គ្រោះថ្នាក់ចរាចរណ៍ ម៉ូតូបុកជាមួយម៉ូតូស្លាប់២នាក់ របួសធ្ងន់ម្នាក់នៅស្រុកភ្នំស្រុក ខេត្តបន្ទាយមានជ័យ

បន្ទាយមានជ័យ៖ មនុស្ស២នាក់បានស្លាប់និង០១នាក់ទៀតរងរបួសធ្ងន់ដោយគ្រោះថ្នាក់ចរាចរណ៍រវាងម៉ូតូបុកជាមួយម៉ូតូ នៅលើចូលទៅស្រុកភ្នំស្រុក ចំណុចគោកកកោះ ស្ថិតក្នុងភូមិគោកក្រោល ឃុំស្រះជីក ស្រុកភ្នំស្រុក ខេត្តបន្ទាយមានជ័យ វេលាម៉ោង០៦និង៥០នាទីយប់ថ្ងៃទី២១ ខែមករា ឆ្នាំ ២០២៣ ។

នគរបាលស្រុកភ្នំស្រុកបានឲ្យដឹងថា ដំបូងមានម៉ូតូ០១គ្រឿងម៉ាកហុងដាឌ្រីម ពណ៌ខ្មៅ  ស៊េរីឆ្នាំ២០០៦ ពាក់ស្លាកលេខសៀមរាប1C-9304 អ្នកបើកបរម៉ូតូឈ្មោះ ស៊ុន សម្បត្តិ ភេទប្រុស  អាយុ២៨ឆ្នាំ រស់នៅភូមិរំភើយ ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ ក្នុងទិសដៅពីត្បូងទៅជើង ក្នុងល្បឿនលឿន មកដល់ចំណុចកើតហេតុ បានបុកចំពីមុខពេញមួយទំហឹងជាមួយម៉ូតូម៉ាកហុងដាឌ្រីម ស៊េរីឆ្នាំ២០១៣ ពណ៌ខ្មៅ ពាក់ស្លាកលេខបន្ទាយមានជ័យ 1H-2608 ក្នុងទិសដៅផ្ទុយគ្នា ពីជើងទៅត្បូង បើកបរដោយ ឈ្មោះ ប្រោង ឈិនឡុង ភេទប្រុស អាយុ១៩ឆ្នាំ រស់នៅភូមិស្មាច់ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ ។

នគរបាលបានបញ្ជាក់ថា ករណីគ្រោះថ្នាក់ចរាចរណ៍នេះ បណ្តាលឲ្យឈ្មោះ ស៊ុន សម្បត្តិ ស្លាប់នៅនឹងកន្លែង ចំណែកឈ្មោះប្រោង ឈិនឡុងស្លាប់នៅពេលបញ្ជូនមកដល់មន្ទីរពេទ្យបង្អែកស្រុកភ្នំ ស្រុក)និងអ្នករួមដំណើរឈ្មោះ ហ៊ាង អួង ភេទប្រុស អាយុ២០ឆ្នាំ រស់នៅភូមិឃុំជាមួយគ្នា (បាក់ជើងខាងស្ដាំ) ។ មូលហេតុ អ្នកបើកបរម៉ូតូ ភាគីទាំងសងខាង បើកបរក្នុងល្បឿនលឿន ។

វត្ថុតាងម៉ូតូទាំង០២គ្រឿងគ្រឿងត្រូវបានយកមករក្សាទុកនៅប៉ុស្តិ៍នគរបាលរដ្ឋបាលស្រះជីក ។ចំណេកសពជនរងគ្រោះប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី៕