ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា ទិវាវប្បធម៌ជាតិ គឺជាទិវាដ៏មានសារសំខាន់មួយរបស់ប្រជាជាតិកម្ពុជា ដើម្បីរំលឹក ដល់គុណូបការៈបុព្វបុរសខ្មែរគ្រប់ជំនាន់ ដែលបានពលីទាំងកម្លាំងកាយ កម្លាំងចិត្ត កម្លាំងបញ្ញា និងអាយុជីវិត ក្នុងការបង្កើត ថែរក្សានិងការពារសម្បត្តិវប្បធម៌ដ៏សម្បូរបែប និងមានតម្លៃមិនអាចកាត់ថ្លៃបាន បន្សល់ទុកមកដល់កូនចៅជំនាន់ក្រោយ។
សម្ដេចមានប្រសាសន៍បែបនេះក្នុងពិធីជួបជាមួយអ្នកសិល្បះនៅមជ្ឈមណ្ឌលកោះពេជ្រ នារសៀលថ្ងៃទី២ ខែមីនា ឆ្នាំ២០២៣នេះ។
សម្តេចតេជោ ហ៊ុន សែន បានថ្លែងថា ឈរលើស្មារតីនេះហើយ ទើបចាប់តាំងពីឆ្នាំ១៩៩៩មក រាជរដ្ឋាភិបាលតែងតែប្រារព្ធទិវាវប្បធម៌ជាតិ។
សម្តេចបន្តថា ការជ្រើសយកប្រធានបទ «យុវជនដើម្បីវប្បធម៌» សម្រាប់ប្រារព្ធពិធីអបអរសាទរទិវាវប្បធម៌ជាតិ មិនមែនជារឿងចៃដន្យនោះទេ ហើយនៅក្នុងដំណើរការជាតិ យុវជនបានដើរតួនាទីយ៉ាងសំខាន់សំខាន់ក្នុងការរំដោះ ស្តារ និងអភិវឌ្ឍន៍ជាតិឱ្យមានការរីកចម្រើនដូចបច្ចុប្បន្ន។
ជាមួយគ្នានោះ សម្តេចនាយករដ្ឋមន្ត្រី បានណែនាំឱ្យយកចិត្តទុកដាក់ជាពិសេសទៅលើអក្សរសាស្ត្រខ្មែរ បន្ទាប់ពីមានការប្រើប្រាស់ខុសឆ្គងច្រើន ហើយសម្ដេចក៏បានណែនណែនាំបន្ថែមទៀតឱ្យអ្នកសិល្បៈរួមគ្នាតែងនិពន្ធចម្រៀងអបអរសាទរព្រឹត្តិការណ៍ប្រកួតកីឡាស៊ីហ្គេមផងដែរ៕
