លោកជំទាវ ឱ វណ្ណឌីន អញ្ជើញជួបពិភាក្សាជាមួយរដ្ឋបាលខេត្តតាកែវ ស្ដីពីស្ថានភាពជំងឺកូវីដ១៩ និងដំណើរការចាក់វ៉ាក់សាំងចាប់ពីដូសមូលដ្ឋាន ដល់ដូសជម្រុញទី៦

ភ្នំពេញ៖ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល នឹងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខ័ណ្ឌទូទាំងប្រទេស  រួមដំណើរដោយ លោកស្រីវេជ្ជបណ្ឌិត លី អាយលែន តំណាងអង្គការសុខភាពពិភពលោក នឹងគណៈប្រតិភូក្រសួងសុខាភិបាល នាល្ងាចថ្ងៃព្រហស្បតិ៍ ទី២៦ ខែមករា ឆ្នាំ២០២៣ បានអញ្ជើញជួបពិភាក្សាជាមួយឯកឧត្តម អ៊ូច ភា អភិបាលខេត្តតាកែវ ស្ដីពីស្ថានភាពជំងឺកូវីដ១៩ និងដំណើរការចាក់វ៉ាក់សាំងចាប់ពីដូសមូលដ្ឋាន ដល់ដូសជម្រុញទី៦ ក្នុងភូមិសាស្រ្តខេត្ត។

ក្នុងកិច្ចពិភាក្សានេះដែរក៏មានការងញ្ជើញចូលរួមពីលោកស្រីអភិបាលរងខេត្ត ,លោកប្រធានមន្ទីរសុខាភិបាលខេត្ត ,កងកម្លាំងប្រដាប់អាវុធទាំងបីប្រភេទ និងមន្ទីរពាក់ព័ន្ធជាច្រើននាក់ផងដែរ។

ក្នុងឱកាសនោះដែរលោកជំទាវ ឱ វណ្ណឌីន បានស្នើរដល់អាជ្ញាធរខេត្តត្រូវជម្រុញដល់ប្រជាពលរដ្ឋដែលគ្រប់ដូសអោយមកទទួលវ៉ាក់សាំងបង្ការជំងឺកូវីដ១៩អោយបានគ្រប់ៗគ្នា ពិសេសមន្រ្តីស្ថាប័នជំនាញពាក់ព័ន្ធត្រូវណែនាំពួកគាត់អោយយល់ដឹងពីគម្លាតរយៈពេលនៃការចាក់វ៉ាក់សាំងអោយបានច្បាស់ ចៀសវាងមានរយៈពេលយូរ ដែលជាហេតុធ្វើអោយប្រព័ន្ធស្ស៊ាំក្នុងរាង្គកាយមានការចុះខ្សោយ នៅពេលមានការឆ្លងជំងឺកូវីដ១៩ វាអាចវិវត្តន៍ជាធ្ងន់ធ្ងរបាន។

ឆ្លើយតបនិងកាលើកឡើងរបស់លោកជំទាវ ឯកឧត្តម អ៊ូច ភា បានមានប្រសាសន៍ថាបច្ចុប្បន្ននេះអាជ្ញាធរខេត្ត រួមនិងមន្ទីរពាក់ព័ន្ធបានយកចិត្តទុកដាក់ពីបញ្ហាការចាក់វ៉ាក់សាំងនេះ ដោយបានជម្រុញដល់អាជ្ញាធរមូលដ្ឋាន ភូមិ ឃុំ ធ្វើយ៉ាងណាផ្សព្វផ្សាយដល់ប្រជាពលរដ្ឋដែលមានអាយុចាប់ពី៣ឆ្នាំឡើងអោយមកទទួលវ៉ាក់សាំងកូវីដ១៩ កាន់តែច្រើនថែមទៀត ដើម្បីបង្កើនភាពស្ស៊ាំក្នុងសហគមន៍ និងអាចទប់ទល់បានពីការឆ្លងរីករាលដាលជំងឺកូវីដ១៩ ពិសេសជាងនេះទៀតអាជ្ញាធរខេត្តបានបន្តសកម្មភាពការចុះចាក់វ៉ាក់សាំងនៅតាមមូលដ្ឋានដែលប្រជាពលរដ្ឋរស់នៅ តាមសាលារៀន វត្តអារាម ផងដែរ ៕