ខ្នងផ្ទះទី២៣៥ អំណោយដ៏ថ្លៃថ្លារបស់សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ត្រូវបានប្រគល់ជូនគ្រួសារអតីតយុទ្ធជនពលី នៅស្រុកតាំងគោក

ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជាខេត្តកំពង់ធំ អមដំណើរដោយឧត្តមសេនីយ៍ទោ ម៉ែន លី ស្នងការនគរបាលខេត្ត អនុប្រធានសមាគមអតីតយុទ្ធជនកម្ពុជាខេត្តកំពង់ធំ នៅថ្ងៃទី២៨ ខែធ្នូ ឆ្នាំ២០២២ បានដឹកនាំសហការី រួមជាមួយអាជ្ញាធរដែនដីបានទៅប្រគល់ខ្នងផ្ទះទី២៣៥ ដែល ជាអំណោយដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រធានសមាគមអតីតយុទ្ធជនកម្ពុជា និងសម្តេចកិត្តិព្រឹទ្ឋបណ្ឌិត ប៊ុន រ៉ានីហ៊ុនសែន តាមរយៈឯកឧត្តមទេសរដ្ឋមន្រ្តី នាយឧត្ដមសេនីយ៍កិត្តិសង្គហបណ្ឌិត គន់ គីម អគ្គលេខាធិការសមាគមអតីតយុទ្ឋជនកម្ពុជា ជូនគ្រួសារអតីតយុទ្ធជនពលីនៅភូមិខ្នាយទង ឃុំស្វាយភ្លើង ស្រុកតាំងគោក ខេត្តកំពង់ធំ ។

ឧត្ដមសេនីយ៍ទោ សោម ស៊ុន បាន បញ្ជាក់ថាលោកស្រី សា រុំ អាយុ៦៥ឆ្នាំ ជាស្ត្រីមេម៉ាយមានកូនក្នុងបន្ទុកចំនួន៣នាក់ ត្រូវជាភរិយាលោកពលបាលទោ ស៊ឹម នាង ដែលបានចូលបម្រើកងទ័ពនៅឆ្នាំ១៩៨៥ អង្គភាពយោធាស្រុកស្ទោង ខេត្តកំពង់ធំ ហើយបានពលីជីវិតនៅឆ្នាំ១៩៩០ នៅសមរភូមិឃុំពពក ស្រុកស្ទោង ខេត្តកំពង់ធំ ក្នុងពេលដែលប្រយុទ្ធជាមួយខ្មាំង។ សព្វថ្ងៃគាត់ប្រកបមុខរបរធ្វើស្រែ ហើយគ្មានលទ្ធភាពក្នុងការសាងសង់ផ្ទះស្នាក់នៅឲ្យបានសមរ្យ។ ដោយមើលឃើញពីជីវភាពរស់នៅរបស់គាត់ មានការលំបាកខ្វះខាត ទើបគណៈកម្មាធិការសមាគម អតីតយុទ្ឋជនកម្ពុជាខេត្តកំពង់ធំ សម្រេចសាងសង់ផ្ទះជូនគាត់នៅពេលនេះ ជាខ្នងផ្ទះទី២៣៥ អំណោយដ៏ថ្លៃថ្លារបស់សម្តេចតេជោ ហ៊ុនសែននិងសម្តេចកិត្តិព្រឹទ្ឋបណ្ឌិត ប៊ុន រ៉ានីហ៊ុនសែន ដោយបានសាងសង់ខ្ពស់ផុតពីដី សសរបេតុង ឆ្អឹង ដែក រនាបក្តា ជញ្ជាំងស្មាតបត ដំបូលប្រក់ស័ង្កសីកិនភ្លី និងជណ្ដើរកាច់ ។

ក្នុងពិធីប្រគល់ផ្ទះថ្មីនៅពេលនេះ ឧត្តមសេនីយ៍ទោ សោម ស៊ុនបានអំពាវនាវដល់ក្រុមគ្រួសារអតីតយុទ្ធ និងប្រជាពលរដ្ឋទាំងអស់ ត្រូវខិតខំថែរក្សាសុខភាព និងចូលរួមអនុវត្តន៍ឲ្យបានជោគជ័យនូវគោលនយោបាយភូមិ ឃុំមានសុវត្ថិភាព ព្រមជាមួយនេះ ប្រធានសមាគម អតីតយុទ្ឋជនកម្ពុជា ខេត្តកំពង់ធំ រួមជាមួយ ព្រះសង្ឃ និងអាជ្ញាធរដែនដី បាននាំយកនូវអំណោយរបស់ ឯកឧត្តម ឧត្តមសេនីយ៍ឯក ហ៊ុន ម៉ាណែត និងលោកជំទាវ ពេជ ចន្ទមុន្នី ផ្ដល់ជូនគាត់បន្ថែមទៀតមាន ៖ អង្ករចំនួន ១០០គីឡូក្រាម មីចំនួន៣កេស ទឹកត្រី ចំនួន ១យួរ ត្រីខ ចំនួន០១យួរ និងសម្ភារៈសម្រាប់ ប្រើប្រាស់ក្នុងផ្ទះបាយ ព្រមទាំងថវិកាមួយចំនួន ដោយឡែកប្រជាពលរដ្ឋដែលបានចូលរួមក្នុងពិធីប្រគល់ផ្ទះថ្មីនេះចំនួន៦៣នាក់ ដោយក្នុងម្នាក់ទទួលបានថវិកាចំនួន២០.០០០រៀលផងដែរ ។

លោកស្រី សា រុំ គ្រួសារអតីតយុទ្ធជនពលីនិងក្រុមគ្រួសារ បានសូមគោរពថ្លែងអំណរគុណដ៏ជ្រាលជ្រៅជាទីបំផុត និង សូមគោរពជូនពរចំពោះសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ព្រមទាំងឯកឧត្តម ហ៊ុន ម៉ាណែត និងលោកជំទាវ រួមទាំងគណៈកម្មាធិការសមាគមអតីតយុទ្ធជនកម្ពុជាខេត្តកំពង់ធំ សូមបានជួបតែនិងពុទ្ធពរទាំងប្រាំប្រការ កុំបីឃ្លៀងឃ្លាតឡើយ និងបានប្តេជ្ញាចិត្តបន្តគាំទ្រសម្តេចតេជោហ៊ុន សែនលុះអវសាន្តជីវិត ៕