មេទ័ពជើងគោក វាយតម្លៃខ្ពស់ចំពោះយោធភូមិភាគីទី៤ ដែលអនុវត្តភារកិច្ចសម្រេចលទ្ធផល និងស្នាដៃការងារល្អគួរជាទីមោទនៈ
ភ្នំពេញ៖ នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានធ្វើការវាយតម្លៃខ្ពស់ចំពោះយោធភូមិភាគីទី៤ រួមទាំងគ្រប់បណ្តាស្ថាប័ន-កងឯកភាពចំណុះ ដែលកន្លងមក បានយកចិត្តទុកដាក់ប្រមូលផ្តុំអនុវត្តភារកិច្ចសម្រេចបានលទ្ធផល និងស្នាដៃការងារល្អប្រសើរជាច្រើនគួរជាទីមោទនៈ។
នាយឧត្តមសេនីយ៍ បានថ្លែងបែបនេះ នៅក្នុងពេលអញ្ជើញប្រកាសតែងតាំងផ្លាស់ប្តូរមុខតំណែងជូននាយទាហាន តំបន់ប្រតិបត្តិការសឹករងឧត្តរមានជ័យ យោធភូមិភាគទី៤ ខេត្តឧត្តរមានជ័យ នៅថ្ងៃទី១១ ខែមេសា ឆ្នាំ២០២៣។
នាយឧត្តមសេនីយ៍ ក៏បានថ្លែងនូវការកោតសរសើរចំពោះមេបញ្ជាការ មេបញ្ជាការរងគ្រប់លំដាប់ថ្នាក់ នាយទាហាន នាយទាហានរង និងពលទាហានទូទាំងតំបន់ប្រតិបត្តិការសឹករងឧត្តរមានជ័យ ដែលបានខិតខំបំពេញគ្រប់ភារកិច្ច រហូតអង្គភាពមានភាពរឹងមាំលើគ្រប់វិស័យ ដែលពិតជាបានឆ្លុះបញ្ចាំងឱ្យឃើញអំពីឆន្ទៈដ៏មោះមុត, សាមគ្គីភាពផ្ទៃក្នុងល្អ, ស្មារតីដ៏អង់អាចក្លាហាន, មនសិការវិជ្ជាជីវៈប្រកបដោយការទទួលខុសត្រូវ ក្នុងការសម្រេចភារកិច្ចបម្រើជាតិមាតុភូមិស្របតាមផែនការរបស់យោធភូមិភាគទី៤ និងបញ្ជាការដ្ឋានកងទ័ពជើងគោក ដែលបានដាក់ចេញ។
ជាមួយគ្នានោះនាយឧត្តមសេនីយ៍ ហ៊ុន ម៉ាណែត បានធ្វើការវាយតម្លៃខ្ពស់ចំពោះយោធភូមិភាគីទី៤ រួមទាំងគ្រប់បណ្តាស្ថាប័ន-កងឯកភាពចំណុះ ដែលកន្លងមក បានយកចិត្តទុកដាក់ប្រមូលផ្តុំអនុវត្តភារកិច្ចសម្រេចបានលទ្ធផល និងស្នាដៃការងារល្អប្រសើរជាច្រើនគួរជាទីមោទនៈ ដោយធានាបាននូវការពង្រឹងប្រៀបការពារជាតិក្នុងភូមិសាស្ត្រទទួលខុសត្រូវ ឱ្យមានប្រសិទ្ធភាពជាប់ជាប្រចាំ និងគ្រប់កាលៈទេសៈ ព្រមជាមួយនឹងការបំពេញកិច្ចសហការជាមួយអាជ្ញាធរដែនដី និងសមត្ថកិច្ចពាក់ព័ន្ធក្នុងការថែរក្សាការពារសន្តិសុខ សណ្តាប់ធ្នាប់សាធារណៈ និងសុវត្ថិភាពបានល្អប្រសើរជូនប្រជាពលរដ្ឋ៕
