ព្រឹត្តិការណ៍ប្រកួតកីឡាបាល់ទាត់ ពានរង្វាន់ ឯកឧត្តម កែវ ពិសិដ្ឋ អបអរខួបអនុស្សាវរីយ៍លើកទី៤៤ នៃទិវាជ័យជម្នះ ៧មករា បានបិទបញ្ចប់

ភ្នំពេញ៖ ការប្រកួតកីឡាបាល់ទាត់ទទួលពាន់រង្វាន់ ឯកឧត្តម កែវ ពិសិដ្ឋ តំណាងរាស្រ្តមណ្ឌលខេត្តត្បូងឃ្មុំ បានឈានដល់ការបិទបញ្ចប់ដោយជោគជ័យ។ លើសពីការរកឃើញក្រុមកីឡាករជើងឯក ប្រចាំឃុំពពេល ព្រឹត្តិការណ៍កីឡានេះ បានបង្កលក្ខណៈនៅក្នុងការពង្រឹងសាមគ្គីភាព មិត្តភាព បង្កលក្ខណៈសប្បាយរីករាយនៅក្នុងឃុំ ពិសេសបានជំរុញការចូលរួមយុវជននៅក្នុងការងារសង្គមនានាទៀតផង។

ពិធីបិទការប្រកួត និងប្រគល់រង្វាន់ដល់ក្រុមកីឡាករ បានប្រារព្ធធ្វើឡើង នៅរសៀលថ្ងៃអាទិត្យ ទី៥ ខែកុម្ភៈ ឆ្នាំ២០២៣នេះ នៅទីលានកីឡាបាល់ទាត់ ក្នុងឃុំពពេល ខេត្តត្បូងឃ្មុំ ក្រោមអធិបតីភាព ឯកឧត្តម កែវ ពិសិដ្ឋ តំណាងរាស្រ្តមណ្ឌលខេត្តត្បូងឃ្មុំ ដោយមានការចូលរួមពីសំណាក់ប្រជាពលរដ្ឋនិងយុវជននៅក្នុងឃុំយ៉ាងច្រើនកុះករក្នុងបរិយាកាសសប្បាយរីករាយនិងស្និទ្ធស្នាលជាទីបំផុត។

ក្រុមកីឡាករយុវជន ភូមិថ្មី ទទួលបានចំណាត់ថ្នាក់លេខ១ ទទួលបានមេដាយមាស ពានជ័យលាភីមួយ និងរង្វាន់ ៤លានរៀល ក្រុមកីឡាករភូមិត្រពាំងថ្ម ទទួលបានលេខ ២ ទទួលបានមេដាយប្រាក់ និងប្រាក់រង្វាន់ ៣លានរៀល កីឡាកភូមិស្រះ បានចំណាត់ថ្នាក់លេខ ៣ ទទួលបានមេដាយសំរិត និងប្រាក់រង្វាន់ ២ លានរៀល ចំណែកក្រុមកីឡាករទាំង ៦ ក្រុមទៀត ទទួលរង្វាន់លើកទឹកចិត្ត ៥០ ម៉ឺនរៀលផងដែរ។ នៅក្នុងនោះ ក្រុមកីឡាករវ័យចាស់ប្រចាំឃុំពពេល ក៏ទទួលបានប្រាក់រង្វាន់៥០ ម៉ឺនរៀលផងដែរ។

ឯកឧត្តម កែវ ពិសិដ្ឋ បានថ្លែងការកោតសរសើរដល់ក្រុមការងារ ជាពិសេសគណៈកម្មាធិការគណបក្សឃុំពពេល ដែលបានខិតខំរៀបចំព្រឹត្តិការណ៍ប្រកួតកីឡានេះឡើង ដើម្បីអបអរសាទរខួបលើកទី៤៤ ទិវាជ័យជម្នះ៧មករា ឆ្នាំ១៩៧៩ ដែលជាថ្ងៃកំណើតទី២របស់ប្រជាជនរួចផុតពីការកាប់សម្លាប់នៃរបប ប៉ុល ពត។ ឯកឧត្តមបានបញ្ជាក់ថា កីឡានាំមកនូវសុខភាពនិងសាមគ្គីភាព ជាពិសេសបានលើកទឹកចិត្តយុវជន ឱ្យចូលរួមលើកកម្ពស់វិស័យកីឡា ដែលកំពុងមានការរីកចម្រើន និងយកចិត្តទុកដាក់ពីប្រមុខរាជរដ្ឋាភិបាល មានសម្តេចតេជោ ហ៊ុន សែន ជាប្រមុខដឹកនាំ និងឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្រ្តីបន្តវេននៅថ្ងៃអនាគត។

ឯកឧត្តមបានលើកទឹកចិត្តយុវជនឱ្យមានទម្លាប់លេងកីឡា ដើម្បីថែរក្សាសុខភាព និងរឹតចំណងមិត្តភាព សាមគ្គីភាពរវាងយុវជនពីភូមិមួយ ទៅភូមិមួយ។ ជាមួយគ្នានេះ ឯកឧត្តមបានណែនាំឱ្យយុវជនខិតខំសិក្សារៀន ពិសេសជៀសឱ្យឆ្ងាយពីគ្រឿងញៀននិងគ្រឿងស្រវឹងនានា។
ឯកឧត្តមបញ្ជាក់ថា គណបក្សប្រជាជនកម្ពុជា បានយកចិត្តទុកដាក់ក្នុងការអភិវឌ្ឍធនធានមនុស្ស ជាអាទិភាព ដើម្បីជាសសរទ្រូងប្រទេសជាតិទៅថ្ងៃអនាគត។

ឯកឧត្តម បានបញ្ជាក់ថា ដោយសារសុខសន្តិភាព យុវជននៅក្នុងសម័យនេះមានឱកាសសិក្សារៀនសូត្រគ្រប់ៗគ្នា។ ប្រទេសជាតិមានការអភិវឌ្ឍ សាលារៀននិងផ្លូវធ្វើដំណើរមានគ្រប់កន្លែង មិនលំបាកនៅក្នុងការធ្វើដំណើរទៅសិក្សានោះទេ។

ជាងនេះទៅទៀត ឯកឧត្តមតំណាងរាស្រ្តសន្យាថានឹងខិតខំស្វែងរកអាហារូបករណ៍ ផ្តល់ជូនយុវជននៅក្នុងឃុំបានសិក្សានៅថ្នាក់ឧត្តមសិក្សាឱ្យបានច្រើន ដើម្បីចូលរួមអភិវឌ្ឍន៍មូលដ្ឋាន ឱ្យកាន់តែរីកចម្រើនបន្តទៀត។ ឯកឧត្តម កែវ ពិសិដ្ឋ បានសន្យា ថានឹងរៀបចំឱ្យព្រឹត្តិការណ៍ប្រកួតបាល់ទាត់នេះ នៅឆ្នាំក្រោយៗទៀត។

សូមជម្រាបថា ការបើកការប្រកួតកីឡាបាល់ទាត់យុវជន ដណ្តើមពានរង្វាន់ “ឯកឧត្តម កែវ ពិសិដ្ឋ “បានចាប់ផ្តើមប្រកួតតាំងពីទី១៤ ខែមករា ឆ្នាំ២០២៣ ដោយរៀបចំការប្រកួតនៅរៀងរាល់ចុងសប្តាហ៍។ នៅពេលប្រកួតម្តងៗមានពលរដ្ឋចូលរួមទស្សនានិងលើកទឹកចិត្ត និងកម្សាន្តសប្បាយ យ៉ាងច្រើនកុះករ។ ព្រឹត្តិការណ៍នេះ មានកីឡាករយុវជនចំនួន៩ក្រុម មកពីភូមិនានា នៅក្នុងឃុំពពេល ហើយការចំណាយសម្រាប់ការរៀបចំព្រឹត្តិការណ៍កីឡានេះបានចំណាយអស់ទឹកប្រាក់ប្រមាណ ១៥,០០០ដុល្លារ ៕