីរាយការណ៍ថា វគ្គបំប៉ននេះមានរយៈពេល០២ថ្ងៃ (ចាប់ពីថ្ងៃទី១៩ដល់ថ្ងៃទី២០ ខែឧសភា ឆ្នាំ២០២៣) ដោយលើកយកមេរៀនមកបណ្តុះបណ្តាលរួមមាន៖១/-ការងារវគ្គគ្រូបង្គោលសម្រាប់ភ្នាក់ងារសន្តិសុខបោះឆ្នោត ,២/-ការងារកិច្ចការប៉ុស្តិ៍រដ្ឋបាល ក្នុងនោះ -តួនាទីភារកិច្ចរបស់នគរបាលរដ្ឋបាល ។-ការអនុវត្តគោលនយោបាយ« ភូមិ ឃុំ សង្កាត់ មានសុវត្ថិភាព»។- ការអនុវត្តការងារនគរបាលនិងសហគមន៍ ។

លោកនាយការិយាល័យបានបញ្ជាក់ថា តាមរយៈការសិក្សារយៈពេល០២ថ្ងៃនេះ ពិនិត្យឃើញថា សិក្ខាកាមទាំងអស់បានយកចិត្តទុកដាក់ ស្តាប់ការបង្ហាត់បង្ហាញរបស់គ្រូឧទ្ទេសនាម និងបានសួរសំណួរចម្លើយជាច្រើនទាក់ទងនិងមេរៀន ជាពិសេសផ្អែកតាមលទ្ធផលនៃការធ្វើតេស្តសំណួរចម្លើយនេះ ក្រោយពីបញ្ចប់វគ្គបង្ហាញថាសិក្ខកាមមានការយល់ដឹងច្រើននិងមានសមត្ថភាពគ្រប់គ្រាន់ក្នុងការបំពេញការងារប្រចាំថ្ងៃនិងការងារការពារសន្តិសុខបោះឆ្នោតនាពេលខាងមុខ។

ថ្លែងនាឱកាសនោះ ក្នុងនាមជំនួសមុខឲ្យលោកឧត្តមសេនីយ៍ទោ សិទ្ធិ ឡោះ ស្នងការនរបាលខេត្ត ។ លោកឧត្តមសេនីយ៍ត្រី រ៉ែម វីរៈ ស្នងការរងទទួលផែនការងារសេនាធិការ ក៏ដូចជាក្នុងនាមលោកផ្ទាល់ បានថ្លែងនូវការកោតសរសើរនិងវាយតម្លៃខ្ពស់ចំពោះការខិតខំយកចិត្តទុកដាក់ប្រឹងប្រែងរៀនសូត្រ របស់សិក្ខកាមទាំងអស់ បើទោះបីជាពេលវេលាសិក្សានេះមានរយៈពេលខ្លី ក៏ពិតមែន តែវាបានផ្តល់នូវអត្ថប្រយោជន៍ជាច្រើនសម្រាប់ការអនុវត្តការងារប្រចាំថ្ងៃរបស់ខ្លួនក្នុងការបំរើសេវារដ្ឋបាលសាធារណៈនៅមូលដ្ឋាន ពិសេសជាភ្នាក់ងារសន្តិសុខបោះឆ្នោតនាពេលខាងមុខនេះ។

លោកឧត្តមសេនីយ៍ ស្នងការរង បានណែនាំដល់គ្រូបង្គោលទាំងអស់ ត្រូវយកចំណេះដឹងពីការសិក្សានេះ ទៅបង្ហាត់បង្រៀនដល់មន្ត្រីក្នុងអង្គភាព ដើម្បីឲ្យពួកគេបានយល់ច្បាស់អំពីភារកិច្ចរបស់ខ្លួន ពិសេសគឺការងារជាភ្នាក់ងារសន្តិសុខបោះឆ្នោតនាពេលខាងមុខនេះ ជៀសវាងការអនុវត្តខុសពីច្បាប់នៃការបោះឆ្នោត។

នាឱកាសនោះ លោកឧត្តមសេនីយ៍ត្រី រ៉ែម វីរៈ ក៏បានជម្រុញដល់លោកអធិការ លោកអធិការរង ទទួលកិច្ចការប៉ុស្តិ៍រដ្ឋបាលស្រុង ក្រុង ក៏ដូចជានាយនគរបាលប៉ុស្តិ៍រដ្ឋបាលទាំងអស់  ត្រូវធានាឲ្យបាននូវសន្តិសុខសណ្តាប់ធ្នាប់ជូនប្រជាពលរដ្ឋក្នុងមូលដ្ឋាន ផ្តល់នូវសេវារដ្ឋបាលសាធារណៈជូនគាត់ឲ្យបានទាន់ពេលវេលានិងបន្តកាត់បន្ថយភាពថ្នាំងថ្នាក់របស់ប្រជាពលរដ្ឋ មកលើមន្ត្រីរាជការពិសេសគឺនគរបាលយើង៕