អភិបាលខណ្ឌដូនពេញ ដឹកនាំកម្លាំងមន្ត្រីជំនាញចុះធ្វើការស្ដារប្រព័ន្ធលូ តាមបណ្ដោយផ្លូវ R2 កែងផ្លូវលេខ 70
ភ្នំពេញ៖ ដោយមានការណែនាំ និងយកចិត្តទុកដាក់ពី ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញនៅព្រឹកថ្ងៃទី២៤ ខែមករា ឆ្នាំ២០២៣នេះ លោក ជា ខេមាអភិបាលខណ្ឌដូនពេញ បានដឹកនាំកម្លាំងមន្ត្រីជំនាញសាធារណៈការសណ្ដាប់ធ្នាប់ និងអនាម័យ បរិស្ថានខណ្ឌ ចុះធ្វើការស្ដារប្រព័ន្ធលូ តាមបណ្ដោយផ្លូវ R2 កែងផ្លូវលេខ 70 ដែលមានប្រវែងជាង០១គីឡូម៉ែត្រ ស្ថិតនៅភូមិ២០ និងភូមិ២៤ មូលដ្ឋានសង្កាត់ស្រះចក ខណ្ឌដូនពេញ រាជធានីភ្នំពេញ។
លោក ជា ខេមា បានឲ្យដឹងថា កន្លងមកនៅតាមបណ្ដោយផ្លូវលេខR2 កែងផ្លូវ 70 នេះ ដែលមានប្រវែង១២២៧ម៉ែត្រ មានការជនលិចទឹកដល់ភូមិ ផ្ទះរបស់ប្រជាពលរដ្ឋរស់នៅអមសងខាងផ្លូវ ពេលមានភ្លៀងធ្លាក់ម្ដងៗ។ ដូច្នេះពលរដ្ឋមានការសំណូមពរមកអាជ្ញាធរខណ្ឌពេលនោះអាជ្ញាធរខណ្ឌបានចុះត្រួតពិនិត្យមើលដោយនៅតាមបណ្ដោយផ្លូវនេះមានប្រព័ន្ធលូត្រឹមត្រូវ ដោយមុខកាត់មួយម៉ែត្រ២តឹក ទៅមួយម៉ែត្រ ៥តឹក។ បន្ទាប់មកមន្ត្រីជំនាញបានបន្តត្រួតពិនិត្យឃើញថានៅមានអណ្តូងលូ និងក្នងបណ្តាញលូនីមួយៗមានការកកស្ទះទៅដោយសំរាម សំបកកំប៉ុង ថង់ប្លាស្ទិក ដី.ជាដើម បង្កជាការកកស្ទះប្រព័ន្ធទឹកលែងហូរ។
លោកបន្តទៀតថា ធ្វើលើកនេះគឺធ្វើឲ្យស្អាត ធ្វើឲ្យអស់ ធ្វើឲ្យលែងមានការកកស្ទះបន្តទៀត ហើយការស្តារត្រូវធ្វើឲ្យស្អាតកុំធ្វើកិច្ចការនេះដដែលៗ បើធ្វើដដែលៗនាំឲ្យខាតបង់ថវិកា និងពេលវេលាព្រោះយើងមានកិច្ចការច្រើនណាស់ដែលត្រូវធ្វើដើម្បីបម្រើប្រជាពលរដ្ឋមូលដ្ឋាន។
ជាមួយគ្នានោះលោកអភិបាល បានឆ្លៀតសួរសុខទុក្ខបងប្អូនពលរដ្ឋរស់នៅអមសងខាងផ្លូវលេខ៧០ នេះ និងបានណែនាំដល់អាជ្ញាធរមូលដ្ឋានសង្កាត់ស្រះចក ផងដែរថា ត្រូវយកចិត្តទុកដាក់បម្រើសេវាសាធារណៈជូនដល់ពលរដ្ឋឲ្យបានទាន់ពេលវេលា នូវឯកសារផ្សេងៗ មិនត្រូវទុកចោលព្រងើយនោះឡើយ។ នឹងសូមសំណូមពរដល់ពលរដ្ឋទាំងអស់ជួយថែរក្សាអនាម័យ បរិស្ថាន កុំយកសំរាមទុកចោលនៅលើមាត់លូ ត្រូវវិចខ្ចប់ឲ្យបានបានត្រឹមត្រូវ សំរាមត្រូវចេញតាមពេលកំណត់របស់ក្រុមហ៊ុន ចៀសវាងការចេញសំរាមក្រៅម៉ោង ដែលអាចបង្កការកកស្ទះដល់មាត់លូពេលមេឃភ្លៀង។
ទន្ទឹមនិងនោះលោក អភិបាល សង្ឃឹមយ៉ាងមុតមាំថា ប្រជាពលរដ្ឋនៅក្នុងមូលដ្ឋានខណ្ឌ សង្កាត់ទាំង១១ នឹងបន្តសហការចូលរួមដើម្បីមូលដ្ឋានយើងទាំងអស់គ្នា៕
