ភ្នំពេញ៖ នាថ្ងៃទី ២៦ ខែកុម្ភៈ ឆ្នាំ ២០២៣ ឯកឧត្តម ហ៊ុន ម៉ានី អ្នកតំណាងរាស្រ្តមណ្ឌលខេត្តកំពង់ស្ពឺ ព្រមទាំង ឯកឧត្តម លោកជំទាវ សមាជិកព្រឹទ្ធសភា និងរដ្ឋសភា ប្រចាំភូមិភាគ និងមណ្ឌលខេត្តកំពង់ស្ពឺ បានអញ្ជើញជាអធិបតីក្នុងពិធីជួបសំណេះសំណាលជាមួយមន្ត្រីអប់រំ និងមន្រ្តីសុខាភិបាល នៃស្រុកភ្នំស្រួច និងស្រុកថ្ពង ខេត្តកំពង់ស្ពឺ ប្រមាណ២, ០០០នាក់។
នាឱកាសនៃពិធីសំណេះសំណាលនេះ ឯកឧត្តម ហ៊ុន ម៉ានី បានសម្តែងនូវសេចក្តីសោមនស្សរីករាយចំពោះវត្តមានលោកគ្រូ អ្នកគ្រូ អស់លោក លោកស្រី វេជ្ជបណ្ឌិត បុគ្គលិកអប់រំ និងមន្ត្រីសុខាភិបាល ដែលបានចំណាយពេលពេលវេលាចូលរួមពិធីជួបជុំថ្ងៃនេះ ស្របតាមគោលបំណងធំនៃការជួបជុំថ្ងៃនេះគឺ ដើម្បីថ្លែងអំណរគុណដោយផ្ទាល់ចំពោះ លោកគ្រូ អ្នកគ្រូបង្រៀន ក្រុមគ្រូពេទ្យ ដែលបានខិតខំបំពេញភារកិច្ចខ្លួនយ៉ាងខ្ជាប់ខ្ជួន ជាពិសេសក្នុងកំឡុងពេលនៃការរីករាលដាលជំងឺកូវីដ-១៩។
ថ្លែងក្នុងពិធីសំណេះសំណាលនាឱកាសនោះ ឯកឧត្តម ហ៊ុន ម៉ានី បានរំលេចដែរថា តាមរយៈការធ្វើដំណើរតាមដងផ្លូវមកកាន់កម្មវិធីសំណេះសំណាលនៅវិទ្យាល័យ ហ៊ុនសែនបាត់ដឹង ឯកឧត្តមបានសង្កេតឃើញថា អគារ សំណង់ មានការរីកចម្រើនច្រើនជាងមុន បើប្រៀបធៀបពេលដែលឯកឧត្តមចុះមូលដ្ឋានដំបូង កាលពីឆ្នាំ ២០១២។ ជាមួយគ្នានោះដែរ ឯកឧត្តមបានរំលឹកអនុស្សាវរីយ៍ និងចែករំលែក បទពិសោធន៍ការងារមូលដ្ឋានដំបូងគេបំផុតនៅស្រុកឧដុង្គ និងឆ្លៀតឱកាសថ្លែងអំណរគុណដល់អ្នកស្រុកឧដុង្គចំពោះការរាប់អាន និងចែករំលែកនូវបទពិសោធន៍ ក៏ដូចជាការរៀនសូត្រផងដែរ។
មានប្រសាសន៍នៅក្នុងឱកាសនោះ ឯកឧត្តមបានវាយតម្លៃខ្ពស់ ចំពោះរដ្ឋបាលខេត្ត ដែលបានខិតខំប្រឹងប្រែងក្នុងការផ្តល់សេវាសាធារណៈជូនប្រជាពលរដ្ឋពាក់ព័ន្ធជាក់ស្តែងនឹងវិស័យសុខាភិបាល វិស័យអប់រំ ការបង្កបង្កើនផលជាដើម។ ស្របជាមួយការលើកឡើងខាងលើនេះ ឯកឧត្តមបានមានប្រសាសន៍ថា សមិទ្ធផលនានារបស់ខេត្ត គឺកើតចេញពីការខិតខំប្រឹងប្រែងរួមរបស់ អ្នកតំណាងរាស្រ្ត ក្រុមប្រឹក្សាភិបាលខេត្ត ក្រុមការងាររដ្ឋបាលខេត្ត ក្រុមការងាររាជរដ្ឋាភិបាលខេត្ត ស្រុក អាជ្ញាធរ ក្រុមការងារចុះជួយស្រុក។ ជាមួយគ្នាដែរ ឯកឧត្តមបានសរបញ្ជាក់ផងដែរថា ការរួមគ្នាដើម្បីការអភិវឌ្ឍន៍ប្រទេសជាតិនេះ គឺជារបៀបរបបធ្វើការងាររបស់គណបក្សប្រជាជនកម្ពុជា ដែលកើតចេញពីការគាំទ្ររបស់ប្រជាពលរដ្ឋ។ តាមរយៈការគាំទ្រនេះ បានផ្តល់ឱកាសអោយគណបក្សប្រជាជនកម្ពុជា រួបរួមគ្នាដោះស្រាយបញ្ហាដែលប្រទេសកម្ពុជាជួបប្រទះ និងចូលរួមអភិវឌ្ឍប្រទេសជាតិបន្ថែមទៀត។
ឆ្លៀតក្នុងឱកាសនោះដែរ អភិបាលនៃគណៈអភិបាលស្រុកឱរ៉ាល់ និងស្រុកថ្ពង បានធ្វើសម្តែងការស្វាគមន៍យ៉ាងកក់ក្តៅចំពោះវត្តមាន ឯកឧត្តម ហ៊ុន ម៉ានី និងបានធ្វើការថ្លែងអំណរគុណចំពោះឯកឧត្តម ដែលតែងតែយកចិត្តទុកដាក់ និងគិតគូរពីសុខទុក្ខអ្នកខេត្តកំពង់ស្ពឺ។ ជាមួយគ្នានេះដែរ អភិបាលនៃគណៈអភិបាលស្រុកទាំងពីរ បានធ្វើរបាយការណ៍សង្ខេបពីស្រុករបស់ខ្លួនផងដែរ។
សូមជម្រាបជូនថា ការជួបសំណេះសំណាលជាមួយមន្ត្រីអប់រំ និងមន្រ្តីសុខាភិបាលនៅស្រុកឧដុង្គនារសៀលថ្ងៃនេះ គឺជាស្រុកចុងក្រោយនៃ ស្រុកទាំង ៨ នៃខេត្តកំពង់ស្ពឺ ដែល ឯកឧត្តម ហ៊ុន ម៉ានី បានជួបសំណេះសំណាលដើម្បីថ្លែងអំណរគុណដោយផ្ទាល់ចំពោះ លោកគ្រូ អ្នកគ្រូបង្រៀន ក្រុមគ្រូពេទ្យ ដែលបានខិតខំបំពេញភារកិច្ចខ្លួនយ៉ាងខ្ជាប់ខ្ជួន ជាពិសេសចូលរួមជាមួយរាជរដ្ឋាភិបាលក្នុងកំឡុងពេលប្រយុទ្ធប្រឆាំងជំងឺកូវីដ-១៩។។
