ភ្នំពេញ៖ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្រ្តី ទទួលបន្ទុកបេសកកម្មពិសេស នារសៀលថ្ងៃទី២៨ ខែធ្នូ ឆ្នាំ២០២២ បានទទួលជួបពិភាក្សាការងារជាមួយប្រតិភូសាកលវិទ្យាល័យរដ្ឋប៉ាដាង (Padang State University) ជាភាសាឥណ្ឌូនេសុី (Universitas Negeri Padang) ហៅកាត់ UNP ដឹកនាំដោយ ឯកឧត្តមបណ្ឌិត Ganefri សាកលវិទ្យាធិការ និងជាប្រធានក្រុមប្រឹក្សាសាកលវិទ្យាធិការសាកលវិទ្យាល័យរដ្ឋចំនួន ១៣៦ នៅប្រទេសឥណ្ឌូនេសុី ដែលជំនួបនេះធ្វើឡេីងនៅការិយាល័យរបស់ឯកឧត្តមបណ្ឌិត អូស្មាន ហាស្សាន់។
ប្រតិភូនៃសកលវិទ្យាល័យរដ្ឋប៉ាដាង បានអញ្ជើញមកកម្ពុជា ដើម្បីធ្វើតេស្តសមត្ថភាពជ្រើសរើសនិស្សិតកម្ពុជា ឲ្យទៅបន្តការសិក្សានៅសាកលវិទ្យាល័យរដ្ឋប៉ាដាង នៃប្រទេសឥណ្ឌូនេស៊ី។
សាកលវិទ្យាល័យរដ្ឋប៉ាដាង បានផ្ដល់អាហារូបករណ៍ចំនួន ៤០ កន្លែង ក្នុងនោះ ២០ កន្លែង ផ្ដល់អាហារូបករណ៍ ១០០% និង ២០ កន្លែង ផ្សេងទៀត ផ្ដល់អាហារូបករណ៍លើថ្លៃសិក្សា សម្រាប់ថ្នាក់បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិត។
ឯកឧត្តមបណ្ឌិត អូស្មាន ហាស្សាន់ បានសម្ដែងនូវអារម្មណ៍សប្បាយរីករាយ និងថ្លែងអំណរគុណយ៉ាងជ្រាលជ្រៅ ចំពោះរដ្ឋាភិបាលឥណ្ឌូនេស៊ី ដែលតែងតែផ្ដល់អាហារូបករណ៍ដល់និស្សិតកម្ពុជា ដើម្បីឲ្យពួកគេមានឱកាសកាន់តែទូលំទូលាយក្នុងការពង្រឹងសមត្ថភាពរបស់ខ្លួន ហើយនេះគឺជាការចូលរួមដ៏ធំធេងរបស់រដ្ឋាភិបាលឥណ្ឌូនេស៊ី ក្នុងការអភិវឌ្ឍធនធានមនុស្សនៅកម្ពុជា។
សូមជម្រាបថា សាកលវិទ្យាល័យរដ្ឋប៉ាដាង ជាគ្រឹះស្ថានឧត្តមសិក្សា ដែលមានឧត្តមភាពខ្ពស់ និងជាប់ចំណាត់ថ្នាក់លេខ ៥ ក្នុងចំណោមសាកលវិទ្យាល័យចំនួនសរុប ៣,៩៥៧ នៅប្រទេសឥណ្ឌូនេសុី។ សាកលវិទ្យាល័យនេះបង្កើតទ្បើងនៅឆ្នាំ១៩៥៤ មានទំហំផ្ទៃដីសរុបចំនួន ២២៥ ហិកតា ដែលបច្ចុប្បន្នមាននិស្សិតកំពុងសិក្សាចំនួនជាង ៤៨,០០០ នាក់ និងមានជំនាញចំនួន ១០ រួមមាន ផ្នែកអប់រំ, ផ្នែកភាសា និងសិល្បៈ, ផ្នែកគណិតវិទ្យា និងវិទ្យាសាស្ត្រធម្មជាតិ, ផ្នែកវិទ្យាសាស្ត្រសង្គម, ផ្នែកវិស្វកម្ម, ផ្នែកវិទ្យាសាស្ត្រកីឡា, ផ្នែកសេដ្ឋកិច្ច, ផ្នែកបដិសណ្ឋារកិច្ច និងទេសចរណ៍, ផ្នែកសិក្សាបញ្ចប់ការសិក្សា និង ផ្នែកចិត្តវិទ្យា និងសុខភាព៕
