ខារទូម÷កងទ័ពស៊ូដង់កាលពីថ្ងៃពុធបាននិយាយថា ខ្លួនបានយល់ព្រមចំពោះគំនិតផ្តួចផ្តើមដែលស្នើឡើងដោយអាជ្ញាធរអន្តររដ្ឋាភិបាលស្តីពីការអភិវឌ្ឍន៍ (IGAD) ដែលរួមមានការបន្តបទឈប់បាញ់បច្ចុប្បន្នរយៈពេលមួយសប្តាហ៍ និងដាក់ឈ្មោះតំណាងមកពីភាគីនីមួយៗទៅ ពិភាក្សាអំពីបទឈប់បាញ់នេះបើយោងតាមសេចក្តីថ្លែងការណ៍មួយ។
សេចក្តីថ្លែងការណ៍បានអោយដឹងថា “ជាផ្នែកមួយនៃគំនិតផ្តួចផ្តើមរបស់ខ្លួនដើម្បីដោះស្រាយវិបត្តិបច្ចុប្បន្នរបស់ប្រទេសនេះ IGAD បានផ្តល់សំណើថ្មីរួមទាំងការបន្តបទឈប់បាញ់បច្ចុប្បន្នរយៈពេលមួយសប្តាហ៍ និងដាក់ឈ្មោះតំណាងមកពីភាគីនីមួយៗដើម្បីពិភាក្សាអំពីបទឈប់បាញ់” ។”កងកម្លាំងប្រដាប់អាវុធស៊ូដង់ (SAF) បានសម្តែងការទទួលយកសំណើដោយផ្អែកលើគោលការណ៍នៃដំណោះស្រាយអាហ្រ្វិកចំពោះបញ្ហានៃទ្វីប និងដោយពិចារណាលើទិដ្ឋភាពមនុស្សធម៌របស់ប្រជាពលរដ្ឋរបស់យើង ដោយគិតគូរពីគំនិតផ្តួចផ្តើមអាមេរិក-អារ៉ាប៊ីសាអូឌីតដែលកំពុងបន្ត”។SAF បានសង្កត់ធ្ងន់ថាខ្លួនសង្ឃឹមថាភាគីម្ខាងទៀតនឹងគោរពតាមតម្រូវការនៃបទឈប់បាញ់ដែលបានស្នើឡើង។កងកម្លាំងគាំទ្ររហ័ស (RSF) មិនទាន់ធ្វើអត្ថាធិប្បាយលើគំនិតផ្តួចផ្តើម IGAD នៅឡើយទេ។
ការប្រយុទ្ធគ្នារវាង SAF និង RSF នៅទីក្រុង Khartoum និងតំបន់ផ្សេងទៀតបានផ្ទុះឡើងកាលពីថ្ងៃទី ១៥ ខែមេសា ដោយភាគីទាំងពីរបានចោទប្រកាន់គ្នាទៅវិញទៅមកថាបានផ្តួចផ្តើមជម្លោះដែលបានរុញច្រានប្រទេសឱ្យឈានទៅដល់គែមនៃវិបត្តិមនុស្សធម៌។
យោងតាមស្ថិតិរបស់អង្គការសហប្រជាជាតិ ពលរដ្ឋស៊ូដង់រាប់ពាន់នាក់ត្រូវបានផ្លាស់ទីលំនៅ ឬបង្ខំឱ្យស្វែងរកកន្លែងជ្រកកោននៅក្នុងតំបន់សុវត្ថិភាពក្នុងប្រទេសស៊ូដង់ និងប្រទេសជិតខាង រួមទាំងអេហ្ស៊ីប អេត្យូពី និងឆាដ។រហូតមកដល់ពេលនេះ ការប៉ះទង្គិចគ្នាដ៏សាហាវនេះបានធ្វើឱ្យមនុស្សជាង ៥៥០ នាក់បានស្លាប់ និង ៤,៩២៦ នាក់ផ្សេងទៀតបានរងរបួស នេះបើយោងតាមក្រសួងសុខាភិបាលស៊ូដង់។
