នគរបាលក្រុងប៉ោយប៉ែត ឃាត់ខ្លួនជនសង្ស័យ ៨នាក់ ក្រោយជិៈម៉ូតូធ្វើសកម្មភាពវាយប្លន់យកម៉ូតូ នៅសង្កាត់និមិត្ត
ភ្នំពេញ៖ កម្លាំងនគរបាលក្រុងប៉ោយប៉ែត បានចុះធ្វើការស្រាវជ្រាវឃាត់ខ្លួន ជនសង្ស័យបានចំនួន៨នាក់ធ្វើសកម្មភាពប្លន់វាយជនរងគ្រោះកំពុងជិះម៉ូតតែឯងប្លន់យកម៉ូតូទៅបាត់ បន្ទាប់មកជនរងគ្រោះ ប្តឹងសមត្ថកិច្ចដើម្បីជួយអន្តរាគមន៍ ស្រាវជ្រាវឃាត់ខ្លួនបាន០៨នាក់ ។ ករណីវាយប្លន់យកម៉ូតូនេះបានកើតឡើងនៅវេលាម៉ោង ៩យប់ ថ្ងៃទី ២០ ខែកុម្ភះ ឆ្នាំ ២០២៣ ត្រង់ចំណុចភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា៖ ជនរងគ្រោះមកប្តឹងនោះ មានឈ្មោះ ស៊ុយ ម៉ារ៉ាឌី ភេទប្រុស អាយុ២៣ឆ្នាំ មុខរបរកម្មករ រស់នៅភូមិ២ សង្កាត់កំពង់ស្វាយ ក្រុងសិរីសោភ័ណ បានរៀបរាប់ថា មុនពេលកើតហេតុគាត់បានជិៈម៉ូតូម្នាក់ឯងតាមបណ្ដោយផ្លូវជាតិលេខ៥ ចំណុចភូមិកូនដំរី សង្កាត់និមិត្ត ក្រុងប៉ោយប៉ែត ខាងមុខមន្ទីរពេទ្យ ភូមិកូនដំរីពេលនោះ មានជនសង្ស័យចំនួន២នាក់ ភេទប្រុស ជិះម៉ូតូម៉ាកហុងដាឌ្រីម ពណ៌ខ្មៅជិះមកដល់ជិតខ្លួនបានធ្វើសកម្មភាពជិះម៉ូតូ រហូតមកដល់ចំណុចកើតហេតុខាងលើ ខ្លួនក៏បានចាប់ហ្វ្រាំងម៉ូតូផ្ដួលនៅនឹងថ្នល់ជាតិ ក្រោយមកជនសង្ស័យទាំង០២នាក់នាក់បានឈប់ម៉ូតូ ប្រុងដកដូចជាអាវុធអ្វីមួយ ជនរងគ្រោះ ឃើញដូច្នេះក៏រត់ចូលប្រឡាយនៅខាងឆ្វេងដៃ បានប្រហែល០១នាទី ខ្លួនក៏ឡើងមកលើថ្នល់វិញ ស្រាប់តែបាត់ម៉ូតូតែម្ដង រួចខ្លួនបានរត់ទៅការ៉ាសសាំងកូនដំរី ហើយរាយការណ៍ជូនសមត្ថកិច្ចដើម្បីជួយធ្វើអន្តរាគមន៍តែម្ដង។
លោកវរសេនីយ៍ឯក សៅ សារឿន បានបញ្ជាក់ថា ក្រោយពីមានករណីនេះកើតឡើង លោកឧត្តមសេនីយ៍ទោ សិទ្ធិ ឡោះ បានដាក់បទបញ្ជាឲ្យ លោកបានដឹកនាំកម្លាំងនគរបាលផែនជំនាញ និងកម្លាំងប៉ុស្តិ៍ទាំង៥ បើកការស្រាវជ្រាវ ក៏ឈានដល់ការឃាត់ខ្លួនជនសង្ស័យបានចំនួន០៨នាក់ រួមទាំងវត្ថុតាង នៅកាស៊ីណូហ្គោដវ៉ើល ផ្លូវដើមពុទ្រ្ទា ស្ថិតក្នុងភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត យកមកសួរនាំនៅអធិការដ្ឋាន និងបញ្ជូនជនសង្ស័យទាំង០៨នាក់ រួមទាំងវត្ថុតាងទៅស្នងការដ្ឋាននគរបាលខេត្ត បន្ទាយមានជ័យ ចាត់ការបន្តតាមនិតិវិធី ៕
