ម្ចាស់អាហារដ្ឋាន និងភោជនីយ ដ្ឋាន ចំនួន៧នៅទីរួមខេត្តកំពង់ស្ពឺ បានប្រកាសជំហរមិនលក់មុខម្ហូបពីសាច់សត្វព្រៃ ជូនដល់ភ្ញៀវសម្រាប់កន្លែងខ្លួននោះឡើយ ដើម្បីចូលរួមលុបបំបាត់អន្ទាក់ ទប់ស្កាត់ការជួញដូរសត្វព្រៃខុសច្បាប់នៅកម្ពុជា។ នេះបើតាមការបញ្ជាក់ឱ្យដឹងរបស់ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន និងជាប្រធានយុទ្ធនាការអន្ទាក់សូន្យ ក្នុងសន្និសីទសារព័ត៌មានស្តីពីយុទ្ធនាការអន្ទាក់សូន្យ ក្នុងខេត្តកំពង់ស្ពឺ ដែលធ្វើឡើងនៅទីស្តីការក្រសួងបរិស្ថាន នារសៀលថ្ងៃទី៨ ខែឧសភា ឆ្នាំ២០២៣។
ទីរួមខេត្តកំពង់ស្ពឺ ត្រូវបានធ្វើយុទ្ធនាការស្តីពីការបញ្ឈប់ការដាក់អន្ទាក់ចាប់សត្វព្រៃ ក្នុងចំណោមខេត្តដែលនៅជាប់ និងក្បែរតំបន់ភ្នំក្រវាញ ក្រោមកិច្ចសហការរវាងមន្ត្រីក្រសួងបរិស្ថាន អង្គការសង្គមស៊ីវិល ព្រមទាំងរដ្ឋបាល មន្ទីរជំនាញពាក់ព័ន្ធ សិស្ស និស្សិត ប្រជាសហគមន៍ នៅថ្ងៃទី៩ ខែឧសភាស្អែកនេះ ដើម្បីបង្ហាញពីការប្តេជ្ញាចិត្តក្នុងការចូលរួមការពារ អភិរក្សធនធានធម្មជាតិ សត្វព្រៃ និងចូលរួមលុបបំបាត់អន្ទាក់ ព្រមទាំងទប់ស្កាត់ការជួញដូរសត្វព្រៃខុសច្បាប់នៅកម្ពុជា។
ឯកឧត្តម នេត្រ ភក្ត្រា មានប្រសាសន៍ថា យុទ្ធនាការនេះ គឺជាការតាំងចិត្តដ៏មោះមុតពីគ្រប់ភាគី ក្នុងការលុបបំបាត់អន្ទាក់គ្រប់ប្រភេទនៅក្នុងតំបន់ការពារធម្មជាតិកម្ពុជា បញ្ឈប់ការជួញដូរសត្វព្រៃខុសច្បាប់ រួមជាមួយការបង្កើតនូវមុខរបរផ្សេងៗសម្រាប់ចិញ្ចឹមជីវិតជំនួសវិញ ដើម្បីទ្រទ្រង់ដល់ការអភិវឌ្ឍន៍សេដ្ឋកិច្ចនៃសហគមន៍មូលដ្ឋាន។
បើតាមប្រសាសន៍របស់ឯកឧត្តមរដ្ឋ លេខាធិការក្រសួងបរិស្ថាន បានឱ្យដឹងថា មកដល់ពេលនេះ មានអាហារដ្ឋាន និងកន្លែងបម្រើសេវាទេសចរណ៍ ចំនួន៧៨ទីតាំងហើយ (រាប់ទាំងថ្មីចំនួន៧នៅខេត្តកំពង់ស្ពឺ) ដែលបានប្តេជ្ញាមិនលក់សាច់សត្វព្រៃនៅក្នុងសេវាកម្មម្ហូបអាហាររបស់ខ្លួន បន្ទាប់ពីធ្វើយុទ្ធនាការអន្ទាក់សូន្យនៅដំណាក់កាលទី១ កាលពីឆ្នាំទៅនៅខេត្តគោលដៅដូចជា៖ ខេត្តរតនគិរី ក្រចេះ មណ្ឌលគិរី ព្រះវិហារ ស្ទឹងត្រែង និងកំពង់ធំ និងយុទ្ធនាការអន្ទាក់សូន្យនៅដំណាក់កាលទី២ នៅខេត្តពោធិ៍សាត់ កាលពីថ្មីៗនេះ។
សូមបញ្ជាក់ថា សម្រាប់យុទ្ធនាការអន្ទាក់សូន្យនៅដំណាក់កាលទី២នេះ គឺជាកិច្ចខិតខំប្រឹងប្រែងរួមរវាងក្រសួងបរិស្ថាន អាជ្ញាធរពាក់ព័ន្ធ អង្គការដៃគូក្នុងការងារអភិរក្ស និងដៃគូអភិវឌ្ឍន៍ ដើម្បីលុបបំបាត់អន្ទាក់គ្រប់ប្រភេទក្នុងតំបន់ការពារធម្មជាតិ ផ្តល់ជម្រកប្រកបដោយសុខសុវត្ថិភាពសម្រាប់សត្វព្រៃ និងជីវៈចម្រុះ និងអនុញ្ញាតឱ្យជីវៈចម្រុះអាចរីកលូតលាស់ តាមធម្មជាតិដោយគ្មានការគំរាមកំហែង និងធ្វើឱ្យប្រព័ន្ធអេកូឡូស៊ីកាន់តែមាននិរន្តរភាព ព្រមទាំងចូលរួមបញ្ឈប់រាល់ការទិញ លក់ ដើម្បីជាប្រយោជន៍ទុកសម្រាប់ទាក់ទាញវិស័យអេកូទេសចរណ៍ ៕
