គណៈកម្មការទី៩ នៃរដ្ឋសភា ប្រជុំផ្ទៃក្នុងពិនិត្យសិក្សាសេចក្តីព្រាងច្បាប់ ស្ដីពីការគ្រប់គ្រងទឹកស្អាត

ភ្នំពេញ៖ លោកជំទាវ និន សាផុន ប្រធានគណៈកម្មការសាធារណការ ដឹកជញ្ជូន ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នាព្រឹកថ្ងៃទី៣០ ខែមករា ឆ្នាំ២០២៣ បានដឹកនាំសមាជិក សមាជិកា ប្រជុំផ្ទៃក្នុង ដើម្បីពិនិត្យសិក្សាសេចក្តីព្រាងច្បាប់ ស្តីពីការគ្រប់គ្រងទឹកស្អាត។

សេចក្តីព្រាងច្បាប់នេះ ត្រូវបានកិច្ចប្រជុំគណៈកម្មាធិការអចិន្ត្រៃយ៍រដ្ឋសភា កាលពីថៃ្ងទី២៦ ខែមករា ឆ្នាំ២០២៣ សម្រេចប្រគល់ជូនដល់គណៈកម្មការទី៩ នៃរដ្ឋសភា ពិនិត្យ សិក្សា ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ។

សូមជម្រាបថា កាលពីថ្ងៃទី១៣ ខែមករា ឆ្នាំ២០២៣ កិច្ចប្រជុំគណៈរដ្ឋមន្ត្រីសម្រេចយល់ព្រមបញ្ជូនសេចក្តីព្រាងច្បាប់ស្ដីពីការគ្រប់គ្រងទឹកស្អាត មកសុំការពិនិត្យ និងអនុម័តពីស្ថាប័ននីតិប្បញ្ញត្តិ ដែលរួមមាន ១៥ជំពូក និង៦៥មាត្រា ដូចខាងក្រោម៖

ជំពូកទី១ មាន៣មាត្រា (ពីមាត្រា១ ដល់ មាត្រា៣) ជំពូកនេះចែងអំពីបទប្បញ្ញត្តិទូទៅ
ជំពូកទី២ មាន២មាត្រា (ពីមាត្រា៤ ដល់ មាត្រា៥) ជំពូកនេះចែងអំពីសមត្ថកិច្ចគ្រប់គ្រង
ជំពូកទី៣ មាន១មាត្រា (មាត្រា៦) ជំពូកនេះចែងអំពីគោលការណ៍

ជំពូកទី៤ មាន១មាត្រា (មាត្រា៧) ជំពូកនេះចែងអំពីមូលនិធិអភិវឌ្ឍន៍វិស័យទឹកស្អាត
ជំពូកទី៥ មាន៥ផ្នែក និង១៣មាត្រា (ពីមាត្រា៨ ដល់ មាត្រា២០) ជំពូកនេះចែងអំពីការគ្រប់គ្រងអាជីវកម្មផ្គត់ផ្គង់ទឹកស្អាត
ជំពូកទី៦ មាន២មាត្រា (ពីមាត្រា២១ ដល់ មាត្រា២២) ជំពូកនេះចែងអំពីស្តង់ដាគុណភាពទឹក
ជំពូកទី៧ មាន៣មាត្រា (ពីមាត្រា២៣ ដល់ មាត្រា២៥) ជំពូកនេះចែងអំពីការប្រើប្រាស់ដី ប្រភពទឹក និងរចនាសម្ព័ន្ធរួម

ជំពូកទី៨ មាន២ផ្នែក និង៣មាត្រា (ពីមាត្រា២៦ ដល់ មាត្រា២៨) ជំពូកនេះចែងអំពីថ្លៃលក់ទឹកស្អាត
ជំពូកទី៩ មាន៣ផ្នែក និង៨មាត្រា (ពីមាត្រា២៩ ដល់ មាត្រា៣៦) ជំពូកនេះចែងអំពីកាតព្វកិច្ច និងសិទ្ធិរបស់ប្រតិបត្តិករ
ជំពូកទី១០ មាន៣មាត្រា (ពីមាត្រា៣៧ ដល់ មាត្រា៣៩) ជំពូកនេះចែងអំពីការគ្រប់គ្រង ការត្រួតពិនិត្យប្រព័ន្ធផ្គត់ផ្គង់ទឹកស្អាត និងសមត្ថកិច្ចមន្ត្រីអធិការកិច្ច

ជំពូកទី១១ មាន២មាត្រា (ពីមាត្រា៤០ ដល់ មាត្រា៤១) ជំពូកនេះចែងអំពីវិធានការក្នុងគ្រាអាសន្ន
ជំពូកទី១២ មាន៥មាត្រា (ពីមាត្រា៤២ ដល់ មាត្រា៤៦) ជំពូកនេះចែងអំពីការដោះស្រាយវិវាទ
ជំពូកទី១៣ មាន១៥មាត្រា (ពីមាត្រា៤៧ ដល់ មាត្រា៦១) ជំពូកនេះចែងអំពីទោសប្បញ្ញត្តិ
ជំពូកទី១៤ មាន៣មាត្រា (ពីមាត្រា៦២ ដល់ មាត្រា៦៤) ជំពូកនេះចែងអំពីអន្តរប្បញ្ញត្តិ
ជំពូកទី១៥ មាន១មាត្រា (មាត្រា៦៥) ជំពូកនេះចែងអំពីអវសានប្បញ្ញត្តិ។