បណ្ឌិត ហ៊ុន ម៉ាណែត៖ សាសនាបានដើរតួនាទីយ៉ាងសំខាន់ក្នុងការចូលរួមបណ្តុះបណ្តាលអប់រំចិត្តគំនិត និងអាកប្បកិរិយាប្រកបដោយគុណធម៌ សីលធម៌ និងសេចក្តីថ្លៃថ្នូរ

ភ្នំពេញ៖ ឯកឧត្តម បណ្ឌិត ហ៊ុន ម៉ាណែត បានមានប្រសាសន៍ថា សាសនាបានដើរតួនាទីយ៉ាងសំខាន់ក្នុងការចូលរួមបណ្តុះបណ្តាលអប់រំចិត្តគំនិត និងអាកប្បកិរិយាប្រកបដោយគុណធម៌ សីលធម៌ និងសេចក្តីថ្លៃថ្នូរ។

ការថ្លែងរបស់ឯកឧត្ដមបែបនេះធ្វើឡើង នៅក្នុងឳកាសតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នាថ្ងៃទី១៤ ខែកុម្ភៈ ឆ្នាំ២០២៣ អញ្ជើញសម្ពោធឧបដ្ឋានសាលា និងសមិទ្ធផលនានា ក្នុងវត្តគិរីឧត្តមអាដោល ស្ថិតក្នុងខេត្តត្បូងឃ្មុំ។

មានប្រសាសន៍នៅក្នុងពិធី ឯកឧត្តម បណ្ឌិត ហ៊ុន ម៉ាណែត បានចូលរួមអបអរសាទរចំពោះសមិទ្ធផលជាច្រើនដែលកើតមានក្នុងទីអារាម ដែលមានអាយុកាលជាង ១៤០ ឆ្នាំមួយនេះ និងសូមអរគុណចំពោះពុទ្ធបរិស័ទ្ធជិតឆ្ងាយដែលមានសទ្ធាជ្រះថ្លាចូលរួមបន្តកសាងកេរដំណែលពីបុព្វបុរសយើង ជាប្រយោជន៍បន្សល់ទុកឱ្យកូនចៅជំនាន់ក្រោយៗទៀត។

ឯកឧត្ដមបន្តថា ទាំងនេះពិតជាបានបង្ហាញច្បាស់អំពីការប្រតិបត្តិយ៉ាងខ្ជាប់ខ្ជួននូវវប្បធម៌ចែករំលែក ដែលដូនតារបស់យើងបានប្រៀនប្រដៅតាំងពីដើមរៀងមក ក្រោមបរិយាកាសនៃកត្តាសុខសន្តិភាព និងសេរីភាពពេញលេញ ព្រមទាំងការបង្កលក្ខណៈគ្រប់បែបយ៉ាងពីសំណាក់អាជ្ញាធរគ្រប់លំដាប់ថ្នាក់ ក្នុងធ្លុងសាមគ្គីភាពជាតិខ្មែរ។

ឯកឧត្តម បណ្ឌិត ហ៊ុន ម៉ាណែត បានបញ្ជាក់ថា សាសនាបានដើរតួនាទីយ៉ាងសំខាន់ក្នុងការចូលរួមបណ្តុះបណ្តាលអប់រំចិត្តគំនិត និងអាកប្បកិរិយាប្រកបដោយគុណធម៌ សីលធម៌ និងសេចក្តីថ្លៃថ្នូរ ដែលអាចផ្តល់ផលដល់បុគ្គលជាអ្នកប្រតិបត្តិផ្ទាល់ ក៏ដូចជាសង្គមជាតិទាំងមូល ដោយនេះគឺជាការចូលរួមចំណែកមួយយ៉ាងសំខាន់ក្នុងការកសាងនូវធនធានមនុស្សប្រកបដោយគុណភាព និងគតិបណ្ឌិត ដើម្បីចូលរួមក្នុងដំណើរការអភិវឌ្ឍប្រទេសឱ្យកាន់តែរីកចម្រើន៕